QYZYLORDA. 26 sáýir. Tańǵy saǵat 07:00-de Qyzylorda oblysy boıynsha barlyq saılaý ýchaskeleri óz jumystaryn bastady. Oblysta barlyǵy 345 saılaý ýchaskesi bar. Al saılaýda aımaq boıynsha 396 465 adam daýys beredi. Bul týraly egemen.kz tilshisi habarlady.
Osyǵan deıin óńirde 3 myńnan astam baıqaýshylar tirkelgen, olardyń ishinde azamattyq qoǵam ókilderi, úkimettik emes uıymdar, saıası partııalar, BAQ ókilderi jáne 16 sheteldik baıqaýshylar bar. Dál qazir daýys berý óte belsendi júrip jatyr. Máselen, Syrdarııa aýdany, Tereńózek kentiniń №158 saılaý ýchaskesinde eń birinshi bolyp soǵys ardageri Dáýitbaı Saqtaǵanov daýys berdi. Saıası naýqannyń shymyldyǵyn bata berip ashqan aqsaqaldyń ıyǵyna shapan jabylsa, júzinshi bolyp daýys bergen saılaýshyǵa uıaly telefon syıǵa tartyldy. Halyqtyń saılaýǵa degen yntasyn arttyratyn mundaı shara Jalaǵash aýdanynda da boldy. Aıtalyq, saılaý ýchaskesine eń birinshi bolyp kelip, daýys bergen turǵyndarǵa yntalandyrý syılyqtary berildi. Barlyq saılaý ýchaskelerinde konsertter uıymdastyrylýda. Kent ortalyqtarynda konsert baǵdarlamalary ótip jatyr.
Saılaýǵa jańa bosanǵan analar da qatysty. Qyzylorda qalasyndaǵy №214 saılaý ýchaskesi qalalyq perınataldy ortalyqta ornalasqan. Osy ýchaskede analar óz sábıleriniń jarqyn keleshegi úshin tańdaýlaryn jasady. Osynaý sharanyń mańyzdylyǵyna nazar aýdarǵan analar eldiń bolashaǵy úshin daýys berip jatqandaryn aıtyp, ózge de analardy saılaýda belsendilik tanytýǵa shaqyrdy. Atalǵan ortalyqta 151 ana daýys berdi.
Jalpy, óńir boıynsha saılaý óte belsendi ótip jatyr.
Erjan Baıtiles.
Derek, sýret: egemen.kz.