Uıym keńistigindegi qaýipsizdik – kókeıkesti másele

Parlament Senaty Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov pen Konstıtýsııalyq zańnama, sot júıesi jáne quqyq qorǵaý organdary komıtetiniń múshesi Dýlat Qusdáýletov Baký qalasynda ótken EQYU Parlamenttik Assambleıasynyń HHIII sessııasyna qatysty, dep habarlady Senattyń baspasóz qyzmeti. Qazaqstan parlamenttik dele­ga­sııasynyń quramyna Májilis depýtattary – Halyqaralyq ister, qorǵanys jáne qaýipsizdik komıtetiniń múshesi Qýanysh Sultanov pen Agrarlyq máse­leler komıtetiniń múshesi Svetlana Qa­dyralıeva da engen bolatyn. Jyl saıynǵy sessııanyń ashylýynda  forýmǵa qatysýshylar aldynda Ázerbaıjan prezıdenti Ilham Alıev, EQYU PA tóraǵasy Ranko Krıvokapıch, Ázerbaıjan parlamentiniń tóraǵasy Oktaı Asadov, EQYU-nyń Is basyndaǵy tóraǵasy Dıde Býrkhalter quttyqtaý sóz sóıledi. Sondaı-aq, Reseı Memlekettik dýmasynyń tóraǵasy Sergeı Naryshkın men Ýkraına Joǵarǵy radasy tóraǵasynyń orynbasary Rýslan Koshýlınskııge de sóz berildi. Saıası máseleler jáne qaýipsizdik jónindegi jalpy komıtettiń otyrysynda senator I.Adyrbekov sóz sóıledi. Bul sessııadaǵy «Helsınkı+40: maqsat – ár adamnyń qaýipsizdigi» taqyrybynyń ózektiligin atap óte kelip, senator qaýipsizdik pen yntymaqtastyqtyń ótkir máselelerin ashyq talqylaýǵa jáne sheshimin izdeýge bolatyn EQYU men basqa da halyqaralyq uıymdar jumysynyń mańyzdylyǵyna toqtaldy. Ol,sondaı-aq, Qazaqstannyń únqatysý jáne ózara is-qımyl qalyptastyrýda syndarly ról atqarýǵa umtylysyn atap ótti. Osyǵan baılanysty, onyń aıtýynsha, bizdiń elimiz Ortalyq Azııa elderinen alǵashqy bolyp BUU Qaýipsizdik Keńesiniń quramyna 2017 jyly enýge nıettenip otyr. Sondaı-aq, parlamenttik forým alańdarynda ekstremızm, radıkalızm jáne jatsynýdyń arta túsýi, Ýkraınadaǵy jaǵdaı máselelerine arnalǵan arnaıy pikirsaıystar boldy. Sessııa aıasynda qazaqstandyq delegasııa músheleri UQShU, TúrkPA elderindegi resmı emes kezdesýlerge qatysyp, Assambleıanyń basshy quramymen jáne onyń Halyqaralyq hatshylyq quramymen, sondaı-aq, EQYU elderiniń 15-ten astam ulttyq delegasııalar ókilderimen kezdesti. Sessııanyń qorytyndysynda EQYU PA-nyń Baký deklarasııasy qabyldandy.