Atyraý qalasynyń №2 sotynda memlekettik fýnksııalardy oryndaýǵa ýákilettik berilgen adam bola tura, iri mólsherde birneshe ret para alý faktisi boıynsha Atyraý oblysy kóliktik baqylaý ınspeksııasynyń bas mamany S.-ǵa qatysty qylmystyq is qaraldy, dep habarlaıdy Egemen.kz atpress.kz-ke silteme jasap.
Atyraý oblysy boıynsha kóliktik baqylaý ınspeksııasynyń bas mamany S. QR «Avtomobıl kóligi týraly» zańnamasynyń saqtalýyna baqylaýdy júzege asyrý jáne iri gabarıtti nemese aýyr salmaqty kólik quraldarynyń Atyraý oblysy aýmaǵynan júrip ótýin qadaǵalaý barysynda zańdy tulǵalardyń kólikterin teksermeı jáne ákimshilik jaýapkershilikke tartpaı, olardyń Atyraý oblysy aýmaǵynda erkin jáne kedergisiz qozǵalýyna yqpal jasaǵany úshin 2020-2022 jyldar aralyǵynda barlyǵy 13 JShS-nen para retinde birneshe ret, iri mólsherde jalpy sommasy 23 817 000 teńge aqsha qarajattaryn jubaıynyń, anasynyń, enesiniń, áriptesiniń jubaıynyń attaryndaǵy «Kaspi Gold» qosymshasyndaǵy shottary arqyly alǵan.
Kórsetilgen mán-jaılar men sottalýshynyń kinási kýálardyń aıǵaqtarymen, JTÁ nátıjelerimen, beınejazbalarymen, arnaıy tekserý qujattarymen, sot fonografııalyq, sot psıhologııalyq-fılologııalyq saraptamalar jáne aýdıtorlyq qorytyndylarymen óz dálelin tapty.
Taraptardyń pozısııasyna kelsek, prokýror sottalýshy S.-ny ómir boıyna memlekettik qyzmette laýazymdardy atqarý quqyǵynan aıyra otyryp, 8 jyl merzimge bas bostandyǵynan aıyrý túrindegi jaza taǵaıyndaýdy talap etken. Sottalýshy ózine taǵylǵan aıyppen kelispeı, ózin aqtaýdy suraǵan.
Sot sheshimimen, QK-tiń 366-babynyń 3-bóliginiń 3,4-tarmaqtarynyń sanksııasynda múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyra otyryp, paranyń 60 eselengennen 70 eselengenge deıingi somasy mólsherinde aıyppul salý ne 7 jyldan 12 jylǵa deıingi merzimge bas bostandyǵynan aıyrý jazasy kózdelgen.
Sot S.-nyń qylmystyq jaýaptylyǵy men jazasyn jeńildetetin mán-jaı retinde onyń asyraýynda jas balalarynyń bolýyn tanydy. Sottalýshylardyń qabyldaǵan kásibı antty buzýy jazany aýyrlatatyn jaǵdaı dep tanyldy.
Sot úkimimen S.-ǵa ómir boıyna memlekettik qyzmette laýazymdardy atqarý quqyǵynan aıyra otyryp, 8 jyl merzimge bas bostandyǵynan aıyrý jazasy taǵaıyndaldy. Aıta keteıik, sot úkimi zańdy kúshine engen joq.