Álemdik brend sanalatyn Genrı E.Steınveıdiń kúısandyǵynyń tarıhyna kóz júgirtseń, eki ǵasyrǵa taıaý ýaqytty qamtıdy. Sodan bergi kezeń ishinde Gambýrg pen Nıý-Iorkte shamamen 600 myńǵa taıaý pıanıno jasalypty. Álemdegi ataqty pıanısterdiń 98,9 paıyzy konserttik zaldarda Genrı E.Steınveıdiń kúısandyǵyn tańdaıdy eken. Bul aspaptyń estetıkalyq talǵamyna saı 125-ten astam ónimi patenttelgenin de eske sala ketsek deımiz. Kúısandyqty shyǵaratyn «Steinway&Sons» kompanııasynyń ókildigi elordada ashyldy. Onyń ashylý saltanatyna Qazaqstannyń halyq ártisi, tórtkúl dúnıege tanymal Aıman Musaqojaeva men Vengrııanyń tuńǵysh ǵaryshkeri Bertalen Farkash qatysty.
Alǵashqy sózdi alǵan Aıman Musaqojaeva: «Astana Opera» teatrynyń janynan oryn tepken ókildiktiń ashylýy el ómirindegi aıtýly oqıǵa ekenin jetkizip, bul jumysty iske asyrǵan T.Bıtýovaǵa iltıpat tanytty. Álemniń kóptegen elderi osy kúısandyqty joǵary baǵalaıtynyn naqty mysaldarmen alǵa tartyp, «Bul brendtiń qazaq topyraǵynan, onyń ishinde elordadan oryn alýyn men elge degen qurmet dep bilemin. Mundaı kúısandyq bizdiń oqý ornynda da sanaýly. Endigi jerde osy saz áýeniniń sapasyn arttyratyn kúısandyqpen ónerge umtylǵan ár azamat kelip tanysady, «myń estigennen – bir kórgen artyq» ekenin biletin bolady», dedi. Al ǵaryshker Bertalen Farkash «Steinway» kompanııasy ókildigin ashý kez kelgen elge buıyra bermeıtin baqyt ekenin tilge tıek etip, óziniń estı salyp, atbasyn burǵanyn, tórtkúl dúnıege tanymal S.Rahmanınov, N.Petrov, A.Rýbınshteın, taǵy da basqa alyptardyń bul kúısandyqta qubyltyp án áýeletkenin atap ótti. Sol sekildi kompanııanyń Ortalyq jáne Shyǵys Eýropadaǵy menedjeri A.Vılgelm óner barlyq jurtqa ortaq ekenin, sol ónerdi óristetetin mýzykalyq aspaptyń erekshe ornyn tarata aıtyp, minsiz aspapta oınaý ár mýzykanttyń alǵa qoıǵan maqsaty bolatynyn jetkizdi. «Bul ortalyqqa kásibı mýzykant ta, ónerden habary bar astanalyq azamattardyń qaı-qaısysy da kelip kúısandyqta oınaýyna bolady. Biz aldaǵy ýaqytta eki bólmege qoıylǵan kúısandyqtarda túrli óner keshterin, baıqaýlar ótkizýge múmkindik jasaımyz. Ásirese, jas urpaqqa ár kez esik ashyq» dese, ortalyqtyń atqarýshy dırektory, elordadaǵy О́ner ýnıversıtetiniń túlegi, Italııadaǵy Santa-Chechılııa konservatorııasynda akademııalyq taǵylymnan ótken, halyqaralyq baıqaýlardyń birneshe ret júldegeri Zere Tólegenova resmı bólimnen keıin kúısandyqta sheteldik jáne otandyq kompozıtorlardyń týyndylaryn oryndap, erekshe rızalyqqa keneldi. Munda qazaq kompozıtory Qýat Shildebaevtyń «Konserttik kúı» atty týyndysy erekshe estildi.
Súleımen MÁMET,
«Egemen Qazaqstan».
Sýretterdi túsirgen Arman OSPANOV.