Jańa meshitte boldy

Memleket basshysy Nur­sultan Nazarbaev Astanadaǵy Qabanbaı batyr dańǵyly boıynda ornalasqan jańa me­shitte boldy, dep habarla­dy Prezıdenttiń baspasóz qyz­meti. Elbasy Qazaqstannyń barsha musylman qaýymyn qasıetti Ramazan aıymen quttyqtady. –  Bul aıda jurttar, Quran Kárimde ósıet etilgendeı, oraza ustaıdy. Quran qaǵıdattaryna sáıkes, osy aıda adam balasy Allaǵa jaqyndaı túsedi jáne olar meıirim, baqyt, bereke-birlik, toleranttylyq, ózge jandarǵa qaıyrymdylyq jasaý,  kúnálarynan arylý jáne medet tileý jóninde oılanýǵa tıis. Elimizdiń barsha musylmandaryna ulyq Oraza aıynyń synaǵynan súrinbeı ótýdi tileımin, – dedi Qazaqstan Prezıdenti. «Prıgorodnyı» turǵyn alabynda, Arnasaı kóshesi men Qabanbaı batyr dańǵylynyń qıy­lysynda ornalasqan jańa meshitti kórý barysynda Nur­sul­tan Nazarbaev onyń elordadaǵy segizinshi meshit ekenin atap ótti. – Meshit elordamyzǵa ke­le­tin qonaqtar úshin qolaıly. Bo­lashaqta bul meshit tek izgilik pen birliktiń qutty mekeni bolady dep senemin, – dedi Memleket basshysy. Meshittiń jalpy alańy – 1087,6 sharshy metr, jeriniń aý­maǵy – 8 gektar, munarasynyń bıik­tigi – 28,9 metr.  Ǵımaraty  1500 adamǵa laıyqtalǵan.