Senbi kúni álem chempıonatynyń pleı-off kezeńiniń oıyndary bastaldy. Osy kúni Brazılııa quramasy Chılı komandasymen, Kolýmbııa Ýrýgvaı quramasymen kezdesti.
Aldymen Brazılııa – Chılı matchy týraly aıtsaq, kezdesý Belý-Orızontı qalasynda asa qyzyqty jáne tartysty ótti. Bul matchtyń taǵdyryn qosymsha ýaqyttan keıin oıynnyń sońynda beriletin 11 metrlik dop serııasy sheshti. Al oıynnyń ózi 1:1 esebimen teń aıaqtalǵan bolatyn.
Kezdesýde birinshi bolyp esepti 11-mınýtta Davıd Lýıs ashqan. Sodan keıin brazılııalyqtar taǵy dop soǵý úshin shabýyldarǵa shyǵyp, Chılı qaqpasyna qaýip tóndirýmen boldy. Alaıda, bes dúrkin álem chempıondary – «pentakampeondar» matchtyń sońyna deıin qanshama ret shabýyldap, qaýipti jaǵdaıdar jasasa da ekinshi doptaryn soǵa almaı ketti.
Bul kezdesýde Chılı quramasy óte saýatty oıyn órnegin kórsetti. Olar match boıy jaqsy taqtıka ustanyp, ıaǵnı qorǵana júrip der kezinde shabýyldar uıymdastyra bildi. Sonyń nátıjesinde oıynnyń 32-mınýtynda esepti teńestirip ketti. Bul goldy Sanches soqty. Osy esepti kezdesýdiń sońyna deıin eshkim ózgerte almady. Osydan keıin 15 mınýttan eki taımǵa bólingen qosymsha ýaqyt berilip, onda da qarsylastar bir-biriniń osal jerlerin taba almady. Al 11 metrlik penaltı serııasynda Brazılııanyń baǵy jandy.
Bul synda «pentakampeondar» tarapynan Halk pen Vıllıan qatelesse, Chılı komandasynda úsh birdeı oıynshy qaqpany dál kózdeı almady. Jalpy, bul oıynda kópshilik tóreshiniń Brazılııaǵa bolysýy múmkin ekenin aıtqan. Biraq, aǵylshyn Govard Ýebb eshqashan eshkimniń yǵynda ketpeıtinin kórsetip, matchta ádil tórelik jasady.
Kelesi oıynda Kolýmbııa men Ýrýgvaı komandalary kezdesti. Shynyn aıtý kerek, bul kezdesýde Kolýmbııa qarsylasynan barlyq jaǵynan basym boldy. Sóıtip, 2:0 esebimen jeńiske jetti. Olar búkil oıyn boıy alańnyń barlyq jerine ıelik etip, Ýrýgvaıdyń esepti teńestirýdi bylaı qoıyńyz, tipti, bir gol salýyna da eshqandaı múmkindik bermedi. Bul jerde komandanyń matchqa daıyndyǵy óz aldyna, oıynshylarynyń jeńiske degen jigeriniń ózi kózge uryp turdy.
Matchta Ýrýgvaı quramasy keshegi Italııamen ótkizgen oıynynda Lýıs Sýarestiń qorǵaýshynyń sol jaq ıyǵyn qyrshyp alyp, sonyń shýy áli basylmaǵan soń ba, matchqa óte nashar daıyndalǵandaryn baıqatyp aldy. Máselen, olar ekinshi taımnyń sońynda bolmasa búkil ýaqyt Kolýmbııanyń eki golyna mardymdy jaýap qaıtara almady. Qysqasy, olar Kolýmbııadan ádil túrde jeńildi.
Endi Kolýmbııa shırek fınalda Brazılııamen kezdesedi. Bul match 4 shilde kúni Kastelan qalasynda ótedi. Kezdesýde qaı komandanyń jeńetinin aldyn ala boljamaı-aq qoıaıyq. Sonda da Brazılııanyń Kolýmbııany jeńýi qıynǵa soǵatyny aıdaı anyq. Bul oıynda da barlyq másele 11 metrlik penaltı serııasynda sheshilýi yqtımal.
