Jýyqta Mońǵolııanyń Mádenıet mınıstrligi tarıhı tulǵa Shyńǵys hannyń týǵanyna 860 jyl tolý datasyna oraı memleketke jáne qoǵamǵa eńbek sińirgen tulǵalardy iriktep, olardy nasıhattaý jaıly sheshim shyǵardy. Osy tizimge baı-ólkelikter atynan halyqaralyq dárejedegi sport sheberi, Mońǵolııa sportynyń eńbek sińirgen qaıratkeri (2006), erkin kúresten Álem kýboginiń (1981) jáne álem birinshiliginiń qola medal ıegeri (1986), ataqty balýan Baqyt Odnaıulynyń esimi ilinip, ardager sportshyny ulyqtaý rásimi ótti.
Is-shara aıasynda aımaqtyq ortalyq mýzeıde balýannyń sporttyq joly men qoǵamǵa sińirgen eńbegin áıgileıtin kórme uıymdastyryldy. Mekeme basshysy Aıshagúl Azamatqyzynyń aıtýynsha, bul retki kórme ekspozısııasyna balýannyń ár jyldarda alǵan júldeleri: medal, kýbok, sımvoldyq belgiler, álem jáne Olımpıada kilemderinde beldesken fotosýretteri men ústine kıgen sporttyq kostıýmderi jáne ár jyldary alǵan marapattary (orden, medal, alǵyshat, dıplom, t.b.) barlyǵy 569 zattyq jádiger qoıylypty. Onyń syrtynda, balýannyń ótken jyldardaǵy sporttyq shejiresin tanytatyn qabyrǵa stendterge jetken jetistigi, sińirgen eńbegi jaıly keńinen jazylyp, bul derekter kópshiliktiń kózaıymyna usynylypty.
Osyndaǵy derekterge kóz júgirtsek, 1954 jyly Baı-О́lke aımaǵynyń ortalyǵy О́lgeı qalashyǵynda dúnıege kelgen balýan, 1971-1972 jyldardan bastap mońǵol ulttyq kúresimen aınalysyp, jasóspirimder arasyndaǵy memlekettik chempıonatta júldeli orynǵa ıe bolǵan. Baqyt Odnaıuly orta mektepti bitire salysymen el astanasy Ulanbatyrǵa attanyp, sonda erkin kúres úıirmesine qatysady. Bir tańdanarlyq jaǵdaı, jattyǵýǵa kiriskenine jyl tolmaı jatyp, qalalyq jáne aımaqtyq birinshilikterde úzdik óner kórsetip, 1974-1975 jyldary Mońǵolııa jastarynyń birinshiliginde 2 dúrkin chempıon atanady. Osylaı erkin kúresten tusaýy kesilgen nar qazaq Mońǵolııanyń eresekter arasyndaǵy chempıonattardan 4 dúrkin altyn, 10 dúrkin kúmis, 4 dúrkin qola medaldi enshilep, aıdy aspanǵa shyǵarmasa da, aǵaıyndy aýzyna qaratypty. Onyń syrtynda halyqaralyq Internasıonal básekesiniń 2 dúrkin jeńimpazy jáne 4 ret júldegeri atansa, «Dınamo» sport qoǵamy halyqaralyq týrnıriniń 3 dúrkin chempıony bolyp, 1986 jyly «Izgi nıet» oıyndarynda 4-orynǵa qol jetkizgen eken.
«Erkin kúres túrinen mundaı bıikke jetken qazaq az, zamanynda áıgili kúsh ıeleri S.Andıev, Kasımov (KSRO) B.Baýgartner (AQSh), A.Sandýrskıı (Polsha), A.Shreıder (GDR), I.Bolla (Vengrııa) sııaqty myqtylarmen beldesip, ártúrli jarystardan 80-nen astam medal alǵan alǵashqy qazaq», deıdi aımaqtyq sport basqarmasynyń bastyǵy Qaınar Qaısanaıuly.
Bul jerde balýannyń aıta keterlik taǵy bir jetistigi – qazaq kúresine qosqan úlesi. Qazirgi tańda balýan aımaqtyq «Qazaq kúresi» federasııasyn basqarady. 2006 jyly Baı-О́lke aımaǵynda qazaq kúresinen Azııa chempıonatyn ótkizýmen qatar, qazaq kúresinen ótip jatqan álem jáne qurlyqtyq birinshilikter men Qazaqstan Barysy, Álem Barysy, Eýrazııa Barysy sııaqty jobalardyń joǵary deńgeıde ótýine atsalysyp júr. Baqyt balýannyń qazaq kúresine baptaǵan shákirtteri álem chempıonatynan 2 kúmis, 2 qola jáne Azııa birinshiliginen 6 altyn, 8 kúmis, 8 qola medal enshilegen eken.