Atyraý kedenshileri alty aıda el qorjynyn 203 mıllıard 886 mıllıon 788 myń teńge kirispen tolyqtyrdy
Bıýdjet qorjynyn tolyqtyratyn salanyń biri – keden. Osy oraıda Atyraý oblysy boıynsha kedendik baqylaý departamenti kedendik tólemder men salyqtar túsimi boıynsha berilgen jospardy únemi artyǵymen oryndap keledi. Máselen, bıylǵy birinshi jartyjyldyqta atalǵan departament ujymynyń josparly tapsyrmasy artyǵymen oryndaldy. Jyl basynda berilgen josparly tapsyrma – 202 mıllıard 868 mıllıon 974 myń teńge bolsa, naqtysynda bıýdjetke aýdarylǵany – 203 mıllıard 886 mıllıon 788 myń teńgeni qurap otyr.
Kedennen de kenen kiris túsirýde óz mindetterin adal ári jaýapkershilikpen atqaratyn Atyraý kedenshileriniń bul tabysyn 2013 jyldyń uqsas kezeńimen salystyrǵanda, kedendik tólemder men salyqtardyń túsýi 75 mıllıard 372 mıllıon 274 myń teńgege artqany baıqalady. Demek, ortaq iste ár kedenshiniń úlesi bar ekenin atap ótken oryndy bolmaq.
Joldasbek ShО́PEǴUL,
«Egemen Qazaqstan».
Atyraý oblysy.