Malsaq qaýymnyń bar beınetin arqalap, áýpirimdep ósirip otyrǵan túligin tegin olja kóretin baýkespeler azaımaı tur. Ońaı oljaǵa qunyqqandary sonshalyq, obal-saýapty da umytqan.
Selınograd aýdanynyń eki turǵyny quqyq qorǵaý qyzmetkerleriniń iz kesýdi yjdaǵatty júrgizýleriniń arqasynda qolǵa tústi. Olardyń eki birdeı qylmystyq is-áreketke qatysy bary anyqtalyp otyr. Talapker aýylyndaǵy sharýa qojalyǵynyń basshysy belgisiz bireýlerdiń qorasynan jıyrma qoıyn urlap ketkeni týraly habarlaǵan. Shyǵyn bir mıllıon teńgege jýyq. О́riste júrgen jerinen ıt qýyp úrkip nemese jeldep ketti deıtin emes, qamaýly turǵan jerinen qoldy bolǵan. Al ekinshi aq adal malynan aıyrylǵan turǵynnyń qorasynan bes qoıy joǵalǵan. Onyń shyǵyny 300 myń teńgeniń tóńireginde.
Polısııa qyzmetkerleriniń jedel aldyn alý sharalaryn júrgizýiniń arqasynda Qajymuqan aýylynyń eki turǵyny qolǵa tústi. Iz kesý barysynda urylar maldy úptep ketýge kelgende kólik jaldaǵan. Keıin soıyp, satqan. Aıǵaq retinde terisi, úsh qoıdyń eti tabyldy. Tergeý barysynda urynyń biri osylaısha aqsha jınap, úılený toıyn ótkizgim keldi dep aqtalatyn kórinedi. Mal urlap bir basyn ekeý etpek bolǵannyń endi óz basy daýǵa qalyp otyr.
Sandyqtaý aýdanyndaǵy Jylandy aýylynyń turǵyndary aıaqastynan ábigerge túsken. Tebindegi 103 bas jylqy izim-qaıym. Mal súmesimen kún kórip otyrǵan malsaq qaýym úshin adam aıtqysyz shyǵyn. Alǵashqy táýlikteri aýyl turǵyndary túgelge jýyq atqa qonyp, taý-tastyń, orman-toǵaıdyń ishin súzip shyqqan. Jyp-jylmaǵaı. Sonyǵa túsken bir iz bolsashy. Qutty júzden astam jylqyny jel kóterip ketkendeı. Shyǵyny da otyz mıllıon teńgeniń kóleminde. О́zderi taba almaıtyn bolǵan soń polısııaǵa habarlaǵan. Jalǵyz polısııa qyzmetkerleri ǵana emes, tótenshe jaǵdaı departamentiniń qyzmetkerleri de iz kesýge kelgen. Tipti aspanǵa dron da ushyryldy. Polısııa qyzmetkerleri kúre joldyń boıyndaǵy kúdikti-aý degen kólikterdi toqtata bastady. Etpen aınalysatyn alypsatarlar da nazarǵa alyndy. Shaǵyn aýyldyń bar jylqysy túgel joǵalsa, malsaq qaýym júgen ustap qalmaı ma?! Dál osy kúnderi qas qylǵandaı kún kúrt sýytyp, saqyldaǵan sary aıaz kúshine minip turǵan. Áıtse de álsin-álsin jylynyp alǵan iz kesýshiler qyrýar jylqyny izdeýmen boldy. Eńbek esh ketken joq, tabyldy. Jel aıdaǵan támam jylqy qyr asyp, kórshi aýdannyń aýmaǵyna shyǵyp ketipti. Tústep túgendese, túgel.
Qaıtqan maldyń qaıyry bar. Bylaı qaraǵanda, anaý aıtqandaı qylmystyq oqıǵa bolǵan joq. Endeshe, nege jazyp otyrmyz. Qanshama jurtty áýre-sarsańǵa salǵan osy taqylettes oqıǵa jıi tirkeledi. Demek mal baqqan soń kózden tasa etpegen jón. Qaraýsyz malǵa kóz salatyndar qaı jerde bolsyn kezdesip qalýy ábden múmkin.
Aqmola oblysy