QARAǴANDY. 26 sáýir. Qaraǵandy oblysyndaǵy tasqyn sýdyń zardabyn shekken Ǵabıden Mustafın (burynǵy Tokarevka) aýylynda turatyn saılaýshylardyń 90 paıyzy saılaýǵa qatysady, dep kútilip otyr. Bul týraly Today.kz habarlady.
Eldi mekendegi saılaý ýchaskesi osyndaǵy orta mekteptiń ǵımaratynda ornalasqan. Bul jerde tań azannan kelýshilerdiń qarasy kóp. Tipti daýys berý merzimi bastalmaı turyp-aq saılaý ýchaskesi esiginiń aldynde kezek quralyp qalǵan. Kent turǵyndarynyń alǵashqy júz shaqty adamnan turatyn legi birinshi saǵattyń ózinde daýys berip úlgerdi.
Aýyldaǵy №271 saılaý ýchaskesiniń tóraǵasy Ǵanııat Ábildınovtiń aıtýynsha, mundaı belsendiliktiń bir ǵana sebebi bar: aýyl turǵyndary burynnan osylaı joǵary azamattyq belsendilik kórsetip keledi.
«Mundaǵy jurt burynnan belsendi bolatyn. Al elimizdiń Prezıdentin saılaý tárizdi asa mańyzdy saılaýǵa eldi meken turǵyndarynyń eshbiri beıjaı qaraı almaıdy. Onyń ústine, bıyl kenetten oryn alǵan sý tasqyny sekildi stıhııaly apattan keıin bıliktiń ózderine qanshalyqty orasan zor kólemde járdem berip jatqanyn olardyń barlyǵy da jaqsy sezinip otyr. Endeshe, elimizdiń Prezıdenti qaıta saılanǵaly jatqan búgingi kúni saılaý ýchaskelerine kelip, ózimizdiń únimizdi bildirýge bizdiń bárimiz de asa yqylastymyz. Bul tipti bizdiń jáı azamattyq boryshymyz oryndaýymyz ǵana bolyp tabylady. Bizdiń aýyldyń jurty osyndaı pikirdi ustanyp otyr», - dedi ol.
Al kent turǵyny Sergeı Grıshenko bıyl óz ómirinde birinshi ret saılaýǵa qatysqaly otyr eken. Soǵan qaramastan, saılaýǵa kelý ne kelmeý týrasynda kúmáni bolmapty. Ol da osyndaı qysyltaıań kezde qamqor qolyn sozǵan memleketke óziniń rızashylyǵyn bildiredi.
«О́ziniń saılaý jónindegi quqyǵyn oryndaý – árbir saılaýshynyń mindetti qyzmeti. Sebebi, ortaq úıimiz – Qazaqstannyń bolashaǵy bizdiń bárimizdi de tolǵandyrady. Sondyqtan da biz úshin elimizdi kim basqarsa da báribir emes. Bizge eldi alda da talaı asýlarǵa bastaıtyn naǵyz lıder kerek. Biz bıylǵy jyly biraz qıyndyqtarǵa tap boldyq. Shynymdy aıtsam, men memleket osy apattan zardap shekkenderge kómektesedi dep oılmappyn. Al berilgen járdemnen keıin men ózimniń qandaı elde turyp jatqanymdy tereń sezine tústim. Osydan keıin elimniń bolashaǵy úshin daýys berýge tıis ekenime esh kúmánim qalmady», - dep oıyn tarqatyp aıtty ol.
Jergilikti saılaý komıssııasynyń málimeti boıynsha, kentte qazir 1 539 yqtımal saılaýshy turady. Aldyn ala jasalǵan boljam boıynsha bulardyń keminde 80-90 paıyzy saılaýǵa qatysýǵa tıis.
Aıqyn Nesipbaı.
Derek, sýret: Today.kz.