Dástúrli ánshi, «Daryn» Memlekettik jastar syılyǵynyń laýreaty Asqar Muqııat esimi stýdent kezinen-aq jaqsy tanyla bastady. Kúmbirlegen qońyr daýysy qazaqtyń keń dalasyn eske túsiretindeı erekshe tartymdy hám boıaýǵa baı áýezdiligimen tyńdaǵan jannyń qulaq quryshyn qandyratyn. Ustazy, Qazaqstannyń halyq ártisi Qaırat Baıbosynov sheberhanasynan shyńdalyp shyqqan dúldúl daryn Qazaq ulttyq óner ýnıversıtetin bitirgennen keıin de tyńdarmanyn tamsantýyn támamdaǵan joq.
Talaı baıqaýlarda top jaryp, jeńis tuǵyrynda jarqyrady. Únemi izdeniste júretin án júıriginiń ónerdegi qarymdy qadamyn áıgilegen taǵy bir jarqyn joba – О́zbekstannyń «Ovýz» (Daýys) baıqaýy. Dál qazirgi ýaqytta júrip jatqan án baıqaýynda Asqar Muqııat Qazaq eliniń atynan jalǵyz qatysyp jatyr. Ol jobanyń alǵashqy kezeńinde Abaıdyń «Jarq etpes qara kóńilim ne qylsa da» ánin shyrqap, qazylar alqasynyń biraýyzdan qoldaýyna ıe boldy.
Sarapshylar quramynda otyrǵan О́zbekstannyń Mádenıet mınıstri hám halyq ártisi Ozodbek Nazarbekov, aty ańyzǵa aınalǵan áıgili «Iаlla» ansambliniń korıfeıi, halyq ártisi Farýh Zakırov, О́zbekstannyń ataqty ánshisi Sevara Nazarhan, «Bolalar» (Balalar) tobynyń múshesi, tanymal ánshi Tahır Sadyqov syndy óner maıtalmandaryn búgingi qazaq ánshisi tań qaldyrdy. Talant daýsyna tańdaı qaǵyp, yqylasyn jaýdyrǵan sarapshylar alqasy biraýyzdan ánshige yqylas berdi.
Aýzyn ashqannan Asqarǵa aınalaıynyn jaýdyrǵan О́zbekstannyń halyq ártisi Farýh Zakırov: «Siz án aıtqanda búkil Qazaqstannyń sheksiz keńistigi, keń dalasy men bıik taýlary kóz aldymyzǵa keldi. Bul, árıne, eń aldymen sizdiń týma talantyńyz ben sheberligińizdiń arqasynda. Daýysyńyz ǵajap eken. Qazaqta mundaı ǵajap daýys ıeleri kóp. Bul – sonyń jarqyn mysaly. Sózsiz, jeńiske úmitińiz mol» dep tamsansa, ánshi Sevara Nazarhan: «Men úshin bul ándi qalaı naqyshyna keltirip, sheber jetkizgenińiz mańyzdy boldy. Sizdi qazaqtyń ózge oryndaýshylarymen salystyra almaımyn. Siz – erekshesiz, jalǵyzsyz! Dál osy án arqyly erekshe ekenińiz kórinip tur. Sizdi tyńdap otyryp basyma san túrli oılar keldi, bolashaqta sizben jan-jaqty jumys istegen bolar edim» dep birlese óner týdyrý maqsatyn da aıtyp qaldy.
Al Asqardyń ózi bolsa sypaıy ǵana iltıpat bildirip, joba erejesi boıynsha tórt sarapshynyń arasynan tańdaýyn jasady. Ánshi Ozodbek Nazarbekovtiń tobyna qosyldy. Alda án baıqaýy jalǵasady. Qyzý tartys endi bastalatyn túri bar. Sebebi aıtýly baıqaýǵa birneshe eldiń ánshileri qatysyp jatyr. Kelesi kezeń – batl, ıaǵnı án aıtysy. 500 úmitkerdiń ishinen iriktelip alynǵan 48 ónerpaz ózara juptasyp óner kórsetedi. Asqardyń bul kezeńdegi juby armıan ánshisi bolmaq.