Almaty qalasyna bertinde qosylǵan Alataý aýdanynyń halqy búginde 60 myńǵa jetip jyǵylatyn bolsa, endigi jerde olar «Nurkent» shaǵyn aýdanynda bir aýysymda 400 adam qabyldaı alatyn jekemenshik klınıkada tegin medısınalyq kómek alatyn boldy.
Medısınalyq ortalyq bıyl mamyr aıynda ashylǵan bolatyn. Endigi jerde kepildik berilgen kólem aıasynda tirkelgen halyq úshin munda tegin medısınalyq qyzmetter kórsetilse, buǵan jedel járdem, shuǵyl stasıonarlyq jáne ambýlatorııalyq kómek, onkologııalyq kómek, týberkýlez kezindegi pallıatıvtik kómek, beıindi mamandardyń keńesi, ońaltý, belgili bir aýrýlar jáne dári-dármekter tizimi boıynsha buıryqqa sáıkes dári-dármekpen qamtamasyz etý kiredi. Búginde medısınalyq ortalyqqa aýdannyń 23,2 myń turǵyny tirkelgen.
Osy emhanaǵa jýyrda qala ákimi Erbolat Dosaev arnaıy baryp, ujymmen kezdesip qaıtty. Alańy 5,5 myń sharshy metr ǵımarat medısınalyq jabdyqtarmen jabdyqtalǵan. Zamanaýı emhananyń bir ereksheligi – bronh demikpesi, bronhıt jáne pnevmonııa aýrýlaryn emdeýge arnalǵan tuz shahtasyna qosa jańa týǵan náresteler men 6 jasqa deıingi balalardaǵy estý qabiletin teksere alatyn aýdıo skrınıng apparaty bar.
Almaty qalasynyń ákimi jergilikti turǵyndarmen kezdesý barysynda elge yńǵaıly bolý úshin jańa tehnologııalardy engize otyryp, kórsetiletin medısınalyq qyzmetterdiń sapasyn arttyrý mańyzdy ekenin tilge tıek etip, osyndaı mańyzdy áleýmettik nysandardy iske asyrýǵa qatysatyn mesenattardy qoldaıtynyn bildirdi.
Osy «Nurkent» shaǵyn aýdanynda memlekettik medısınalyq mekemelerdiń joq ekenin, eń jaqyn degen №29 qalalyq emhana «Zerdeli» shaǵyn aýdanynda ornalasqanyn aıta ketý kerek. Jekemenshik emhananyń ashylýy «Nurkent», «Aqkent», «Zerdeli», «Alǵabas», «Terekti», «Daraboz» shaǵyn aýdandarynyń 60 myńnan astam turǵynyn medısınalyq qyzmetpen qamtýǵa múmkindik bermek. Bul qalalyq emhananyń júktemesin azaıtýda septigi úlken.
ALMATY