«Nura» ensıklopedııasy – ólke shejiresine qosylǵan súbeli úles

Qaraǵandydaǵy «Bolashaq» ýnıversıtetiniń bilim men tárbıe berýdegi mereıli is-qyzmetimen birge, qalyń oqyrman qaýym rýhanı jan dúnıesin baıytý maqsatynda biraz jyldan beri turaqtylyqpen atqaryp kele jatqan jurtqa jaǵymdy bir sharasy bar. Ol ne degende, oqý orny kómek pen qoldaýymen belsendi túrde jumys isteýshi Ortalyq Qazaqstan ǵylymı-zertteý ınstıtýty ǵalym­darynyń shyǵarmashylyq izdenisi arqyly jyl saıyn shyǵarylýdaǵy týǵan jerdiń tumsa tarıhy, taǵylymdy tulǵalary týraly tanymdyq derekteri, muraǵat maǵlumattary mol týyndylardy ataýǵa bolady. 15 tomnan turatyn «QarLag tarıhynyń ocherkteri», «Sáken Seıfýllın», «Qaz daýysty Qazybek bı», «Buqar jyraý» tulǵalyq ensıklopedııalary eleýli eńbekter turǵysynda tanyldy. О́lke shejiresine qatysty iri ǵylymı-zertteý jobalar aıasynda daıyndalý ústindegi jańa kitaptar toptamasy kezek-kezegimen oqyrmandar qolyna tıgeli de otyr. Osymen qosa, aımaqtyń irgeli aýdandary men qasıetti jerleriniń arǵy-bergi tarıhy, búgingi tańdaǵy tynys-tirshiligi, el esinde erekshe qalǵan qaıratkerler, óner jampozdary ómiri, erligi men eńbek joly úlgili jandar jaıly bir tártippen, bir júıemen baıan etilgen ensıklopedııalyq deńgeıdegi eńbekter shyǵarý da úrdiske aınalǵan. «Qasıetti meken Qaraaǵash», «Ortaýym – altyn besigim», « Aqtaýym – ata mekenim», «Mereı­li meken Moıynty» atty kitaptar serııasy, «Jańaarqa» ensıklopedııasy jaqynda «Nura» ensıklopedııasymen jalǵasty. О́lkeniń astyqty yrysy retinde tanymal óńirdiń baı shejiresi, urpaqtan urpaqqa jalǵasqan mura, elge qadirli adamdardyń isi men qyzmeti, jer-sý ataýlary syry, birneshe ulttyń ókilderi beıbitshilik pen birlikte ómir súrýdegi yntymaqtastyq jan-jaqty qamtylý údesinen shyqqanymen qundylyǵy jyly qabyldandy. Kitaptyń súıinshi danasyna aıtylǵan memleket jáne qoǵam qaıratkeri Oralbaı Ábdikárimovtiń osyndaı pikiri kópshilik oıyn bildirdi. Nuralyqtar qolyna tıip, óz týǵan ortalary jaıly oqyp-bilýge yqylas týǵyzǵan kitaptyń avtorlary belgili ólketanýshy Ibirahym Islámov pen izbasary, jýrnalıst Jomart Ospanov ekenin tanystyra ketken jón. Joǵaryda atalǵan jınaqtardy jazýdaǵy izdenis­teri jańa qyrynan tanylyp, kórkem­dik-mazmundyq sapasy táýir baǵaǵa laıyq shyǵarmashylyq tabys jasaı alǵandaryn ataýǵa bolady. Aıqyn NESIPBAI, «Egemen Qazaqstan». QARAǴANDY.