Almatydaǵy ál-Farabı atyndaǵy QazUÝ-dyń Quqyqtyq jáne qujattamalyq qamtamasyz etý departamenti áleýmettik jelide ýnıversıtette oqıtyn stýdent qyzdardyń jeke, medısınalyq derekteriniń taralyp ketýine qatysty pikir bildirdi, dep jazady Egemen.kz.
QazUÝ-daǵy departament mamandary jeke derekterdiń taralýyna baılanysty ýnıversıtette ishki tekserý jumystary júrgizilgenin málimdedi. Ýnıversıtet aqparatyna sáıkes, stýdentterdiń jeke derekterin ýnıversıtetke shart negizinde medısınalyq qyzmet kórsetetin Smart Health University City JShS medbıkesi taratqan.
«6 aqpanda ýnıversıtetke shart negizinde medısınalyq qyzmet kórsetetin Smart Health University City JShS medbıkesi Whatsapp messendjeri arqyly flıýorografııalyq zertteýden ótýin qamtamasyz etý úshin Mehanıka-matematıka fakýltetiniń 3-4 kýrs stýdentteriniń tizimi bar Excell formatyndaǵy qujattardy osy fakýltet dekanatynyń mamanyna jibergen. Keıinnen messendjerlik habarlamalar arqyly ýnıversıtette oqıtyn stýdent qyzdarǵa qatysty jeke derekter men medısınalyq, gınekologııalyq qupııa aqparat tarap ketken.
Ýnıversıtet qyzmettik tekserý taǵaıyndap, Almaty prokýratýrasyna atalǵan fakt boıynsha prokýrorlyq shara qoldaný jáne stýdentterdiń quqyqtaryn qorǵaýdy qamtamasyz etý týraly ótinishpen júgindi», delingen JOO departamentiniń habarlamasynda.
Ýnıversıtet Smart Health University City JShS-men aradaǵy kelisimshartty buzý máselesin qarastyryp jatyr.