«Aýyl – el besigi» jobasy aıasynda Jambyl oblysynda qolǵa alynǵan jumystyń aýqymy zor. Máselen, bıyl 98 eldi mekende 301 jobany júzege asyrý maqsatynda 15,7 mıllıard teńge qarajat qarastyrylǵan. Bólingen qarajat esebinen 56 nysannyń qurylysyn júrgizý josparlanǵan edi.
Turar Rysqulov aýdanyna qarasty Kógershin aýylynyń turǵyndary eldi mekende derbes aýyldyq klýb joqtyǵyn jyldar boıy aıtyp júretin. Osy jyly eldi meken turǵyndarynyń tilegi oryndaldy. «Aýyl – el besigi» jobasy aıasynda 106 mıllıon teńge qarajat bólinip, 90 oryndyq mádenıet úıi salyndy.
«Aýdannyń mádenıet salasyn órkendetýge aıryqsha den qoıyp otyrmyz. Sońǵy úsh jyldyń bederinde «Aýyl – el besigi» jobasy aıasynda 4 mádenıet nysany jóndeýden ótti. Sondaı-aq ótken jyly qurylysy bastalǵan Kógershin aýylyndaǵy klýb paıdalanýǵa berilip otyr. Osylaısha, aýdandaǵy halyq tyǵyz ornalasqan eldi mekenderdiń biriniń máselesi sheshildi.
Jalpy alǵanda aýdannyń 2027 jylǵa deıingi damý josparyna sáıkes alty aýylda mádenıet úıi men klýb boı kóteredi dep josparlap otyrmyz», deıdi Turar Rysqulov aýdany ákiminiń mindetin ýaqytsha atqarýshy Erǵazy Espenov.
Kógershinde aýyldyq klýb ýaqytynda jekeniń qolyna ótip ketkeni belgili. Qysqasy, uzaq jyldar boıy eldi mekendegi mádenı nysan japsarlas ǵımaratta ornalasqan bolatyn. «Aýyl – el besigi» jobasy aıasynda aýyldyqtardy alańdatqan másele ońynan sheshilgeni – quptarlyq qadam.
«Aýylymyzda talantty jastar az emes. Jańa klýbtyń salynǵanyna bek qýanyshtymyz. Endi osy mádenıet nysanynda túrli úıirmeler ashylyp, talantty balalarymyzdyń talabyn ushtaı tússe degen tilegimiz bar», deıdi aýyl turǵyndary.
Jambyl oblysy,
Turar Rysqulov aýdany,
Kógershin aýyly