Zań talaptary boıynsha 1 jeltoqsannan bastap kólikti jazǵy dońǵalaqpen júrgizýge tyıym salynady. Degenmen bıyl elimizge qys kesh kelip jatyr. Ońtústik óńirdi aıtpaǵanda, Astananyń ózinde áli qar joq. Jerde qar bolmasa da, jeltoqsannan bastap qysqy búrli dońǵalaq salý mindetti me?
Bul suraqqa IIM M.Esbolatov atyndaǵy Almaty akademııasy Ákimshilik-quqyqtyq pánder kafedrasy bastyǵynyń orynbasary, polısııa podpolkovnıgi Ásem Qyrǵyzbekqyzy jaýap beredi.
– 1 jeltoqsan jaqyndaǵan saıyn kólik quraldary ıeleri tarapynan ózekti suraqtarynyń biri – qysqy dońǵalaqqa aýysý týraly suraqtar kóptep qoıylyp jatady. Keden odaǵynyń 018/2011 «Dońǵalaqty kólik quraldarynyń qaýipsizdigi týraly» tehnıkalyq reglamenti 8-qosymshasynyń 5.5-tarmaǵyna sáıkes qysqy kezeńde (jeltoqsan, qańtar, aqpan aılarynda) 5.6.3-tarmaǵynda kórsetilgen talaptardy qanaǵattandyratyn qysqy dońǵalaqtarmen jabdyqtalmaǵan M1 jáne N1 sanattaǵy kólik quraldaryn paıdalanýǵa tyıym salynady. Kólik quralynyń barlyq dońǵalaǵyna qysqy shına ornatylýǵa tıis. Atalǵan tarmaqta: «Jazǵy kezeńde (maýsym, shilde, tamyz) syrǵanaýǵa qarsy shınalarmen jabdyqtalǵan kólik quraldaryn paıdalanýǵa tyıym salynady» degen normanyń baryn da atap ótken jón.
Tehnıkalyq reglamentte jyldyń basqa aılarynda qandaı dońǵalaqtardy qoldaný talaptary belgilenbegendikten, dońǵalaq aýystyrý ýaqytyn, jol qaýipsizdigin eskere otyryp, kólik quralynyń ıesi ózi sheshedi. Degenmen tehnıkalyq reglamentte aýa raıy (qardyń bolýy nemese bolmaýy) erekshelikteri kórsetilmegen. Sondyqtan qandaı jaǵdaı bolsa da, jeltoqsan, qańtar jáne aqpan aılarynda qysqy shınalarmen jabdyqtalmaǵan kólik quraldarynyń ıeleri Ákimshilik quqyq buzýshylyqtar týraly kodekstiń 590-baby 5-tarmaǵyna sáıkes jaýapkershilikke tartylady.