«Parfum de Vie» kompanııasyn bilmeıtinder kemde kem. Búginde otandyq brendke aınalǵan parfıým ónimin óndirý ıdeıasyna Nursultan Muratbekov kezdeısoq kelgen joq. Sannan buryn sapaǵa mán bergen kásipker bıznesti bastaý úshin basyn tasqa da urdy, taýǵa da soqty. Alaıda alǵan betinen qaıtpady.
Nursultannyń komandasy jasaıtyn parfıým Qytaı, О́zbekstan jáne Katar memleketterine eksporttalady. Jas bıznes úshin bul aıtarlyqtaı jaqsy nátıje. Kásipti áriptesi Dıaspen birlesip ashqan. Seriktester qarajatty bızneske teń bólip salý týraly uıǵarymǵa kelipti. Nursultan kerekti qarajatty tabý úshin páterin, basqa múlkin satqan.
«Bastapqyda birshama qarjyny joǵaltyp aldyq. О́ndiris úshin satyp alǵan shıkizatymyz sapasyz bolyp shyqty. Osylaısha, á degennen sátsizdikke ushyradyq. Biraq bul bıznestiń bastapqy kezeńi ekenin túsindik. Sol sátsizdik bizdi sharbolattaı shıryqtyrdy. Jigerimiz janı tústi. Táýekel etkennen keıin isti aıaǵyna deıin jetkizý týraly sheshim qabyldadyq», deıdi ol.
Qazir kompanııa táýligine 5 000 danaǵa deıin hosh ıisti parfıým ónimderin jáne úıge arnalǵan dıffýzorlar men balaýyzdar óndiredi. «Eır Astana» kompanııasyn dıffýzorlarmen qamtyp otyr. «Parfum de Vie» brendi elimizdiń 13 qalasyndaǵy «Beautymania», «MonAmie», «Altyn alma», «Fransýz úıi» sekildi iri-iri saýda úılerinde satylyp jatyr eken. Aldaǵy ýaqytta saýda núkteleriniń sanyn arttyrýdy josparlap otyrǵan jaıy bar.
«О́nimderimizdiń baǵasy qoljetimdi. О́nimniń 70 paıyzy zaýyt arqyly kóterme baǵamen ótkerilip jatsa, qalǵan 30 paıyzy dúkender arqyly satylymǵa shyǵady», deıdi.
Birneshe jyl bederinde otandyq parfıým ónimin brendke aınaldyrǵan seriktestik ókili jyldyq tabysy týraly aıtqysy kelmedi. Áıtkenmen, «Jambylinfo» aqparat agenttiginde keltirilgen qysqasha derekke júginsek, «Parfumer Kazakhstan» JShS-nyń 2022 jylǵy jyldyq tabysy 237 mıllıon teńgeni qurasa, 2023 jyly kompanııa 670 mıllıon teńge kóleminde tabys taýyp úlgeripti.
Jas kásipker endi «Hosh» ataýymen kosmetıkanyń birneshe túrin shyǵarýǵa kirisip jatyr. Aıtýynsha, kompanııada búginde 40-tan asa adam jumys isteıdi. Sonymen qatar Qytaı elinen zaýyt ashyp, kásipti ári qaraı órkendetýdi kózdep otyr.
Tarazda týyp, Almatyda kásibin dóńgeletken Nursultan Muratbekovtiń armany asqaq. Ol bolashaqta qazaq brendin muhıttyń arǵy jaǵyna shyǵarǵysy keledi. Sol úshin tynymsyz eńbektenip jatyr. Kásiptiń kózin tapqan azamattyń bul maqsatyna da jeterine senemiz.
Jambyl oblysy