ORAL. 26 sáýir. Prezıdent saılaýy kúngi sáýirdiń aq tańynda batysqazaqstandyqtar ádettegisinen erte oıandy. Tańǵy 6-dan bastap kóshelerde kádimgideı qımyl-qozǵalys bastalyp ketti. Bul týraly egemen.kz tilshisi habarlady.
Biz saǵat tili 7-ge jaqyndaǵanda Eýrazııa kóshesi mańyndaǵy №22 orta mektep ǵımaraty janyndaǵy № 486 saılaý ýchaskesinde turǵan edik. Bir kezde osy araǵa júzi jarqyn, kóńil-kúıi kóterińki jas jigit tez adymdaı basyp jaqyndady. Kózinde ot-ushqyn bar. Bul jasy 18-ge tolyp tuńǵysh daýys berýge kelgen joǵary oqý ornynyń 1-kýrs stýdenti Ǵabdol Tilekov bolyp shyqty. «Biz ómir súrip jatqan búgingi Qazaqstannyń álemdik qaýymdastyq arasyndaǵy orny men salmaǵynyń joǵarylap kele jatqany júregime jylylyq uıalatady. Biz jastar budan da kóri jaqsyraq ómir súrý deńgeıine qushtarmyz. Ári elimizdiń ál-aýqatynyń arta túsýine múddelimiz. Bul – bizdiń tańdaýymyzǵa baılanysty. Jeke ózim osy tańdaýdy tezirek daýy berý jáshigine túsirý úshin erte keldim», - deıdi ol.
Daýys berý úderisi bastalǵan tańǵy 7 men 10 aralyǵynda oblys ortalyǵyndaǵy birneshe saılaý ýchaskelerinde bolyp ondaǵy jumystyń syıpatymen tanystyq. Sonda bir baıqaǵanymyz ár ýchaskeni halyqqa qyzmet kórsetý ortalyqtarymen baılanystyratyn telefondar ornatylypty. Sonymen birge eriktiler daýys berýge kelgen jasy ulǵaıǵan adamdar men múgedek jandarǵa kómek berip jatqandaryna kýá boldyq. Olardyń keıbiri ózderiniń aty-jónin tizimnen taba almasa, oǵan da aqyl-keńester berilýde. Daǵdaryp júrgenderdiń qaı saılaý ýchaskesine jatatyny anyqtalýda. Halyqqa qyzmet kórsetý ortalyǵymen baılanystyń qajettiligi de osynda bolyp shyqty. Iаǵnı qandaı jaǵdaıda da eshkim daýys bermeı keri ketip jatqan joq.
Saǵat tili kúndizgi 12-ni soqqan kezde Oral qalasyndaǵy Dostyq dańǵyly boıynda ornalasqan Batys Qazaqstan oblystyq saılaý komıssııasynyń ǵımaratyna keldik. Munda da qyzý qımyl-qozǵalys. Zal ortasyna tablo-televızor qoıylypty. BAQ ókilderi odan ár eki saǵat saıyn jınalatyn daýys berý derekterimen tanysa alady eken. Dál osy sátte biz saǵat 12-00 ge deıin oblys boıynsha daýys berýge tirkelgen 404 465 saılaýshynyń 40 paıyzdan astamy óz tańdaýlaryn jasap úlgergenin kórdik.
Bul 164 455 saılaýshy Prezıdent saılaýy kúni osy ýaqytqa deıin azamattyq belsendilik tanytqanyn kórsetedi. Al oblystaǵy Shyńǵyrlaý Aqjaıyq jáne Terekti aýdandary saılaýshylarynyń belsendiligi budan da joǵary turdy. Bul óńirlerde daýys berýshilerdiń paıyzdyq kórsetkishi sol sátte 50-48-di qurady.
Temir Qusaıyn.
Derek, sýret: egemen.kz