ASTANA. 9 shilde. Sońǵy 6 aıdyń ishinde elimiz boıynsha egov.kz elektrondyq úkimet portaly arqyly 17,4 mln. jýyq elektrondyq qyzmet kórsetilgen. Bul týraly i-news.kz habarlady.
Elektrondyq úkimet tarapynan usynylǵan qyzmetterdiń ishinde jyljymaıtyn múlikke (2,9 mln. anyqtama) jáne zeınetaqy aýdarymdaryna qatysty (2,4 mln. anyqtama) anyqtamalar alýǵa kóp suranys bolǵan.
Budan bólek, egov.kz arqyly balabaqshadan kezek alý úshin 100 myńnan astam adam portal qyzmetine júginse, 32 jup nekelerin tirkeýge elektrondyq ótinish bergen.
Portal arqyly elektrondyq tólemderdi qabyldaý sany da artýda. Máselen, alǵashqy 6 aıda 924 mln. teńge kóleminde túrli tólemder portal arqyly tıisti esep-shottarǵa aýdarylǵan.
Sonymen qatar, birinshi jartyjyldyq boıynsha egov.kz-ge 727 myń jańa paıdalanýshy tirkelgen. Olardyń 16,5 myńy zańdy tulǵalar.
Qazirgi tańda elimizdiń úkimettik egov.kz portalynda barlyǵy 570 elektrondyq qyzmet pen ınteraktıvti servıs qyzmeti qoljetimdi.
Esterińizge sala keteıik, 2014 jyldyń maýsym aıynda jarııalanǵan elektrondyq úkimet damýynyń deńgeıi boıynsha Birikken Ulttar Uıymynyń reıtınginde elimiz 193 eldiń arasynda 28-orynǵa ıe boldy. Osynyń arqasynda respýblıkamyzǵa elektrondyq úkimet boıynsha jahandyq forým ótkizýge quqyq berildi. Bul jıyn 2014 jyldyń 6, 7 qazanynda elordada ótedi dep kútilýde.
Joldybaı Bazar.
Derekkóz: i-news.kz.
Foto: diapazon.kz.