Dúnıeni dúr silkintken Dımash

Konsert ýaqyty 21.00 dep belgilengen. Biraq stadıon aldyn keshki saǵat altydan bas­tap toltyrǵan tyńdarman konsert bastal­ǵansha «Beshıktash» tórin úlken merekege ulas­­tyrdy. Álemniń túkpir-túkpirinen jı­nal­­ǵan halyq sanynda shek joq. Túrli tosyn­­syılarymen tańǵaldyrǵan Dımash jan­kúıer­leri – «Dearstyń» dýmany tipti erekshe. Ánshi­niń beınesi salynǵan túrli buıymdar, denede bederlengen san alýan sýretter, Dımash ánin jatqa shyrqaǵan alty qurlyqtyń aqedil peıili men shynaıy ónerge degen sheksiz mahabbaty shynymen-aq kóńil tolqytady. «Mahabbat ber maǵan» dep qazaqsha án salǵan bul qalyń nópirdiń ulty men ulysyn, oıy men talǵamyn bir arnada toǵystyrǵan ortaq tin – shynaıy ónerge degen mahabbat edi.

Iá, bul kún – erekshe kún, tarıhı sát. Árbir jeke konserti úlken óner oqıǵasy retinde ótetindigine úırenip alǵan ánshi tyńdarmandary Dımashtyń «Stranger» shoýyn asyǵa kútti. Onyń ústine Dımash jankúıerleri dál osy kúni ánshiniń 30 jasqa tolǵan mereıtoıyn da birge toılaý mártebesine ıe bolyp otyr. Bir sózben aıtqanda, bul konsert – Dımashtyń, onyń otbasy men dostarynyń, áriptesteriniń jáne álemniń túkpir-túkpirinen kelgen myńdaǵan jankúıerdiń kópten kútken aıryqsha kezdesýi.

Hosh, sonymen saǵat tili Ystanbul ýaqytymen 20.00-di soqqanda birneshe aı demin ishine tartyp kútken kórermen úshin áıgili stadıonnyń esigi de aıqara ashyldy. Qushaǵyna 42 myń kórermendi erkin qabyldaıtyn alyp ǵımarat óz tarıhynda osy kúnge deıin nebir talantty óner maıtalmandaryna sahnasyn usynyp, dańq shyńyna kóterilýine jol salǵan. Olardyń qatarynda Músilim Magomaev, Maıkl Djekson syndy megajuldyzdar bar. Aıtýly ańyz ánshiler óner kórsetip, lyq toly kórermen jınaǵan Ystanbuldyń áıgili «Beshıktash» stadıonyna sol ańyzdardyń jalǵasy bolyp, orda buzǵan otyzynda Qazaqtyń Dımashy kóterildi. Yǵy-jyǵy halyqtyń qımyly sap tyıylyp, stadıon ishindegi tirshilikti endi qulaq tundyrar qoshemet úni qumyqtyrdy.

«Stranger» shoý-konserti ataýy aıtyp turǵandaı, shynymen-aq ánshiniń buǵan deıin tyńdarmanyna beımálim bolyp kelgen beıtanys qyrlaryn pash etken, ónerde shekara bolmaıtynyn dálelde­gen ǵala­mat kesh boldy. Mýzykanyń san alýan ­janrynda erkin kósilip, tabysty tájirıbesin tanystyrǵan Dımashtyń talǵamy men ıntellektýaldyq deńgeıi qandaı qurmetke de laıyq. Kesh boıy konsert tizginin qolyna alyp, qazaq, aǵylshyn, túrik tilderinde erkin kósilgen ánshi notanyń da kóp ánshi boılaı bermeıtin shyńdarynan ún qatty. Onyń «Umytylmas kún»,  eń kólemdi týyndysy «The Story Of One Sky», sondaı-aq jaqynda jaryq kórgen «Smoke» jáne «When I`Ve Got You» týyndylary da búgin erekshe stılde oryndaldy. Shy­ńyl­tyr únniń tazalyǵy sondaı, saf óner­ge bas ıgen kórermen úsh jarym saǵat boıy siltideı tyna klassıkalyq mýzykaǵa kóńil­ qoıdy, Dımashqa qosylyp, birge án shyr­qady.

