Senat Tóraǵasy, Qazaqstan bochcha federasııasynyń Prezıdenti Máýlen Áshimbaev paralımpıadalyq bochchadan jyl saıynǵy respýblıka chempıonatynyń ashylý rásimine qatysty, dep habarlaıdy Egemen.kz Senattyń baspasóz qyzmetine silteme jasap.
Astanada Jaqsylyq Úshkempirov atyndaǵy Jekpe-jek saraıynda ótip jatqan jarysta jekeleı synnan bólek, alǵash ret komandalyq jáne juptyq saıystarda jeńimpazdar anyqtalady.
Qatysýshylarǵa sáttilik tilegen Máýlen Áshimbaev bochchadan sportshylarymyzdyń sheberlikteri shyńdalyp, senimdilikteri kúsheıip, iri jeńisterge qulshynysy artyp kele jatqanyn atap ótti.
«Jýyrda Fınlıandııada ótken jarysta ulttyq quramamyzdyń músheleri Qýanysh Asqarbekov, Itıana Shyńǵyshanova, Aleksandr Qurmantaev alǵash ret qola medal jeńip aldy. Bul – jyl ótken saıyn sportshylarymyzdyń kásibı deńgeıi ósip kele jatqanyn kórsetedi. Az ýaqyt ishinde atalǵan sporttan jaryq juldyzdarymyzdyń shyqqanyna jáne ár jarys saıyn qatysýshylar qatary kóbeıip kele jatqanyna qýanyshtymyn. Barshańyzdy maqtan tutamyz. Memleket basshysy Qazaqstanda ınklıýzııany damytýǵa únemi basa mán berip keledi. Jetistikterimiz – osyndaı qoldaýdyń jáne úlken komandanyń birlesken jumysynyń nátıjesi», degen Máýlen Áshimbaev sportshylarǵa, olardyń ata-analary men jattyqtyrýshylarǵa alǵys bildirdi.
Aıta ketsek, Fınlıandııanyń Lahtı qalasynda ótken saıysta Qýanysh Asqarbekov jekeleı synda qola medal oljalady. Sondaı-aq komandalyq jarysta da Qýanysh Asqarbekov, Itıana Shyńǵyshanova, Aleksandr Qurmantaev úzdik úshtikten kórindi. Odan bólek, jekeleı synda Itıana Shyńǵyshanova – tórtinshi, Merýert Tilebaldy – besinshi, Baljan Bólekpaeva – altynshy, Temirlan Altynsary segizinshi oryn alǵanyn atap ótken jón.
«Sońǵy jyldarda elimizde bochcha qarqyndy damyp keledi, turaqty aınalysatyndar qatary shamamen 20 paıyzǵa artyp otyr. Bul – erekshe qajettiligi bar myńdaǵan azamatqa sportpen shuǵyldanýǵa, jańa dostar tabýǵa jáne halyqaralyq arenalarda úlken jetistikterge jetýge jol ashady. Bochchanyń osylaı keńinen tanylyp, jańa qozǵalysqa aınalyp kele jatqanyna qýanyshtymyn. Bul rette sizder úlken úlgi kórsetip kelesizder», dedi Federasııa Prezıdenti.
Byltyr el chempıonatyna 10 óńirden 50-ge jýyq sportshy kelse, bıyl 12 óńirden 89 sportshy qatysýǵa ótinim bergen. Qazirgi ýaqytta 10 oblysta bochcha federasııasy fılıaldary jumys isteıdi. Al, 12 óńirde bochcha úıirmeleri bar.
Sonymen qatar, búgin Federasııa konferensııasynyń kezekten tys otyrysy ótti. Onda qatysýshylar ınklıýzıvti sport túrlerin odan ári damytýdyń ózekti máselelerin, onyń ishinde jattyǵý bazasyn damytý, qarjylandyrý, sportshylar arasynda básekelestikti arttyrý, tájirıbe jınaqtaý jáne taǵy basqa basymdyqtardy talqylady.