Bıyldan bastap «Bolashaq» baǵdarlamasy stıpendııasynyń úmitkerlerine qoıylatyn talaptar kúsheıtildi. Endi konkýrstyq irikteýge qatysý úshin úmitkerler shet tilin meńgergenin rastaýǵa tıis.
Kandıdattar ótinim bergen kezde shet tilinen emtıhan tapsyrǵany týraly sertıfıkat usynady. Máselen, aǵylshyn tilinde magıstratýraǵa túsýshiler nátıjesi 9.0-den kem degende 6.0 IELTS, PBT 677-den 498, IBT 120-dan 60 TOEFL sertıfıkattaryn, taǵylymdamadan ótýshiler IELTS 5.0, PBT-417, IBT-35 TOEFL, DET 75 sertıfıkattaryn usynýǵa tıis.
– Bıyl «Bolashaq» baǵdarlamasynyń konkýrstyq irikteý erejeleri jetildirildi. Bul shara kandıdattardyń quramyn sapalyq jaǵynan arttyrý úshin qabyldandy. Sheteldik joǵary oqý ornynyń doktorantýrasyna túsetin qazaqstandyqtardy qospaǵanda, «Bolashaq» úmitkerleri shet tilin meńgerýdiń joǵary deńgeıin rastaýy qajet, – dedi Halyqaralyq baǵdarlamalar ortalyǵynyń basqarma tóraǵasy Oljas Sákenov.
Esterińizge sala keteıik, 2020 jyldan bastap «Bolashaq» stıpendııasyn taǵaıyndaý konkýrsyna jeńildigi bar kandıdattardy qospaǵanda, jetekshi sheteldik joǵary oqý ornynan shartsyz shaqyrýy bar úmitkerler ǵana qatysa alady. Sonymen qatar V1 jáne odan joǵary deńgeıi bar memlekettik tilden emtıhan tapsyrǵany týraly QAZTEST sertıfıkatyn usyný talaby da qoıylady.
Bıyl «Bolashaq» baǵdarlamasy aıasynda 555 stıpendııa bólindi. Onyń ishinde 395 stıpendııa magıstratýra/rezıdentýra, 50 stıpendııa doktorantýra baǵdarlamalaryna úlestirilgen, sondaı-aq taǵylymdamadan ótý úshin 110 stıpendııa bólindi.
Aıta keteıik, qujat qabyldaý jáne konkýrstyq irikteý tolyǵymen avtomattandyrylǵan. Bul halyqaralyq stıpendııa taǵaıyndaý konkýrsynyń ashyqtyǵyn qamtamasyz etedi. Úmitkerler óńirlerden shyqpaı-aq ótinim beredi jáne irikteýdiń barlyq kezeńinen ótedi.