Shoý-baǵdarlamada ánshiniń qur­met­ti dosy, kompozıtor Igor Krýtoı­dyń ­týyndylary erekshe oryn aldy. ­«Olim­pico» atty aıbyndy kantata men «Ave Maria» sheber vokalızasııasy úlken alańnyń arkasynyń astynda óte ádemi jáne keń kólemde shyrqalsa, Dımash pen kompozıtor Krýtoıdyń shyǵarmashy­lyq tandemin beıneleıtin klassıkalyq dybysty ulttyq qazaqylyqpen úıles­tiretin «Stranger» týyndysy shoý-baǵ­dar­­lamasynyń sharyqtaý shyńy boldy desek, artyq aıtqandyǵymyz emes. Al jankúıerlerdiń erekshe súıispenshiligine ıe bolǵan «Lıýbov ýstavshıh lebedeı» áni bul kúni búkil kórermenniń qosylýymen aıryqsha sıpatta qaıta shyrqaldy.

 «Stranger» shoý-baǵdarlamasyn sonymen qatar týǵan kún ıesiniń qonaqtary men dostarynyń tosynsyılary men qoıylymdary odan ári áserlendire tústi. Atap aıtsaq, óner ıesin quttyqtaý­ǵa Túrkııa, Qazaqstan, AQSh-tan álemge áıgili mýzykanttar keldi. Sonyń bire­geıi hám mereıtoılyq keshtiń aıtýly jańalyǵy – Dımash alǵash ret Los-Andjelesten kelgen qonaq, kompozıtor, prodıýser, kóptegen tanymal mýzykalyq týyndynyń avtory Neıtan Vangpen birge bir sahnada óner kórsetti. Ánshi kompozıtordyń súıemeldeýimen áıgili akter Djekı Channyń «Avangard» fılminiń saýndtregin alǵash ret sahnada oryndady. «Happy» atalatyn bul kompozısııa­ny Dımash 2020 jyly fılmniń sońǵy núktesin qoıatyn saýndtrek retinde jazǵan bolatyn. Dımash pen Neıtannyń óner kórsetýi kórermender úshin úlken tosynsyı boldy. Tyńdarmandar qytaı tilindegi vırtýozdyq fortepıano men bir qaraǵanda jeńil bolyp kórinetin vokaldyq daýysty erekshe ásermen qabyldady.

Úsh aı burynǵy konsert aldyn­daǵy jýrnalıstermen kezdesýinde: «Túrkııadaǵy konsertke kimdi shaqy­ratynymdy ázirge aıtpaı-aq qoıaıyn, ol qupııa bolsyn. Konsertte mindetti túrde Túrkııanyń belgili bir ánshisimen nemese óner ujymymen óner kórsetip, Qazaq eli men Túrkııa halqynyń bir-birine degen dostyq qarym-qatynasynyń úlken aıǵaǵyn sahnaǵa alyp shyǵyp kórsetkim keledi» degen ánshi ýádesinde turdy. Dımashtyń jeke konsertiniń arnaıy qonaǵy, ánshi, kompozıtor, gıtarıst, tek shyǵarmashylyq qana emes, qaıyrymdylyq qyzmetimen de keńinen tanymal jáne halyq súıgen túrik halyqtyq hard-rogyn jańǵyrtqan mýzykant Halýk Levent qabyldaýshy el atynan qazaq ónerpazyn túrik jerinde qarsy alyp, Dımashqa gıtarasyn syıǵa tart­ty. Sonymen qatar Roker Halýk pen klas­sıkalyq vokalıst Dımash sahnadan akýs­tıkalyq gıtaranyń súıemeldeýimen túrik­tiń eń tanymal «Gesi Bağlari» ánin oryndady.

Konserttiń taǵy bir qonaǵy ataq­ty dıdjeı Býrak Ieter boldy. Ol Dımash­pen byltyr Túrkııadaǵy «Weekend» áni­niń preme­rasy ótken alǵashqy kon­sertinen beri birge jumys istep keledi. Aıtýly jarqyn shyǵarma Túrkııa túnin tamyljytqan «Stranger» shoýda taǵy da oryndalyp, kórer­menniń erekshe yqylasyna ıe boldy. Al Býrak Dımashqa ótken jylǵy konsert-shoýynda erekshe tany­­mal bolǵan «ǵarysh» kúrtesin syılady.

