KО́KShETAÝ. 26 sáýir. Aqmola oblysynda saılaý belsendi ótip jatyr. Bul týraly egemen.kz tilshisi habarlady.
Oblystyq saılaý komıssııasynyń tóraǵasy Ádilhan Shaıahmetovpen tildeskenimizde óńirde Qazaqstan Respýblıkasy Prezıdentiniń kezekten tys saılaýy Konstıtýsııalyq zańǵa sáıkes ótkizilip jatqany aıtyldy. Barlyq 20 aýmaqtyq jáne 808 ýchaskelik saılaý komıssııasy saıası naýqandy joǵary uıymdastyrýshylyq ekpinmen bastady. Oblysta 462208 adam daýys berýshiler tizimine tirkelgen.
Saılaý kúngi saǵat 14.00-degi málimet boıynsha 355794 adam jergilikti saılaý ýchaskelerinde daýys berdi. Bul jalpy kórsetkishtiń 76,97 paıyzyn quraıdy. Ádilhan Shaıahmetovtiń aıtýynsha, jurtshylyqtyń belsendiligi burnaǵy jyldarǵa qaraǵanda anaǵurlym joǵary.
Muny gazet qosynyna túsip jatqan habarlar aıqyndaı túsýde. Esil, Atbasar, Ereımentaý, Selınograd jáne basqa aýdandar oblystyń orta kórsetkishinen joǵary málimet berýde. Jeke mekemelerdegi belsendilik te kóńil ósiredi. Máselen, oblystyq ishki ister departamentiniń bastyǵy, polısııa general-maıory Jaılaýbek Halyqulymen sóıleskenimizde ol: «Búgin 3124 aqmolalyq polısııa qyzmetkeri men olardyń otbasyndaǵy 2229 adam daýys berýge qatysýda. Qazirgi kórsetkishimiz 90 paıyzǵa jaqyndady»,-dedi.
Oblysta saılaýdyń ótkizilýin 30 halyqaralyq baıqaýshy qadaǵalaýda.Olardyń jumysyna Sergeı Kıbasov jetekshilik etetin arnaıy Ortalyq kómek-qoldaý kórsetýde. Sondaı-aq, «Saılaýdyń ótkizilýin baqylaý jónindegi respýblıkalyq qoǵamdyq komıssııa» jumys isteýde. Biz saılaý ýchaskelerinde, oblystyq saılaı komıssııasynda baıqaýshylarmen ótkizilgen brıfıngterge qatystyq. Baıqaýshylar tarapynan saılaýǵa qatysty eskertpeler túsken joq.
El azamattary Prezıdent saılaýynyń memlekettik mańyzdaǵy shara ekendigin, ol kóp ultty halqymyzdy biriktire túsetinin jáne táýelsiz respýblıkamyzdyń bolashaǵyna aıqyndaıtynyn pash etýde. Bul oblys turǵyndarynyń azamattyq belsendiliginiń artýynan, saılaýǵa ıgi úmitter jetegimen kelgendiginen baıqalyp turdy.
Oblystyq saılaý komıssııasy ár eki saǵat saıyn jer-jerden málimetter jınaýda. Kórsetkish arta túsetinine senim nyq.
Baqbergen Amalbek.
Derek, sýret: egemen.kz