Ejelgi túrikter qonystanǵan ólkeniń biri – qazirgi Baı-О́lke dalasy. 2009 jyly Mońǵolııa Ǵylym akademııasy «Túrkitaný» ortalyǵy ázirlep, Ulanbatyr qalasynda jaryq kórgen «Baı-ólke aımaq terrıtorııasyndaǵy tarıhı eskertkishter» atty albom-kitapqa atalǵan ólkeden tabylǵan 80-nen astam ártúrli poshymdaǵy balbal tizimge alynypty.
Osylardyń arasynda aıryqsha atap óterligi – Daıan batyr balbaly. Bul jádiger Saqsaı sumyn jerindegi Daıan kóli aýmaǵynda ornalasqan. On shaqty jyldyń aldynda Ulanbatyr qalasynda mońǵol tilinde jaryq kórgen «Altaı taýy arheologııalyq eskertkishter: Baı-О́lke aımaǵy» atty jınaqta atalǵan nysanǵa «VI-VIII ǵasyrda bılik júrgizgen ertedegi Túrik qaǵanatyna qatysty mura» degen anyqtama berilipti.
Músin tastyń bıiktigi 160 sm, eni 40 sm, qalyńdyