Jaıyq ózeni Oral qalasy tusynda kemerine tolyp, saı-salany sýǵa toltyryp, Atyraý oblysyna qaraı bettep barady. О́zen deńgeıi qaýipti shekten 13–14 sm asyp kóterilgenimen, soǵylǵan bógetter eldi mekenderdi aman saqtap qaldy.
Jaıyqtyń jaıylǵan sýynan eń kóp zardap shekken saıajaı aýmaǵyndaǵy úıler boldy. Sońǵy esepke qaraǵanda Oral qalasynyń ózinde 14 839 saıajaı úıin sý basqan. Sondaı-aq Bórli aýdanynda – 245, Báıterek aýdanynda – 112, Terekti aýdanynda 16 saıajaı sý tasqyny astynda qalǵan.
Naýryz aıynyń sońǵy kúnderi Qaldyǵaıty ózeniniń tasýynan birneshe kópir búlinip, Qaratóbe aýdanynyń 9 eldi mekenine jol qatynasy úzilgen edi. Qazir ol jerde ýaqytsha jol qatynasy qalpyna keltirildi. Shyńǵyrlaý aýdanyndaǵy Aqtaý aýyly ǵana qatynassyz qalyp tur.
Oblys boıynsha tasqyn kezinde 1 292 turǵyn úıge sý kirgen bolatyn. Qazir bul úılerge tehnıkalyq saraptama jasalyp, keıbirin jóndeý, keıbirin qaıtadan salý jóninde sheshim shyǵarylyp jatyr. Ol jóninde buryn habarladyq. О́ńirde sý tasqyny kezinde 13 939 adam qaýipti jerden kóshirilgen edi. Qazir 2 441 adam evakýasııalyq beketterde jatyr. 3 729 adam úıine qaıta oraldy. О́mir birte-birte qalypty arnasyna túsip kele jatyr.
Sáýirdiń 5-inen beri Batys Qazaqstan oblysyna elimizdiń ár aımaǵynan 863,4 tonna gýmanıtarlyq kómek kelgen eken.
Qazir Jaıyq ózeniniń deńgeıi Oral qalasynyń tusynda 1957 jyldan keıingi eń joǵary shegine jetip, 863–864 sm bolyp tur. Bul – qaýipti deńgeıinen 13–14 sm joǵary degen sóz. Sáýir aıynyń 1-inde oblys boıynsha tótenshe jaǵdaı jarııalanyp, ózen jaǵalaýyndaǵy eldi mekenderdi, Oral qalasyn qorǵaý sharalary qaýyrt júrdi. Elimizdiń ár aımaǵynan 4 myńnan asa qutqarýshylar, tótenshe jaǵdaılar departamenti mamandary, áskerıler keldi. Osynyń nátıjesinde oblys boıynsha 150 shaqyrymǵa jýyq qorǵanys bógeti salyndy. Burynǵy bógetter bıiktetilip, nyǵaıtyldy. Osynyń arqasynda Jaıyq ózeniniń jaıylǵan sýy eldi mekenderdi qorshap, qaýip tóndirgenimen, turǵyn úıler men strategııalyq nysandar negizinen aman qaldy.
Qazir bógetter sýdy ustap turǵanymen, qaýip áli seıilgen joq. Qaýipti tustar táýlik boıy baqylaýda tur. Oral qalasynyń ózinde sý buzyp ketýi múmkin 24 núktede, ásirese qalanyń «Kúren», «Jas natýralıster stansasy», «Azaýly», «Komıntern», «Aqjúnis» aýdandary, Rechnık, Qurylysshy baý-baqsha seriktestikterinde 24 saǵat kezekshilik uıymdastyrylyp, qatań qadaǵalanyp otyr. Qala mańynda jaǵalaýdy nyǵaıtý, qap tóseý jumystary jalǵasyp jatyr. Tótenshelikter men polısııa, áskerıler táýlik boıy qoǵamdyq tártipti qadaǵalap, patrýlde júr. Habarlama jasaý, evakýasııa, monıtorıng júrgizý, apattan qutqarý jáne shuǵyl jumystar – osy toptyń mindetinde.
Osy kúnderi «Qazsýshar» mekemesiniń jergilikti mamandary Jaıyq sýyn oblys aýmaǵyndaǵy sý qoımalaryna toltyryp alý qamymen júr. Sáýirdiń 24-indegi málimetke qaraǵanda, óńirdegi sý qoımalary 86% tolǵan, 438 mln tekshe metr sý jınalyp alynǵan. Qazir Jaıyq ózeninen Jaıyq-Kóshim júıesine sekýndyna 118 tekshe metr sý quıylyp jatyr. 2024 jyldyń basynan beri osy júıege 242 mln tekshe metr sý alynǵan eken. Qazirgi tańda sý qoımalaryna sý jınalyp, keıingi jyldary keýip qalǵan kólderge, kóltabandar men tabıǵı shabyndyqtarǵa sý shyǵyp jatyr.
Jaıyq ózeniniń deńgeıi sońǵy bir táýlikte 1 sm-ge túsip, 863 sm boldy. Jalpy, sý tasqyny bastalǵaly Jaıyq ózeniniń deńgeıi 7 metrge kóterilgen.
Batys Qazaqstan oblysy