Halyqaralyq fýtbol federasııasy (FIFA) álem chempıonatynyń toptyq kezeńinde Italııa komandasynyń qorǵaýshysy Djordjıo Kellınıdi tistep alǵan Ýrýgvaı quramasynyń shabýylshysy Lýıs Sýarestiń áreketine qatysty sheshim shyǵardy.
О́tken aptadaǵy kezdesý kezinde Kellınıdiń sol jaq ıyǵyn tistep alǵan Sýareske FIFA-nyń tártiptik komıteti ulttyq quramanyń 9 resmı kezdesýine jáne 4 aı kóleminde kez kelgen matchtarǵa qatyspaý týraly jaza qoldanyldy. Sondaı-aq, «Lıverpýldiń» shabýylshysy 100 myń shveısarııalyq frank aıyppul tóleıtin bolady. Basyna qara bult úıirilgen ýrýgvaılyqqa tipti, kez kelgen resmı matchtardy tamashalaýǵa da tyıym salyndy. Biraq Ýrýgvaıdyń fýtbol Assosıasııasy FIFA-nyń bul sheshimine kelispeıtinin, aldaǵy ýaqytta isti qaıta qaraýǵa shaǵymdanatynyn aıtypty.
Esterińizge sala ketsek, buǵan deıin de ýrýgvaılyq shabýylshy óz qarsylastaryna birneshe ret «tis batyryp» kórgen. Ol 2010 jyly Gollandııanyń «Aıaks» komandasynda oınap júrgen kezinde PSV «Eındhovenniń» oıynshysy Otman Bakkaldy tistese, Anglııa chempıonatynda 2013 jyly «Chelsıdiń» qorǵaýshysy Branıslav Ivanovıchtiń ıyǵynan qyrshyp alǵan bolatyn.