Mereıtoılyq dýmannyń taǵy bir arnaıy qonaǵy, elimizge belgili kom­po­zıtor Renat Gaısın de osynaý mereıli kúni ánshiniń qasynan tabyldy. Saz­gerdiń pıanınoda jáne Oljas Qurman­bektiń qobyzda súıemeldeýimen oryn­daǵan Dımashtyń «Qaıran elim» áni qazaq­tyń janyn jyrlap qana qoımaı, ártis­ter­diń adam taǵdyry jaıyndaǵy tereń tolǵanystaryn da jan-jaqty asha tústi.

«Stranger» shoýdyń kórermen úshin ǵana emes, ánshi úshin de tosynsyı bolǵan tamasha sáti – ustazy Marat Áıtimovtiń shákirtin týǵan kúnimen quttyqtaý úshin úlken tortpen sahna tórine shyǵýy. Muny kórip qatty tolqyǵan Dımash ustazyna jáne búgingi onyń armanyn júzege asyrǵan jankúıerlerine alǵysyn bildirdi. Kóńil túkpirindegi armanyn aıtyp, torttyń betindegi shyraqty úrlegen sáttegi ánshi tilegi konsertke jınalǵan tyńdarman kóńilin tolqytty. Dımashtyń tilegi – álem, beıbitshilik jáne mahabbat edi. Ánshi sóziniń áserli shyqqany sonshalyq, kózine jas alǵan kórermen kóp boldy. Al «Together» ánin birge oryndaǵannan keıin jas mýzykant, inisi Ábilmansur Qudaıbergen: «Maǵan shabyt bergenińiz úshin jáne mýzykaǵa qatystynyń barlyǵyn úıretip jat­qanyńyz úshin kóp rahmet», dep aǵasyna alǵysyn bildirip, júrekjardy quttyqtaý lebizin jetkizdi.

Konserttegi kórermen yqylasy tipti erek. Olardyń telefon shamy arqyly súıikti ánshisin qoldaýy óz aldyna, sózin kópshilik jatqa biletin «Mahabbat ber maǵan» ánin álemniń 21 elinen jınalǵan myńdaǵan jankúıer jatqa shyrqady. Osy bir tolqynysty sátti sózben aıtyp jetkizý múmkin emes.

«DimashAli» shyǵarmashylyq orta­lyǵynyń málimetinshe, horǵa 7 aqpan­­nan beri Soltústik, Ortalyq jáne Ońtús­tik Amerıka, Eýropa, Azııa elderinen Dımash­tyń jankúıerleri daıyndalyp, sonyń negizinde jobaǵa qatysypty. Uıymdastyrýshylar aıryqsha eńbegi úshin qobyzshy Oljas Qurmanbekke jáne osy aýqymdy jobanyń basty bas­tamashysy ári jetekshisi bolǵan polıak Dımash fan-klýbynyń ókili Agneshka Chlapqa alǵys bildirdi. Dimash FC Poland fan-klýbynyń admınıstratorlary: «Ánimiz barlyǵyna unaıdy jáne Dımash Dears-ty maqtan tutady degen úmittemiz», dep áserimen bólisti. Jaýap retinde Dımash Qudaıbergen únsiz qalmaı, jankúıerlerine qoldaý kórsetip, týǵan tili men Qazaqstannyń mádenıetine degen súıispenshiligi men qurmeti úshin sheksiz alǵysyn bildirdi.

Iá, Dımash buǵan deıin de óziniń jankúıerlerinen quralǵan «Dears» tobyn «otbasym» dep talaı ret aıtqan bolatyn. Al búgin úlken stadıonda naǵyz bir úlken otbasynyń týǵan kúni ótti. «Dears» týǵan kún ıesimen birge qosylyp, fan-zonada «Golden», «Give Me Your Love», «Be With Me», «Fly Away» ánderin birge shyrqap, bıledi, kóńil kóterdi. Konsert barysynda ártistiń jankúıerleri Dımashtyń burynnan tanymal bolǵan «Battle Of Memory» jáne «Sos D’un Terrien En Détresse» ánderin oryn­­dady. «Stranger» men «Dúrdaraz» shyǵarmalaryndaǵy ulttyq aspaptardyń árbir únine shabyttanyp, tánti boldy. Konsert boıy súıikti ánderine qosylyp, birge án shyrqady. Al sózin kópshilik jatqa biletin «Mahab­bat ber maǵan» áni oryndala bastaǵanda, barsha kórer­men ónerpazdyń ornyna hormen án shyrqady. Sol sátte Dımash kórermender arasynan ózine tabys etilgen Qazaqstannyń týyn maqtanyshpen ustap turyp, barsha jınalǵan qaýymǵa rızashylyǵyn bildirip, álemge beıbitshilik tileıtinin jetkizdi.

