Batys Qazaqstan oblysynyń Terekti aýdany 90 jyldyǵyn atap ótti. Jeke aýdan bolyp shańyraq kótergen mereıtoıyn jergilikti halyq eńbek adamdaryn marapattap, at shaptyryp, balýan kúresin ótkizdi.
Árıne, Jaıyq ózenin jaǵalaı jatqan bul ólkeniń tarıhy tym tereńde. Altyn kıimdi áıgili Taqsaı hanshaıymy osy jerden tabylǵan. Kishi júzdiń ákeli-balaly bıleýshisi Aıshýaq pen Jantóre handardyń zıraty da osy topyraqta jatyr. Ataqty Marabaı jyraý men Ábýbákir Kerderiniń de týǵan jeri – Terekti. HH ǵasyrdyń basynda qarashekpendiler qaptap, quıqaly jerge jappaı qonystansa, «tyń ıgerý» degen túrenniń astynda da biraz tarıh jyrtylyp ketti. Biraq Táýelsizdik tańy atqaly atajurttyń arǵy-bergisi túgendelip, el de, jer de jańasha túlep kele jatqany ras.
– Torqaly 90 jyldyqta aýyz toltyryp aıtatyn jetistigimiz jeterlik. Toǵyz joldyń torabynda ornalasqan bizdiń aýdan qaı kásippen de shuǵyldanýǵa qolaıly meken. Aýmaǵyndaǵy 15 okrýgte 40 myńǵa tarta turǵyn, 29 ult ókili tatý-tátti ómir súredi. Aýdan boıynsha 24 eldi meken aýyz sýmen, 96 paıyz aýyl gazben qamtylǵan. Bıyldyń ózinde 25 shaqyrym jol jóndelip jatyr, 4 mektep salynyp, 3 jańa medısınalyq nysan boı kóterdi. 23 otbasy jańa páter ıesi atansa, 38 turǵyn úıdiń qabyrǵasy qalandy. Aýdannyń aýyl sharýashylyǵy salasy da qarqyndy damyp keledi. Qazirgi kezde mal sany aıtarlyqtaı ósý ústinde. Bul – óńirdegi ózgeristerdiń bir parasy ǵana. Jyl saıyn aýdanymyzda jańa jobalar men ıgi ister júzege assa, eldiń tynyshtyǵy men turaqtylyǵynyń arqasy, – dedi Terekti aýdanynyń ákimi Álııa Muhanbetjanova.
Bul kúni týǵan jerdiń toıyna alys-jaqynnan mártebeli meımandar da aǵylyp kelipti. Sonyń biri – osy óńirdiń týmasy, aqyn, Memlekettik syılyqtyń laýreaty, Qazaqstannyń eńbek sińirgen qaıratkeri, «Qurmet» jáne «Otan» ordeniniń ıegeri, Aqjaıyqtyń aq shaǵalasy Aqushtap Baqtygereeva. Sahna tórinen:
«Kólderiń tunyq, móp-móldir,
Jaǵasy jasyl, jelek-ti.
Tógilip turǵan kókten nur,
Sulýsyń qandaı, Terekti!» dep tebirene jyr oqyǵan aqynnyń óńirine Terekti aýdanynyń 90 jyldyǵyna oraı arnaıy daıyndalǵan tósbelgi taǵyldy.
Qazaqstan Respýblıkasy Bilim berý isiniń úzdigi, Jazýshylar odaǵynyń múshesi, aqyn Darıǵa Mushtanova men kompozıtor, «Daryn» memlekettik jastar syılyǵynyń laýreaty, Mádenıet salasynyń úzdigi, «Qurmet» ordeniniń ıegeri Erkin Nurymbetovtiń shyǵarmashylyq odaǵynan týǵan «Terekti valsi» ashyq aspan astynda oryndalyp, jınalǵan jurtty tánti etti.
Osy kúni uzaq jyldar boıǵy jemisti qyzmeti úshin «Qazposhta» Terekti aýdandyq fılıalynyń kassa meńgerýshisi Valentına Anıshenko, aýdandyq polısııa bólimi jergilikti polısııa qyzmeti bólimshesiniń bastyǵy Qanat Jaqybaev, Aqjaıyq aýyldyq okrýgi ákimi Bolat Aleksandruly, Prırechnyı aýyldyq okrýgi ákimi Meırambek Jaqsybekuly, Terekti REK bas ınjeneri Damır Myrzabaev, «Terekti-Taza sý» JShS ınspektory Aqmaral Erkinqyzy, aýdandyq balalar men jasóspirimder sport mektebiniń jattyqtyrýshysy Erlan Saǵynalın syndy úzdikter oblys ákimi Narıman Tóreǵalıevtiń Alǵyshatymen marapattaldy.
Kópshilik is-shara Terekti aýdanyndaǵy halyqtyq «Dat» teatry ártisteri qoıǵan tarıhı kórinistermen, «Juldyz» úlgili bı ansambliniń ásem qoıylymdarymen, jergilikti ónerpazdardyń tamasha óner shashýymen árlenip, kópshilik kóńilinen shyqty. Terekti aýdandyq mádenı-demalys ortalyǵy qyzmetkerleri de bar ónerin saldy. Sahna tórinde, saıyn dala tósinde Kámshat Qadyrǵalıeva, Gúlnaz Qusaıynova, Saǵıdolla Izdeleev sharyqtata án shyrqasa, aýdandyq saz mektebi janynan qurylǵan «Aqjeleń» folklorlyq ansambli dombyra kúmbirimen toıdyń sánin keltirdi.
Kópshiliktiń delebesin qozdyrǵan dala qyzyqtary – báıge men kúres aýdan kásipkerleriniń, sharýa qojalyǵy basshylarynyń qoldaýymen ótti. Qunan báıge men top báıgege – motosıkl, alamanǵa – avtokólik tigildi. Alǵashqy júldelerdi Shyńǵyrlaý aýdanynan kelgen Talǵat Bısembaevtyń «Nazkúreńi» men «Atameken» JShS atynan qatysqan Beksultan Ibatovtyń «Aqtańgeri» ıemdense, avtokólik Atyraý oblysynan kelgen Hamıt Altynbektiń «Qaraqus» atty tulparyna buıyrdy. Al boz kilemde beldesken palýandardyń bas báıgesi – 500 myń teńgeni bórlilik Temirlan Kólbaı jeńip aldy.
Bıylǵy kúzdiń sońǵy jaımashýaq kúnderiniń birinde ótken Terekti toıy el ishindegi eńbek adamynyń eńsesin kóterip, halyqqa tamasha kóńil kúı syılady.
Batys Qazaqstan oblysy