«Birlik» saıası partııasy elordada qaıyrymdylyq aýksıonyn ótkizdi
Bul shara ótken jyly partııanyń tikeleı qoldaýymen ótkizilgen «Táýelsizdik tanytqan talanttar» atty ónerli jastarǵa arnalǵan festıvaldiń zańdy jalǵasy ispetti. Onda elimizdegi ondaǵan talantty ónerpaz jastarǵa qarjylaı kómek kórsetilip, olardyń qoǵamǵa tezirek tanylýy mejelengen edi. Al keshegi ótkizilgen qaıyrymdylyq aýksıonyna sol aýqymdy festıvalde bas júldege ıe bolǵan qylqalam sheberleri men jas sýretshilerdiń shyǵarmalary satylymǵa qoıyldy. Kartınalardy satýdan túsken barlyq qarajat aýyr naýqaspen, ıaǵnı leıkemııamen aýyratyn balalardy qoldaý qoryna jiberildi. Aýksıonda 8 lot boıynsha 12 avtordyń jumystary satylyp, 20 mıllıon teńgeden astam qarajat jınaldy.
Qaıyrymdylyq sharasynyń ashylýynda «Birlik» saıası partııasynyń tóraǵasy Serik Sultanǵalı Elbasy Joldaýynda elimizdi damyǵan 30 eldiń qataryna kirgizý týraly strategııalyq maqsat qoıǵanyn aıtyp ótti. «Búginde Qazaqstan álemdik arenada tanylyp qana qoımaı, óz ornyn oıyp alǵan aldyńǵy memleketterdiń qataryna ilikti. Halyqtyń ál-aýqaty, rýhanı jáne moraldyq qundylyqtary kóptegen memleketter úshin úlgige aınaldy. Alaıda, jaqyndarymyzǵa degen kómek pen qaıyrymdylyqtyń bolashaq úshin mańyzy zor ekenin umytpaǵan jón. Damyǵan elderde qarajattyń edáýir bóligi, bul shamamen 80 paıyzy, aq qanmen aýyratyn balalardy emdeýge qaıyrymdylyq kómek túrinde kelip túsedi. Sondyqtan men barlyq otandastardy osy isten qalys qalmaýǵa, ortaq kúsh-jigermen táýelsiz Qazaqstandaǵy muqtaj jas urpaqqa osy aýyr keselden arylýǵa kómek kórsetýge shaqyramyn», dedi ol.
Álemdik statıstıka derekteri boıynsha, qaterli isik aýrýlary ishinde birinshi orynda aq qan aýrýy tur. Elimizde jylyna orta eseppen qaterli qan aýrýyna shaldyqqan 2500 bala emdeledi eken, onyń ishinde shamamen 600-iniń onkologııalyq jáne gematologııalyq aýrýlary alǵash ret anyqtalǵan balalar. Sondaı-aq, jylyna orta eseppen 140 adamnyń aq qan aýrýyna shaldyqqany anyqtalady.
Marat AQQUL,
«Egemen Qazaqstan».
ASTANA.