Qostanaı oblysy Arqalyq qalasyndaǵy Dala ólkesi tarıhy mýzeıinde asa kórnekti aqyn, Memlekettik syılyqtyń laýreaty Syrbaı Máýlenovtiń birqatar jeke qoljazbasy jáne áriptes qalamgerlermen jazysqan hattary saqtalǵan. Sondaı qundy jádigerdiń biri – belgili jazýshy, Qaraǵandy qalasynyń qurmetti azamaty Jaıyq Bekturovtyń Syraǵańa jazǵan haty. Onda Jaıyq aqsaqal «Qazaq ádebıetin» basqaryp otyrǵan Syrbaı Máýlenovke syılasatyn joldasy ári gazet oqyrmany retinde óz usynysyn aıtypty. Endeshe, hatty oqyp kórelik.
«Qazaq ádebıeti» gazetiniń bas redaktory Syrbaı Máýlenov joldasqa!
Asa qadirli Syrbaı!
Jańa qonys-tuǵyryńyz qutty bolsyn! Siz úshin bul tór jańa da emes qoı, áýelgi, 1955 jyly qaıta shyqqandaǵy osy gazettiń alǵashqy shańyraq ıesi de ózińiz emes pe edińiz? Ondaǵydaı emes, endi ornyǵyp kóp otyryńyz.
Biz, bul gazettiń erteden bergi oqýshylary, shamamyz kelgenshe gazetti jurtshylyqqa kóp taratýǵa kúsh salyp baǵamyz. Buǵan senersiz ǵoı.
Endigi bir joldastyq, oqýshylyq tilek, áýeli óz qabyrǵańyzǵa salyp kóretin usynysym bar. «Lıteratýrnaıa gazeta» óziniń bir shekesine – A.Pýshkınniń, ekinshi shekesine – M.Gorkııdiń beınesin salyp shyǵaratynyn jaqsy bilesiz. Bul orys tarıhynyń eki dáýirdegi kóshbasshysyn ádebıet legine de, ádebıet belesinde de qadir-qurmet tutqany ǵoı. Al siz myna basynyń taǵylýyn ózgertken osy ózimizdiń «Qazaq ádebıetiniń» aldyńǵy shekesine – Abaıdy, ekinshi jaǵyna – Sákendi salyp shyǵaratyn bolsańyz qaıter edi? Buǵan joǵary jaqtyń qaýlysy kerek bola qoımas, assa Jazýshylar odaǵy basqarmasy sekretarynyń, qalsa óz alqańyzdyń uıǵaryndysy jeter. Muqań áıgili jazýshy ǵoı, biraq naryq turǵysynan, alǵashqy keńestik kóshbasshylyǵy jaǵynan Sáken aǵańyz qolaıly bolar. Artyq sózim bolsa keshirim suraımyn.
Qurmetpen
Jaıyq Bekturov.
22.05.1971 jyl».