Prokýrordyń mindeti – aıyptaý emes

Forýmdy ashqan Bas prokýror Berik Asylov Memleket basshysynyń prokýratýra organdaryna qylmystyq pro­sestegi zańdylyqty qamta­masyz etýde erekshe jaýap­kershilik júkteletini týraly tapsyrmasyn atap ótti. Son­daı-aq bul is-shara sot pro­sesinde memleket múddesiniń fýnksııasyn tıimdi júzege asyratyn, joǵary bilik­ti, tájirıbeli prokýrorlardy daıyndaýdyń tetikterin ázir­leýge arnalyp otyrǵanyn aıtty.

– Búginde memlekettik aıyp­taýshylardyń azamattardyń quqyn qorǵaýshy retindegi róline erekshe nazar aýdarylyp keledi. Prokýrorlar tek aıyptaý ustanymynda bolmaýy qajet. Olardyń negizgi maqsaty – sotqa kúdiktiniń kináli nemese kinásiz ekendigin anyqtaýǵa kómek berý. Mem­lekettik aıyptaýshy sotta ádil, obektıvti jáne beıtarap bolýǵa mindetti, – dedi ol.

Prezıdent Ákimshiligi jete­kshisiniń orynbasary Er­jan Jıenbaev, Joǵarǵy sot tóraǵasy Aslambek Merǵa­lıev jáne basqa da forým­ǵa qatysýshylar sóz alyp, kóterilip otyrǵan taqyryp aıasynda óz pikirlerin ortaǵa saldy.

– Memlekettik aıyptaý – qylmystyq sot isin júrgizýde zań ústemdigin qamtamasyz etý­diń bir elementi. Mem­leket basshysy tapsyrmasyna sáıkes, ádildik men báse­ke­lestikti qamtamasyz etetin qylmystyq sot isin júrgizýdiń ońtaıly modelin aıqyndaý boıynsha belsendi jumys júrgizilip keledi. Sonyń arqasynda sońǵy jyldary bul salada eleýli ózgerister bar. Qylmystyq prosestiń úsh býyn­dy modeli engizilip jatyr. Soǵan sáıkes barlyq negizgi prosessýaldyq sheshimder prokýrorlyq súzgi arqyly ótedi, – dedi Erjan Jıenbaev.

Qylmystyq prosestegi taraptardyń básekege qabilet­tiligin arttyrý problemalary, alqa bıler soty ınstıtýtyn keńeıtý jáne qylmystyq sot óndirisindegi ózekti máseleler boıynsha sottar, advokattar, zańgerler jáne prokýror­lar baıandama jasady. Forým qory­tyndysy boıynsha mem­lekettik aıyptaýdyń sapasyn jáne tıimdiligin arttyrýdyń usynystary daıyndaldy.

Is-sharanyń ekinshi kúni Quqyq qorǵaý organdary akademııasynda arnaıy shaqy­rylǵan qonaqtar úshin trenıngter men dárister ótedi.