Aımaq máselesi – depýtattar qaperinde

Májilis depýtaty, «Aýyl» par­tııa­synyń múshesi Qaraqat Ábden de­pýtattardyń óńirlerge sapar bary­synda Aqmola jáne Qaraǵandy oblys­taryndaǵy aýyldarǵa baryp, halyq­tyń jaı-kúıimen tanysty.

Depýtattyń aıtýynsha, jaýyr bolǵan jol jáne ınternet máselesi Qaraǵandy oblysyndaǵy Nura aýdanyndaǵy Jan­bóbek aýylyn da aınalyp ótken joq. Sonymen qatar depýtat atalǵan aýyl ınternetten de tys qalǵanyn atap ótip, jol taýqymetinen bólek, uıaly baılanystyń joqtyǵy da turǵyndardy sarsańǵa salatynyna nazar aýdardy. Halyqtyń turmys-tirshiligimen etene tanysqan depýtat halyqty jaryq máselesi de alań­datyp otyrǵanyn jetkizdi.

Depýtat Qaraǵandy oblysy Nura aýdanyndaǵy Qulanótpes aýylynyń tur­ǵyndarymen kezdesti. «Halyqty tol­ǵandyrǵan negizgi másele – taza aýyz sý, sa­paly jol, qoljetimdi baılanys. Ásirese sý máselesin basty nazarǵa aldym. Sebebi buǵan bıýdjetten qyrýar qarjy bólingen. «Life Story Invest» JShS merdigerlik uıy­­mymen, «Kazahstanskıe tehnologıı» JShS qosalqy merdigerlik uıymymen shart jasaldy. Tenderge qatysýǵa kelgende bilek sybana kirisken merdigerler iske kelgende baıaý qımyldap, halyqtyń ashýyna tıip otyr», dedi Q.Ábden.

* * *

Senator Ásem Rahmetova Soltústik Qazaqstan oblysyn aralady. Depýtat Esil aýdanyna sapar barysynda jer­gilikti aýrýhananyń emdeý korpýsyn jóndeý barysymen tanysty.

Munda shatyrdy jóndeý jáne tereze jaqtaýlaryn aýystyrý jumystary júrip jatyr. Bul sharalarǵa 97 mıllıo­n teńgeden astam qarjy bólingen bolatyn. Jóndeý jumystary osy jyldyń qyrkúıegine deıin aıaqtalady dep jos­parlanǵan. Senator aýyl turǵyndarymen kezdesý barysynda sýmen jabdyqtaý, jol­dardy jóndeý jáne ınternetke qol­jetimdilikti qamtamasyz etýge qatysty ózekti máselelerdi talqylady.

«Búgingi kezdesýde «Petropavl – Jez­qazǵan» avtojolynyń jaǵdaıy nashar ekeni atap ótildi. Soltústik Qazaqstan oblysyndaǵy uzyndyǵy 359 shaqyrym bolatyn magıstraldyń osy ýchaskesinde shuńqyrlar jóndeldi, biraq joldyń jaı-kúıi ortasha jóndeýdi qajet etedi. Bul shynymen ózekti másele. Biz onyń she­shilýine járdemdesýge tyrysamyz», dedi senator Ásem Rahmetova.

О́ńir turǵyndary kezdesý barysynda suraqtar qoıyp, memlekettik járdemaqylardy esepteý erekshelikteri men zeınetaqy aýdarymdaryn tóleý tártibin jáne basqa da máselelerdi tú­sindirýdi ótindi.

* * *

Májilis depýtaty Samat Musa­baev Mańǵystaý oblysyndaǵy Jańa­ózen qalasynda «Korkem Alem» et kombınatynyń jumysymen tanysty. Kezdesý barysynda depýtat kombı­nattyń adal ónim shyǵaryp, sapaly qyzmet kórsetýine nazar aýdardy.

Kombınat qyzmeti barlyq sanıtarlyq talaptarǵa saı jumys istep, mal soıý, et óńdeý talaptary saqtalyp, avtomattandyrylǵan júıe negizinde jumys isteıdi. Munda aı saıyn 360 tonna et shyǵarylyp, 100 tonna et ónimi óndiriledi. Etten jasalatyn jartylaı fabrıkat ónimderi, delıkatester jáne as úıge qajet ózge de ónimder bar.

«Búgin «Korkem Alem» kombınaty halyqqa adal ónim usynyp, sapaly taýar óndirýge qanshalyqty mán berip otyrǵanyn, ózge kásipkerlermen qandaı baılanys ornatyp jatqanyn nazarǵa aldym. Sondaı-aq kásipkerlerdiń etti qaıdan alyp jatqanyna, jergilikti bıliktiń qoldaý sharalaryna zer saldym», dedi S.Musabaev.

* * *

Senatorlar Altynbek Nuhuly men Ernur Áıtkenov Pavlodar oblysyna baryp, óńirdiń áleýmettik-ekonomıkalyq damý kórsetkishterimen tanysý úshin aı­maq basshylyǵymen kezdesti.

Depýtattar Pavlodar qalasyndaǵy №2 jylý energetıkalyq ortalyǵyna da bardy. Qalanyń JEO 1961 jyly paıdalanýǵa berilgen bolatyn. Onyń jylytý maýsymyna daıyndyǵy máselesi erekshe baqylaýda tur.

