Munaıly óńirde jyl saıyn turaqtandyrý qorynda saqtalatyn áleýmettik mańyzǵa ıe azyq-túlik qoryn kóbeıtýge nazar aýdarylyp otyr. Máselen, keıingi 3 jylda osyndaı taýarlar qory 3,5 ese ulǵaıǵan.
«Atyraý» áleýmettik-kásipkerlik korporasııasy» AQ tóraǵasy Danııar Tahanovtyń málimetine súıensek, bes jyl burynǵy statıstıkamen salystyrǵanda turaqtandyrý qoryndaǵy áleýmettik mańyzy bar azyq-túlik taýarlarynyń túri 5-ten 18-ge, satý núkteleri 4-ten 54-ke jetipti. Al tutynýshylarǵa satylǵan kókónis óniminiń kólemi 3 jylda 1 461-den 5 136 tonnaǵa deıin artqan. Qazir turǵyndar kúndelikti tutynatyn osyndaı taýarlardyń baǵasyn turaqtandyrý úshin aınalym qarajatyn tolyqtyrý qolǵa alynyp otyr. Osy maqsatty iske asyrý úshin jergilikti 2 saýda jelisimen, 8 taýar óndirýshimen kelisimshart jasalǵan.
Oblys ákiminiń orynbasary Jasulan Bısembıevtiń pikirinshe, áleýmettik mańyzy bar azyq-túlik baǵasyn turaqtandyrý baǵytyndaǵy jumysty jandandyrý qajettigi týyndap otyr. О́ıtkeni eń basty másele – kúndelikti tutynatyn azyq-túlik taýarlarynyń baǵasyn shekti deńgeıden asyrmaý. Sol sebepti baǵaǵa baıypty kózqaras qajet.
«Osy oraıda ákimdik janynan áser etýshi faktorlardy joıý mańyzdy. Áleýmettik mańyzy bar azyq-túlik baǵasyn negizsiz ósirýge jol berýge bolmaıdy. Oblys turǵyndary úı mańyndaǵy dúkender men shaǵyn marketterde baǵa kóterilgenin baıqasa, shaǵymdy kimge, qaıda joldaý qajettigin bilýge tıis. Baǵany negizsiz ósirgenderge qarsy jumys toqtamaıdy», dedi Jasulan Bısembıev.
Biraq tutynýshyǵa azyq-túlik usynatyn saýda jelileri baǵany turaqty deńgeıde ustaýdy «umytyp» ketedi. Tipti tabıǵı sıpattaǵy tótenshe jaǵdaı kezinde baǵany shekti deńgeıden asyryp jibergender bar. Atyraý oblystyq saýda jáne tutynýshylar quqyǵyn qorǵaý departamenti basshysynyń orynbasary Erkebulan Taǵashevtyń málimetinshe, bıyl 6 aıda «Saýda qyzmetin retteý týraly» zań talaptaryn buzǵan 51 kásipkerlik sýbektige jospardan tys tekserý júrgizilgen. Tekserý qorytyndysymen 46 kásipkerlik sýbektige 16 eskertý berilip, 30 ákimshilik aıyppul salynǵan. Aıyppuldyń jalpy somasy 2 mln 817 myń 691 teńge bolǵan.
«Mamyr aıynda ákimdik óńirde áleýmettik mańyzy bar azyq-túlik taýarlaryna ruqsat etilgen shekti bólshek saýda baǵalarynyń mólsherin bekitti. Osyǵan oraı monıtorıngtik top apta saıyn áleýmettik mańyzy bar azyq-túlik taýarlarynyń baǵasyn qadaǵalady. О́ńirdegi saýda nysandarynyń ıelerine baǵany turaqtandyrý jóninde keńes berildi. Soǵan qaramastan tutynýshylar aryzyna sáıkes Atyraý qalasyndaǵy «Anvar», «Marko», «Iаrmarka», «Masha Frýt», Qulsary qalasyndaǵy «Ideal» sýpermarketine jáne «Ilııasova G.B.» jeke kásipkerligine «Ákimshilik quqyq buzýshylyq týraly» kodekstiń 202-babyna sáıkes shara qoldanyldy. О́ıtkeni olar tótenshe jaǵdaı kezinde belgilengen taýarlardy shekti baǵadan asyryp satqan», dep habarlady Erkebulan Taǵashev.
Sondaı-aq departamentke jyl basynan beri tutynýshylardan 424 aryz túsken. Onyń ishinde 230 aryz qanaǵattandyryldy. Demek budan tutynýshylar talaby oryndy bolǵany baıqalady. Al 82 aryz ıesine sotqa shaǵymdaný jóninde jazbasha túsinik berilgen. Sonymen birge 84 aryz tıisti memlekettik organdarǵa qaıta joldanyp otyr. Keıin 8 tutynýshy aryzyn keri qaıtaryp alǵan. Qazir 20 aryz qaralyp jatyr.
«Tutynýshylar aryzyn qaraý kezinde jospardan tys 12 tekserý júrgizildi. Sonyń nátıjesimen kásipkerlik sýbektilerine 10 eskertý berildi. Departament tarapynan berilgen nusqaýdy oryndamaǵany úshin Atyraý qalalyq mamandandyrylǵan sotynyń qaýlysymen «Mechta Market» JShS-ǵa 1 mln 300 myń teńge kóleminde aıyppul salyndy», dep málimdedi E.Taǵashev.
Atyraý oblysy