L.N.Gýmılev atyndaǵy Eýrazııa ulttyq ýnıversıtetiniń aqparattyq tehnologııalar fakýltetiniń oqytýshysy Nurzada Amangeldi qazaqsha ymdaý tilin tanýdyń ıntellektýaldy júıesin jasap shyǵardy. Biregeı ázirleme erekshe qajettilikteri bar adamdarǵa arnalǵan.
Talantty ǵalym osy baǵytta bes jyldan beri zertteý júrgizip keledi. Ǵylymı joba jasandy ıntellektke negizdelgen jáne sóıleý men estý qabileti buzylǵan jandarǵa arnalǵan. Sondaı-aq júıe qazaqsha ymdaý tiline beıimdelgen. Muny onyń negizgi biregeıligi dep aıtýǵa bolady. Júıeni ázirleý barysynda ǵalym bir ymnyń birneshe nusqasyn daıyndaǵan. Olardy kórsetilý kúrdeliligi boıynsha toptarǵa bólip, árqaısysyna jasandy neırondy jeli modelin ázirlegen.
– Bolashaqta bul júıe arqyly ym álipbıi men ym tilin biletin sýrdoaýdarmashylardy daıarlaı alady. Mundaı mamandar túrli memlekettik uıymǵa qajet ekeni anyq. Endi biz mobıldi qosymsha jasaýǵa kiristik. Onyń kómegimen ym tilimen ózara sóılesýge bolady. Sóıleýdi mátinge, mátindi ymǵa jáne kerisinshe túrlendiretin júıe qurylady. Osy jobanyń arqasynda erekshe qajettilikteri bar adamdardyń mektepte yńǵaıly oqyp, medısınalyq jáne memlekettik mekemelerde qyzmet alýy jáne erkin sóılesýi óte mańyzdy. Bir jaǵynan, osy taqyrypty zerttep, óz úlesimdi qosý – azamattyq boryshym, – dedi ol.
Zertteý nátıjesi boıynsha Nurzada Amangeldi avtorlyq kýálikke ıe bolyp, álemdik reıtıngi joǵary jýrnaldarda úsh maqalasyn jarııalady. Byltyr ǵalym Eýrazııa ulttyq ýnıversıtetiniń «Jana Asu» ishki granttyq qarjysyna ıe boldy.
– «Qazaqstandyq sańyraýlar qoǵamy» qoǵamdyq birlestiginiń vıse-prezıdentimen kezdeskende, olardyń balalardy oqytýǵa qatysty túıindi máseleleri bar ekenin bildim. Qazaqsha jáne basqa tilder boıynsha ymdaý tilin úıretýge arnalǵan zııatkerlik trenajer atalǵan qoǵamdaǵy estý qabileti buzylǵan balalarǵa úlken kómek kórsete alatyn qajettilik sanalady. Mundaı oqytý júıesi jetkinshekterge ymdaý tilin úırený men qorshaǵan ortada baılanys jasaýdy úırenýge múmkindik beretin tıimdi qarym-qatynas quraldarymen qamtamasyz etedi. AQSh pen Qazaqstan ǵalymdarynyń bir toby elimizdegi estý jáne sóıleý qabileti buzylǵan adamdarǵa bilim berý jáne oǵan qoljetimdilik salasynda birqatar zertteýdi bastady. Bizdiń birlesken jumysymyz elimizde ǵana emes, Ortalyq Azııada paıdasy zor aýqymdy ǵylymı jobaǵa aınalady dep senemiz, – dedi ǵalym.
Sonymen qatar N.Amangeldi árbir ǵylymı jobanyń maqsaty aldymen adamǵa, qoǵamǵa, qorshaǵan ortaǵa kómektesý ekenin atap ótti. Endi bilikti ǵalym óziniń ǵylymı ázirlemesin kommersııalandyrýdy qolǵa almaq.