Kelesi kúni, jeksenbide 1/8 fınaldyń taǵy eki kezdesýi ótti. Onda Gollandııa men Meksıka jáne Kosta-Rıka men Grekııa quramalary kezdesti. Bul matchtar da óte qyzyqty jáne tartysty ótti. Ásirese, Gollandııanyń meksıkalyqtardan 1:0 esebimen jeńilip bara jatyp, oıynnyń bitýine eki mınýt qalǵanda eki dop soǵyp, jeńisti sýyryp áketýi tań-tamasha qaldyrdy.
Osy oıynda «Qyzǵaldaqtar» komandasynyń shabýylshysy Aren Robben óziniń naǵyz lıder ekenin kórsetti. Ol 1:0 bolyp jeńilip jatqannyń ózinde komandalastarynyń rýhyn kóterip, qaıta-qaıta shabýyl uıymdastyryp otyrdy. Sondaı bir kezde Sneıderge alystan gol soǵýǵa, al ekinshisinde Meksıkanyń aıyp doby alańyna qulap, 11 metrlik penaltıden Hıýntelardyń dop soǵýyna múmkindik jasady. Bul kezdesýde Gollandııanyń bas jattyqtyrýshysy Lýı Van Gaal da oıynshylardy kerek kezinde aýystyra bildi.
Máselen, Meksıkanyń qaqpasyna ekinshi goldy soqqan da Van Persıdiń ornyna shyqqan Hıýntelar boldy. Jalpy, Gollandııanyń bıylǵy álem chempıonatyna daıyndyǵyn bas barmaqpen baǵalaýǵa bolady. Qazir olar ótken ǵasyrdyń 70-80-jyldarynda belgili jattyqtyrýshy Rınýs Mıhelstiń ustanǵan taktıkasy boıynsha oınap jatyr. Bul taktıka Gollandııanyń 1974, 1978 jyldary álem chempıonatynyń fınalyna shyǵýyna jáne 1988 jyly Eýropa chempıonatyn jeńip alýyna múmkindik bergen. Bul – Rınýs Mıhelmniń totaldy fýtbol degen oıyn ádisi. Onda oıynshylar qysqa pas berip oınamaı, kóbine qorǵanysta oınaı júrip, alystan shabýylshylarǵa pas berip, olardyń ashylyp alystan soqqy jasaýyna jaǵdaı týǵyzady.
Osy kúni 1/8 fınaldyń taǵy bir kezdesýi de óte qyzyqty ótti. Qazir kóp adam álem chempıonatynyń sensasııasyna balap jatqan Kosta-Rıka Grekııany 11 metrlik penaltı serııasynda utyp, óz tarıhynda alǵash ret álemdik dodanyń shırek fınalyna shyqty. Bul kezdesýdiń birinshi jartysynda qos komanda jarytyp oınamasa da ekinshi taımda jankúıerlerge jaqsy oıyn órnegin kórsetti. 15 mınýttyq úzilisten tynyǵyp shyqqan qarsylastar bir-biriniń qaqpasyna bir-birden dop soqty.
Birinshi bolyp Kosta-Rıka múmkindikti jibermedi. Sodan keıin Kosta-Rıkanyń oıynshysy alańnan qýylyp, Grekııa matchtyń aıaqtalýyna bir mınýt qalǵanda esepti teńestirip ketti. Osylaısha, oıynnyń negizgi jáne qosymsha ýaqyty bitken soń penaltı serııasy bolyp, onda Kosta-Rıka shırek fınalǵa joldama aldy.
Endi Kosta-Rıka 5 shilde kúni Gollandııa quramasymen kezdesti. Match Fonte-Nova qalasynda ótedi.
Keshe keshkisin Fransııa men Nıgerııa jáne Germanııa men Aljır komandalary kezdesti.