Shymkent pen Túrkistan qalalaryndaǵy Nazarbaev zııatkerlik mektepteriniń oqýshylary óz oqý ornynyń aınalasyna jemis aǵashtaryn ekti.
Qorshaǵan ortany qorǵaý, ózender men ormandardy tazartý, aǵash otyrǵyzý, qoqystardy suryptaýǵa úıretý jónindegi «Birgemiz: Taza Álem» jalpyulttyq jobasyn iske asyrý aıasynda «Áleýmettik jobalar qory» KQ jemis aǵashtaryn otyrǵyzý aksııasyn uıymdastyrdy. Oǵan Shymkent qalasynyń fızıka-matematıka baǵytyndaǵy jáne Túrkistan qalasynyń hımııa-bıologııa baǵytyndaǵy Nazarbaev zııatkerlik mektebiniń oqýshylary, sondaı-aq eriktiler qatysty.
«Bizdiń is-shara Dúnıejúzilik jer kúnin merekeleýge oraı ótkizildi. Aksııaǵa qatysýshylar mektep aýmaqtaryn kógaldandyrýǵa óziniń úlesin qosýdy jón kórdi. Osylaısha, biz jas urpaq arasynda ekologııalyq mádenıetti qalyptastyryp, jastardyń qorshaǵan ortaǵa, jer-anaǵa degen súıispenshiligin arttyrǵymyz keledi.
Bolashaqta osy mektepterdiń oqýshylary bizdiń eriktilerge óz aýlasyndaǵy baqshalar úshin rıza bolady dep úmittenemiz», deıdi «Birgemiz: Taza Álem» jobasynyń jetekshisi Erbol Keńgirbaev.
Aksııa qorytyndysy boıynsha Túrkistandaǵy hımııa-bıologııalyq baǵyttaǵy zııatkerlik mekteptiń aýmaǵynda balalar alma, almurt shabdaly, órik jáne shıe aǵashtarynyń 100 talyn, shymkenttik oqýshylar 50 kóshetti otyrǵyzdy.
Eske salaıyq, qorshaǵan ortany qorǵaý, ózender men ormandardy tazartý, aǵash otyrǵyzý, qoqystardy suryptaýǵa úıretý jónindegi «Birgemiz: Taza Álem» jobasy Aqparat jáne qoǵamdyq damý mınıstrliginiń qoldaýymen júzege asyrylady. Ony iske asyrý 2022 jyly bastalyp, 2024 jyldyń sońynda aıaqtalady. Úsh jyldyń qorytyndysy boıynsha jobaǵa 8 myńnan astam erikti tartylady dep josparlanyp otyr.