PETROPAVL. 26 maýsym. Soltústik Qazaqstan oblystyq prokýratýrasynyń kezekti májilisinde densaýlyq saqtaý salasyna qatysty nebir óreskel olqylyqtardyń beti ashyldy. Bul týraly egemen.kz tilshisi habarlady.
Aǵa prokýror Rýslan Muqanov baıandaǵandaı, birjarym jyldyń ishinde oblystaǵy medısına mekemelerinde 45 adam kóz jumsa, bulardyń arasyndaǵy keıbir naýqastar dárigerlerdiń biliksizdiginen qaıtys bolǵan.
О́zderiniń mindetterine saldyr-salaq qaraǵany úshin 18 meıirbıkege qatysty qylmystyq is qozǵalǵan. Sondaı-aq, naýqastarǵa jalǵan anyqtama jazyp berý, jeńildikti dári-dármekterdi satyp aldyrtý, jańa qondyrǵylardyń jıi isten shyǵýy jáne olardyń arnaıy maman joqtyǵynan bosqa qańtarylyp turýy sekildi faktiler tirkelgen.
Eń soraqysy, soltústikqazaqstandyq keıbir dárigerler er-azamattardy «tekserý» barysynda tórteýinen tek áıelderde ǵana kezdesetin aýrýdy «tapqan». Atap aıtqanda, úsh naýqasta jatyr moıyny, bireýinen omyraý bezi isigi aýrýyn «anyqtaǵan». Shyndyǵyna kelgende, olardyń bári qulan-taza kúıde bolǵan.
Quzyrly organ ókilderiniń aıtýynsha, osy jerde bir shıkilik seziletin sekildi. О́ıtkeni, skırıngtik tekserilýge múldem kelmegen turǵyndar tizimge engizilip, ár «klıent» úshin memleketten 3 myń teńgeden tólenip otyrǵan.
О́mir Esqalı.
Derekkóz: egemen.kz.
Foto: peopleandcountries.com.