Qyzylordada «Orda Glass LTD» JShS-nyń shyny zaýyty turaqty jumys istep keledi. Osydan eki jyl buryn iske qosylǵan zaýyt az ýaqyt ishinde qýatty kásiporynǵa aınaldy. Seriktestik bıylǵy maýsym aıynan bastap energııa únemdeıtin shyny shyǵara bastady. Osylaısha, qyzylordalyq zaýyt mundaı óndiristi qolǵa alǵan Ortalyq Azııadaǵy alǵashqy jáne jalǵyz kásiporyn bolyp otyr. Bul áınekter kún sáýlesinen jylý alyp, ony boıynda saqtaıdy.
Zaýyttyń óndiristik bólimi bastyǵynyń orynbasary Ǵalymjan Qýatov jumys barysyn tanystyryp ótti. О́ndiris ornynda shıkizat óńdeıtin zaýyt boı kóteripti. Osynyń arqasynda qazir kvars qumy men dolomıtti ózderi óńdep otyr. Aqtóbeden jetkiziletin qum áýeli keptirilip, magnıtti jeli arqyly ótkizilgende quramyndaǵy temir alynyp qalady. О́ıtkeni shıkizat quramynda temir kóp bolsa, ónimniń móldirligi kemı bermek.
«Qazir shyny zaýytynyń qýattylyǵy 91 paıyzǵa jetti. Jobalyq quny táýligine 600 tonna bolatyn bolsa, osy kúni 530 tonna shyǵaryp otyrmyz. Jetpis paıyz ónimimiz ishki naryqta qalsa, qalǵany Ortalyq Azııa, Reseı, Ázerbaıjan men Grýzııaǵa jóneltilip jatyr», deıdi.
Bastapqyda 40 mlrd teńge shetel ınvestısııasy salynǵan zaýyt qazir aýmaǵy 50 gektar bolatyn alyp keshenge aınalǵan. Onda úsh aýysym boıynsha 400-ge jýyq adam jumys isteıdi. Deni – jergilikti azamattar. Olarǵa buryn-sońdy elimizde bolmaǵan óndiristiń qyr-syryn qytaılyq mamandar úıretedi.
Zaýyttaǵy basty nysan – balqytý peshi. Oǵan 7 túrli qospadan quralǵan shıkizat úzdiksiz jetip tur. Mundaǵy qalypty temperatýra 1 550 gradýs eken. Qyzýdyń 1 gradýsqa tómendegeni de ónim sapasyna aıtarlyqtaı áser etedi. Mamandar pesh 8-10 jylǵa deıin úzilissiz jumys isteýi kerektigin aıtady. Sondyqtan qosymsha gaz jetkizetin jeli qarastyrylyp, rezervke qoıylǵan. Al balqyǵan suıyqtyqty syńǵyrlaǵan áınekke aınaldyratyn jeli boıyndaǵy qondyrǵylardyń barlyǵy derlik Italııa, Fınlıandııa, Germanııa, Túrkııa men Qytaıda shyǵarylǵan zamanaýı úlgidegi tehnologııalar.
Jeli boıynda áınek formasyn qalyptastyratyn arnaıy qondyrǵy tur. Shynynyń kólemin avtomatty qondyrǵylar belgileıdi. Áınektiń shetinen kesilgen bóligi birden shıkizatqa qaıta jóneltilip jatyr. Dál osy jerde qabattap jınaǵanda jabysyp qalmaýy úshin arnaıy untaq sebiledi. Osydan keıin qoımadaǵy robottar nemis qondyrǵysy bergen nusqaý boıynsha tabaqsha shynylardy markasyna qaraı jınaıdy.
Qoıma janynda zaýyt tapsyrysymen daıyn ónimge jáshik daıyndaıtyn seriktestik bar. Qalada jylyna 197 myń tonna ónim shyǵaratyn óndiris suranysyn óteý úshin osyndaı 5 kompanııa jumys istep jatyr eken. Qoımaǵa temirjol tuıyǵy arqyly kiretin vagondarǵa tonnalaǵan áınekterdi aspaly krandar tıeıdi. Suranysqa ıe ónimniń biri – djambo-áınek. Uzyndyǵy – 6, eni 3,2 metr bolatyn shyny da qoımada uqypty jınalyp tur.
«Orda Glass LTD» seriktestiginiń bıylǵy tabysy – energııa únemdeıtin shyny óndirisi. Jalpy quny 6,7 mlrd teńge bolatyn dál osy joba boıynsha jylyna 5 mln sharshy metr ónim shyǵarylady.
«Bul áınekterdiń jylý saqtaýdaǵy tıimdiligi áldeqashan dáleldengen. Sapany eskerip, qazir M0+ markasyn shyǵaryp jatyrmyz. Shilde aıynyń sońyna deıin 170 myń sharshy metr kúnnen qorǵaıtyn jáne jylý únemdegish áınek óndirdik», deıdi óndiristik bólim bastyǵynyń orynbasary Ǵalymjan Qýatov.
Mamandar shyny zaýytynyń iske qosylýy shıkizattyq emes sektordy damytyp, ilespe óndiristerdi qurýǵa múmkindik beretinin aıtady. О́ńirdegi ındýstrııalandyrý baǵdarlamasynyń negizgi jobasy sanalatyn zaýyttyń iske qosylýyna «Kazakh Invest» UK» AQ qoldaý tanytypty. Aksıonerlik qoǵamnyń óńirdegi ókildiginiń jetekshisi Murat Balabaev óndiristik aımaqta shyny klasterin qalyptastyrý bastamasy qolǵa alynǵanyn aıtyp ótti. «Kazakh Invest» UK» AQ men oblys ákimdiginiń birlesken jumystary arqasynda Germanııa tehnologııasymen shyny bótelkeler shyǵaratyn óndiris óz jumysyn bastaıdy. Qytaı men Belarýs ınvestorlarymen avtokólik terezelerin shyǵarýǵa kelisim jasaldy. Shyny talshyqtaryn óndirý baǵytyndaǵy jobalar da pysyqtalyp jatyr.
«2021 jyly elimiz syrttan 260 mln dollarǵa áınek aldyrǵan eken. Onyń basym bóligi – qurylysta keńinen qoldanylatyn osy tabaqsha shynylar. Al Qyzylordada kompanııa iske qosylǵaly beri ónim baǵasy tómendep, syrtqa táýeldilikten aryldyq. Qazir kásiporyn ónimi ishki suranysty tolyq ótep, eksportqa da shyǵarylyp jatyr», dedi óńirlik fılıal dırektory.
QYZYLORDA