О́tken jyldyń sońynda Terekti aýdanynda birneshe jańa mektep paıdalanýǵa berildi.
Magıstralnyı buryn temirjol mekemesine qaraǵan, tomaǵa-tuıyq aýyl bolatyn. Aqsýat aýyldyq okrýginiń quramyna kirip, eldi mekenniń ekinshi tynysy ashylǵandaı boldy. Turǵyndar kópten kútken kirme joldyń kúrdeli jóndeýi aıaqtaldy. «Petroref» kompanııasy «Jańǵyrý» baǵdarlamasy aıasynda zamanaýı balalar oıyn alańyn tartý etti. Endi, mine, 108 oryndyq sý jańa mektep ǵımaraty paıdalanýǵa berilip, Magıstralnyı aýylynda turatyn 164 shańyraq, ártúrli ulttan quralǵan 562 turǵyn sheksiz qýanyshqa bólendi. Oqýshylar 1986 jyly salynǵan kóne mektepti tastap, keń de jańa ǵımaratqa kóshti.
– 2023 jyly Batys Qazaqstan oblysynda 27 mekteptiń qurylysy bastalǵan edi. Sonyń 17-siniń qurylysy jyl sońyna deıin aıaqtalyp, oqýshylar men ustazdarǵa esikterin aıqara ashty. Mundaı kórsetkish Táýelsizdik jyldary bolmaǵan. Sonymen qatar byltyrǵy tamyzdan beri Qaztalov aýdanynyń Juldyz aýylyndaǵy jáne aýdan ortalyǵyndaǵy Alma Orazbaeva atyndaǵy, Báıterek aýdanynyń Jalyn jáne Jaıyq mektepteri paıdalanýǵa berildi. Buǵan qosa Aqjaıyq aýdanynyń Atameken jáne Jaıyq aýyldarynda, Qaratóbe aýdanynyń Shalǵyn, Sonaly, Hankól aýyldarynda, Báıterek aýdanynyń Sadovyı jáne О́rken aýylynda, Jánibek aýdanynyń Aqoba aýylynda jańa mektep ǵımaraty tapsyryldy. Osynyń bári – Memleket basshysynyń tapsyrmasymen jas urpaqqa jasalyp jatqan memleket qamqorlyǵy, – dedi Batys Qazaqstan oblysy ákiminiń orynbasary Baqytjan Narymbetov Terekti aýdanynda salynǵan tórtinshi jańa mekteptiń ashylý saltanatynda.
«Qarashyǵanaq Petroleým Opereıtıng b.v.» kompanııasynyń tapsyrysymen 871,2 mln teńgege salynǵan bilim ordasy eki tilde bilim beredi. Jańa ǵımarat arnaıy pán kabınetterimen, ınteraktıvti taqta, kompıýter sekildi qajetti quraldarmen tolyq jabdyqtalǵan. Munda uldar men qyzdarǵa arnalǵan sheberhanalar, sport zaly, akt zaly, sabaq ótetin 20 kabınet bar.
Mekteptiń ashylý saltanatyna shaǵyn aýyl halqy tolyq jınaldy. Saltanatty jıynda merdiger «Ka-Stroı Ltd» qurylys kompanııasynyń oblys boıynsha bas dırektory Muhıt Baıdýllaev mektep dırektory Aımangúl Jarasovaǵa sımvolıkalyq kiltti tabys etti. Aýyl turǵyndary qýanyshtan shashý shashyp, bilim salasynyń ardageri Orynsha Qalıeva mektep ujymyna aq tilegin aıtty.
– Jańa ǵımarat aýyl turǵyndaryna, ata-analarǵa, oqýshylarǵa, mektep ujymyna óte unady. Endi bul jerde 114 bala eki aýysymda oqıtyn bolady. Ujymdaǵy 48 ustaz shákirtterimizge jaqsy bilim berýge barymyzdy salamyz. Mekteptiń búkil jabdyǵy tolyq. Mektep janyndaǵy ashana 64 balaǵa ystyq tamaq daıyndaıdy, – deıdi mektep dırektory Aımangúl Jarasova.
Oblys ortalyǵyna jaqyn ornalasqan Terekti aýdanynyń eldi mekenderi – bolashaǵy zor, sharýaǵa jaıly qonys. HH ǵasyrdyń basyndaǵy qarashekpender kóshi men 1950 jyldardaǵy tyń kóterý kezinde barynsha orystanǵan eldimekender búginde qaıtadan ulttyq sıpatyn taýyp jatyr. Jaqynda Aqsýat aýyldyq okrýgine qarasty Poıma aýylynda salynǵan jańa mektepke Alash qozǵalysynyń qaıratkeri, joǵary bilimdi alǵashqy qazaq dárigerleriniń biri Nurǵalı Ipmaǵambetov pen Oral qalasynda gýbernııalyq «Qyzyl tý» gazetin alǵash qurap, aıaǵynan turǵyzǵan tulǵalardyń biri Batyrbek Áljanovtyń esimi usynylǵan edi. Aýyl ákimi Jannur Ahmetovtiń aıtýynsha, Magıstralnyı aýylynda ashylǵan jańa mektepke memleket jáne qoǵam qaıratkeri Ábdirahman Áıtıev pen Saqypkereı Arǵynshıevtiń esimderi usynylypty. Bul atalǵan tulǵalardyń bári de osy óńirde, osy topyraqta týyp-ósken.
Batys Qazaqstan oblysy