Senatorlar JEO-daǵy óndiris jumysymen tanysty jáne salalyq seh­tarda bolyp, Ekibastuzdaǵy ótken jylǵy tótenshe jaǵdaıǵa uqsas avarııa­lardy boldyrmaý úshin jumystardy jandandyrýdyń mańyzdylyǵyn atap ótti.

Kezdesý barysynda senatorlarǵa №2 Pavlodar JEO-da jylytý qazandyqtary men týrbınalarǵa josparly jóndeý júrgizilip jatqany jáne aldaǵy maýsymǵa barlyq qyzmetter qoıylǵan mindetterdi ýaqtyly oryndaýǵa tıis ekendigi týraly aqparat aıtyldy.

* * *

Májilis depýtattary Baýyrjan Smaǵulov pen Arman Qalyqov Balqash qalasyndaǵy «Qazamys Enerdjı» JShS bardy. Onda aldaǵy jylytý maý­symyna daıyndyq jumystaryn tal­qylady. Eńbek ujymymen kezdesýde Ar­man Qalyqov jabdyqty jańartý máselesin kóterdi.

«О́zderińiz biletindeı, qysta bolǵan tótenshe jaǵdaı Ekibastuzda jylý jelileriniń, onyń ishinde jylý elektr ortalyqtarynyń jabdyqtarynyń tozǵanyn kórsetti. Búginde elimizdiń barlyq Jylý elektr ortalyqtarynyń eskirgen jabdyqtaryn jańartý qajet. Menshik ıeleri úshin bul baǵyttaǵy ju­mysty jandandyrýy mańyzdy», dedi depýtat.

Kezdesý barysynda ujym qyzmet­kerleri ózderin tolǵandyrǵan suraqtardy alǵa tartyp, naqty jaýap aldy. Odan ári depýtattar Balqash mys balqytý zaýy­tynyń tynys-tirshiligimen, qalany abattandyrý barysymen tanysyp, aza­mattardyń ótinishi boıynsha qoǵamdyq qabyldaý ótkizedi.

* * *

Májilisi depýtaty, Palata tór­aǵasynyń orynbasary Albert Raý Qostanaı oblysyndaǵy Beıimbet Maı­lın aýdanynyń aýyldaryna ba­ryp, taza aýyz sýmen qamtý jumys­tarymen tanysty.

Myńnan astam turǵyny bar Asen­krıtovka aýylynda aýyz sý qubyrlary jańartylyp, Krasnoselskoe aýylyndaǵy sý qubyrynyń qurylysy jýyq arada aıaqtalýy josparlanyp otyr. Jobanyń jalpy quny 740 mln teńgeni quraıdy. Aýyl turǵyndary sý tapshylyǵy máse­lesinen arylyp, sapaly aýyz sýǵa qol jet­kizderin aıtyp, rızashylyqtaryn bildirdi.

Albert Raý odan ári «Qostanaı – Qarabutaq» baǵytyndaǵy respýblıkalyq mańyzy bar joldyń jóndeý jumys­tarymen tanysty. Depýtattyń aıtýynsha, qazirgi tańda aýyldyń áleýetin kóterý maqsatynda «Aýyl – el besigi» jobasy júzege asyrylyp jatyr.

«Respýblıkalyq bıýdjetten qarjy­landyrylǵan nysandardyń jumy­sy árdaıym depýtattar baqylaýynda. Ásirese, aýdandardyń, shalǵaı aýyldardyń áleýmettik ahýaly basty nazarda bolady. Odan bólek jańa jobalar boıynsha da halyq arasynda túsindirý jumystaryn da júrgizip jatyrmyz», dedi A.Raý.

* * *

Senat depýtaty Sergeı Ershov Qa­ra­ǵandy oblysynda bolyp, jer­gi­lik­ti turǵyndarmen, máslıhat de­pýtat­tarymen jáne saılaýshylarmen kez­desti.

Júzdesý barysynda senatorǵa orman alqaptarynda, eldi mekenderde jáne oblystyń dalalyq aımaqtarynda órtke qarsy qaýipsizdikti uıymdastyrý jóninde júrgizilip jatqan jumystar týraly jan-jaqty baıandaldy. Sondaı-aq órt sóndirý bólimderiniń jańa pýnktteri men olardyń jabdyqtalý deńgeıi tanystyryldy.

Qatysýshylar kezdesý barysynda Qarqaraly ulttyq tabıǵı parkindegi órt qaýipsizdigine qatysty ózekti máselelerdi talqylady. Eń aldymen, materıaldyq-tehnıkalyq bazany qarjylandyrý deńgeıiniń tómendigi men ulttyq park qyzmetkerleri jalaqysynyń azdyǵyna baılanysty máseleler aıtyldy.

Depýtat sonymen qatar Qaraǵandy oblysy ákimdigi janyndaǵy aýmaqtyq qorǵanys jónindegi áskerı bólimde de boldy. Sergeı Ershov áskerdiń ornalasqan jerin kórip, áskerı qyzmetshilermen áńgimelesti jáne osy bólimniń qyzmetimen tanysty.

Áskerı bólimniń basshysy óz kezeginde aýmaqtyq qorǵanysty uıymdastyrý jó­nindegi josparlar men alda turǵan min­detter týraly baıandady. Senator óńir­ge sapardyń sońynda Qa­ra­ǵandy oblys­tyq máslıhatynyń tóraǵasymen kezdesti. Taraptar óńirdegi ózek­ti másele­lerdi jáne olardy zań jú­zinde sheshý joldaryn talqylady.