Astana ákimi Jeńis Qasymbek elordadaǵy sý tapshylyǵy máselesi qashan sheshiletinin aıtty, dep habarlaıdy Egemen.kz.
«Qalanyń ósý qarqyny, ásirese, sońǵy 2-3 jylda aıtarlyqtaı kúrdeli bolyp otyr. Qala turǵyndarynyń sany, ásirese qurylys kezeńinde, 1,5 mıllıon adamǵa jetedi, 1,3 mıllıony qalada resmı tirkelgen, jyl saıynǵy ósim - 70-80 myń, demek, ınjenerlik ınfraqurylym da turaqtamaıdy», dep túsindirdi ákim kásipkerlermen kezdesýden keıin.
Jeńis Qasymbektiń aıtýynsha, úshinshi sorǵy-súzgi stansasynyń qurylysy tamyz aıynda tolyǵymen aıaqtalady.
«Birinshi kezeń mamyr aıynyń sońy - maýsym aıynyń basynda aıaqtalady. Biz qalany qosymsha saǵatyna shamamen 100 myń tekshe metr sýmen qamtamasyz etemiz. Qazir tapshylyq shamamen 30 myń tekshe metrdi quraıdy. Sondyqtan bul stansııa bizge sý tapshylyǵy máselesin sheshýge múmkindik beredi. Aldaǵy birneshe jylda biz osyǵan uqsas tórtinshi stansııanyń qurylysyn bastaýdy josparlap otyrmyz», dedi ol.
Eske salaıyq, 28 naýryzda elordada sý qysymy álsireıtini týraly belgili boldy. Astanalyqtarǵa sýdy utymdy paıdalaný usynyldy. «Astana sý arnasy» baspasóz qyzmeti túsindirgendeı, qala turǵyndarynyń ósýi men elordanyń qarqyndy damýyna baılanysty aýyz sý óndirýge arnalǵan jobalyq qýattardyń tapshylyǵy baıqalady.