«Túrikshe, aǵylshynsha sóılep jatyrmyz, alaıda meniń týǵan elim, ana tilim bar. Meniń tileýimdi tileıtuǵyn barsha qazaq eliniń atynan túrik aǵaıynǵa, álemniń túkpir-túkpirinen kelgen jankúıerlerge myń taǵzym, úlken rahmet! Elimizdiń kók baıraǵy kúlli álem aldynda jelbireı bersin. Álemde beıbitshilik, tatýlyq bolsyn. El men eldiń arasynda árqashan ózara dostyq bolsyn. Dostasa bilý – úlken danalyqtyń belgisi. Sondyqtan osy konsertte ulttaryńyz bólek bolsa da, ózara birigip, kóńilderińiz bir arnaǵa toǵysyp, kelip otyrǵandaryńyzǵa myń márte rahmet», dedi Dımash Qudaıbergen.

Iá, jer júziniń áıgili sahnalarynda jarqyn óner kórsetip, ánimen álemdi áldılegen Dımashtyń osy keshtegi taǵy bir tánti etken qasıeti – ár qımyly men áreketinen, úni men ónerinen óziniń qazaq ekenin pash etip otyrar bolmysynyń ultjandylyǵy der edik. Úni ǵana emes, tilimen de ultyn ulyqtap, áni arqyly álemdi qazaqqa bas ıgizgen erligi – Dımash fenomeniniń bir qupııasy der edik. Sahna arqyly qazaqtyń ánin ǵana emes, salty men dástúrin, ǵurpy men ǵıbratyn, ulttyq qundylyqtaryn da ónerimen birtutas birlikte usyna alýy – ánshi áleminiń ádemiligi hám biregeıligi. Áıtpese qazaq qaı zamanda da talanttan kende bolǵan joq qoı. Biraq dál Dımashtaı dúnıeni qazaqqa bas ıgizip, álem halqyna qazaqsha án shyrqatqany neken-saıaq.

Iá, Dımash – juldyz, Dımash – sensasııa, Dımash – fenomen. Onyń daý­sy búkilálemdik garvıtasııa zańyn iske qosqandaı: shalqytty, tasytty, tuńǵıyqqa tartty, kókke kóterdi. Dımash – búginde alty Alashty ǵana emes, alty qurlyqty ónerine tabyndyrǵan ánshi. Onyń da­ýys dıapazony mýzyka tilimen aıtqanda, 5-6 oktavadan turady. Biraq ánshiniń ózi bolsa: «Meniń daýsymdy 5-6 oktava dep, tyńdarmandarym tek soǵan ǵana mán bermese eken. Daýys tek án aıtý quraly ǵana. Meniń maqsatym – sol daýystyń qudiretimen adamdardy kúndelikti tir­liktiń kúıbeńinen alyp ketip, armandar men ertegiler álemine aparý», deıdi.

Búgingi kesh dál sol sezimniń shyńyna jetkizgen erekshe kesh boldy. «DimashAli» shyǵarmashylyq ortalyǵynyń uıym­dastyrýymen ótken konserttiń bas demeýshisi – «RAMS Qazaqstan» qurylys kompanııasy. Aıtýly alpaýyt kompanııa Dımash úni arqyly kúlli túrki áleminiń tutastyǵyn tanytýdy maqsat tutypty hám qazaq óneriniń álemdik arenada nasıhattalýyna basymdyq bergen eken. «Kompa­nııa túrki halyqtary­nyń dostastyǵyn qoldaıdy. Otandyq ónerimizdi demeý arqyly ózge halyqtar aldynda elimizdi odan saıyn tanytyp, jaqyndata túsemiz. Bul – kompanııanyń basty ustanymy. Dımash – elimizdi álemge tanytyp júrgen úlken maqtanyshymyz. Sondyqtan oǵan qoldaý kórsete otyryp, kompanııamyz elimiz Qazaqstannyń mádenıeti kúlli álem halqyna tanylýy­na úles qosady dep senemiz. Biz qazaq ánshisin Qazaqstannan tys jerlerde de qoldaı alatynymyzǵa qýanyshtymyz», dedi «RAMS Qazaqstan» kompanııasynyń PR bóliminiń dırektory Evgenııa Koja-Ahmet.

Ataǵy áldeqashan alty Alashtan asyp, alty qurlyqqa jetken talant bul kúni shynymen jarqyrady. Ne degen eńbek, ne degen talant, ne degen energetıka! Mýzykanyń san janrynda erkin kósilgen Dımash álemin beıne bir ǵarysh dersiz! Aıtýǵa – til, sýretteýge sóz jetpeıdi. Ony tek kózben kórip, júrekpen seziný kerek! Maqtandyq, marqaıdyq! Jasaı ber, qazaqtyń Qudaı bergen Dımashy!

ASTANA – Ystanbul – ASTANA

P.S: «Stranger» týry Túrkııamen shektelmeı, aldaǵy ýaqytta Chehııa men Germanııada da jalǵasyn tabady dep josparlanyp otyr. Naqtylap aıtar bolsaq, «Stranger» shoýy Pragada 22 qarashada, al Dıýsseldorfta 24 qarasha kúni ótedi. Konserttiń Chehııada ótetin orny – «Sortovni Hala Fortuna», Germanııada – «PSD BANK DOME».

Taqyrypqa oraı

Nurlan О́NERBAEV,

Qazaqstannyń eńbek sińirgen qaıratkeri:

– Ystanbul tórine qazaqtyń talantty perzenti, baýyrymyz Dımashty qoldap kelip qaldyq. Konserttiń aldynda álemniń túkpir-túkpirinen jınalǵan Dımashtyń jankúıerlerimen kezdestik. Qazaqqa, onyń óneri men salt-dástúrine degen mahabbaty erekshe eken. Qazaq tilinde Dımashtyń ánderin jatqa oryndaǵanyn kórip, júregim tolqydy. О́nerde shekera bolmaıdy degen osy shyǵar. Qazaq ónerin dúnıe dıdaryna tanytyp júrgen Dımashqa osy úshin de alǵys aıtqym keledi. Ámanda ulttyq ónerimiz óristeı bersin!

Aıshegúl DENIZ,

Dımashtyń jankúıeri (Túrkııa):

– Qazaq tilin Dımashtyń arqasynda úırendim. Onyń ánderi qazaq ultyna degen qyzyǵýshylyǵymdy oıatty. Son­yń arqasynda qazaq tilin úırenemin dep sheshtim. Qazir tek aýyzeki sóıleýge shamam jet­ti. Biraq bolashaqta áli de tereńirek úırensem deı­min. «Mahabbat ber maǵan, taǵ­dyr» áni – Dımash shyǵar­ma­shylyǵyndaǵy eń súıikti ánim. Búgingi konsertte Dımashpen qosylyp rahattana oryndadym.

Andrea QUDAIBERGEN,

Dımashtyń jankúıeri (Chılı):

– Dımashtyń ónerine ǵashyq bolǵanym sonshalyq, qazaq tilin ǵana emes, qazaqtyń ulttyq mýzykalyq aspaptaryn, ánderin tyńdaý, úırený maǵan úlken qýanysh syılaıdy. О́zderińiz biletindeı, men qazir dombyrada oınaýdy úırendim. Aldaǵy ýaqytta taǵy da basqa aspaptarda oınaýdy úırensem deımin. Búgin men Dımashtyń konsertine arnaıy Chılıden ushyp keldim. Ánshimen alǵashqy kezdesýim bolǵandyqtan, qatty tolqydym. Biraq konsert óte joǵary deńgeıde ótti. Dımashtyń ánderi keremet! Kómeıine bulbul uıa salǵan Dımash ánshi jasaı bersin deımin!

Leonardo KANTRO,

Dımashtyń jankúıeri (Argentına):

– Konsertten keıingi áserim erekshe, sózben aıtyp jetkize almaımyn. Dımashty qoldap júr­gen jankúıerlerdiń basyn qosqan «Dears» bizdi bir otbasyǵa aınaldyrdy desem bolady. Qazir barlyǵymyz týysqan sııaqtymyz. Búgin kózbe-kóz júzdesip, máre-sáre bolyp jatyrmyz. Konsert te keremet ótti. Janymyz rahattanyp shyqtyq. Aldaǵy ýaqytta Dımash Latyn Amerıkasy elderine kelip konsert berse, qýana qarsy alar edik. Osyndaı birtýar ónerpazy, Dımashtaı talantty perzenti bar Qazaq eli shynymen baqytty! Dımashtyń óneri órleı bersin degim keledi!