«Astana operanyń» jetekshi solısi, Qazaqstannyń eńbek sińirgen qaıratkeri Saltanat Ahmetova 21 mamyrda K.Baıseıitova atyndaǵy Kameralyq zal sahnasynda «Foreden Pýlenkke deıin» konsertin kórermen nazaryna usynady.
«Bolshaıa opera» halyqaralyq televızııalyq jobasynyń jeńimpazy Saltanat Ahmetovanyń kópshilik unatatyn daýsy men mýzykalyq ónerdi tereńnen túsinýi onyń osy kúnge deıin usynylǵan konsertteriniń barlyǵyn jarqyn ári mazmundy etip keledi. Synshylar ánshiniń adam janynyń túkpirine boılap, tyńdarmandardy óziniń áserli oryndaýymen qyzyqtyryp, mýzykalyq beınelerdiń keń shoǵyryn ońaılyqpen júzege asyratynyn san márte atap ótken edi. Al bul konsertte tyńdarmandar áıgili fransýz kompozıtorlarynyń vokaldyq mýzykaǵa aıryqsha qyzyǵýshylyq tanytqan ári qaıtalanbas mýzykalyq jaýharlardy jasaǵan XIX-XX ǵasyrlardaǵy óner atmosferasyna enýge múmkindik alady.
– Álemdik mýzykalyq mádenıette fransýz klassıkasy erekshe orynǵa ıe, ol keremet operalardy qamtıdy. Búginde teatr sahnalarynda jıi qoıylyp júrgen J.Bızeniń «Karmen» operasy solardyń qatarynda. Budan bólek, XIX ǵasyrdyń sońǵy onjyldyqtary men HH ǵasyrdyń basyndaǵy, ıaǵnı «jańarý» dep atalǵan kezeńdegi fransýz mýzykasy óte baı ári qyzyqty. Klod Debıýssıdiń debıýttik etıýdteri men prelıýdııalary, Erık Satıdiń sonatalary men kameralyq ansamblderi, sondaı-aq Morıs Ravel men Fransıs Pýlenktiń shyǵarmalary, ókinishke qaraı, bizdiń sahnada jıi oryndala bermeıdi. Dese de, olar meni, eń áýeli, ózderiniń biregeı dybystaýymen jáne úılesimdilik pen formanyń tájirıbesimen qyzyqtyrady. Atalǵan kompozıtorlardyń týyndylaryn oryndaǵanda olardyń sóz tirkesi men dınamıkadaǵy nıýanstar syndy ózindik tehnıkalyq talaptaryn eskerý óte mańyzdy dep sanaımyn. Onyń qıyndyǵy tehnıkalyq dáldikti, mánerlilikti jáne álbette, durys aıtylymdy saqtaı otyryp, olardyń dara qoltańbasy men shyǵarmalardyń atmosferasyn jetkizýde bolyp tabylady, – deıdi Saltanat Ahmetova.
Ánshi atap ótkendeı, baǵdarlamaǵa fransýz kompozıtorlary Gabrıel Fore, Fransıs Pýlenk, Erık Satı men basqa da tanymal avtorlardyń sol dáýirdegi stılderdiń san alýandylyǵyn beıneleıtin túrli týyndylary endi. Tańdaýly vokaldyq mınıatıýralardan bastap fleıta men klarnet qatysatyn kameralyq ansamblderge deıin árbir kompozısııa óziniń biregeı kórkemdik beınesin ashady. Soprano Saltanat Ahmetovanyń, fleıtashy Alekseı Kosyrevtiń jáne klarnetshi Almaz Toqpanovtyń oryndaýy aýdıtorııaǵa árbir týyndynyń tereńdigi men ásemdigin shynaıy sezinýge múmkindik beredi. Fortepıano partııasyn konsertmeıster Zárý Jazyqbaeva usynady.
– Árıne, meni sahnada operalyq spektaklderde jıi kórýge bolady, alaıda partııany oryndaý men tutas kameralyq mýzyka konserti – ekeýi de kez kelgen mýzykant úshin ózderiniń biregeı talaptaryn qoıady. Operada tehnıkalyq qana emes, sondaı-aq akterlik sheberlik jáne emosııany mýzyka men sahnadaǵy qımyl arqyly jetkizý qabileti de mańyzdy. Al kameralyq mýzyka konserti anaǵurlym tereń oryndaýdy talap etedi. Munda ártistiń týyndyny jeke paıymdaýy, oǵan degen kózqarasy, mýzykalyq qabileti mańyzdy. Shyn máninde, bul – bir ártis qatysatyn kádimgi spektakl, sebebi munda operadaǵydaı seriktesterińmen ózara árekettestik joq, – dep ánshi shyǵarmashylyq keshiniń ereksheligine de jan-jaqty totalyp ótti.
«Foreden Pýlenkke deıin» konserti ónersúıer qaýymǵa áıgili kompozıtorlar shyǵarmalarynyń ádemi oryndaýynan lázzat alýǵa keremet múmkindik syılap qana qoımaı, klassıkalyq mýzykanyń ǵalamat atmosferasyn da pash etedi. Avtorlardyń árbir shyǵarmaǵa salǵan sezimderi men emosııalar gammasyn oryndaýshylardyń qalaı jetkizetinin kórý barlyǵyna qyzyqty bolary sózsiz.