Qoljazbalar jáne sırek kitaptar ulttyq ortalyǵy bıylǵy arheografııalyq ekspedısııalar nátıjeleri boıynsha esep berip, elimizdiń tarıhyna qatysty kóne derekter kórsetilgen «Uly dala tarıhynyń jazba muralary» atty kórme uıymdastyrdy.
Memleket basshysy Qasym-Jomart Toqaev Ulttyq quryltaıdyń úshinshi otyrysynda elimizdiń tarıhyn zertteý men nasıhattaýǵa, til máselesine, onomastıka, tarıhı muralar men tarıhı tulǵalarǵa, tabıǵı jáne tarıhı mekenderge erekshe nazar aýdarǵan edi. Sonymen qatar Prezıdent tarıhı-mádenı jádigerlerdi, olardyń kóshirmelerin Qazaqstanǵa qaıtarý jumystaryn jandandyrý da asa mańyzdy ekenin atap ótti.
Atalǵan is-sharaǵa Parlament depýtattary, Qazaqstan musylmandary dinı basqarmasy, kitaphanalar men arhıv ókilderi, qoǵam qaıratkerleri qatysty.
Kórmege Ulybrıtanııadan ákelingen 15 qoljazba men arhıvtik qujattyń kóshirmeleri jáne respýblıka aýmaǵynda anyqtalǵan 150-den asa kóne qoljazba men sırek qundy kitaptar qoıyldy. Olardyń ishinde túrki-ıslam mádenıetiniń qundy eskertkishi, alǵash túrki tiline aýdarylǵan qasıetti Quran kitaby (X-XII ǵǵ.), Ábý Nasyr ál-Farabı, Qoja Ahmet Iаsaýı, Súleımen Baqyrǵanı eńbekteriniń kóshirmeleri, XI ǵasyrdaǵy parsy tarıhshysy Gardızıdiń «Zeın-ál-ahbar» qoljazbasy, t.b. bar.
Alqaly jıyn aıasynda ulttyq qundylyqtarymyzdy jınaqtaý, olardy keler urpaqqa saqtaýdyń mańyzdylyǵy men osy saladaǵy ózekti máseleler talqylandy.
Sondaı-aq «Uly dala murasy» ǵylymı-tanymdyq jýrnalynyń jańa nusqasy men shetelderde anyqtalǵan kóne derekter boıynsha «Sheteldik qorlardaǵy qundy jazba muralary» atty katalog-albomnyń tusaýy kesildi.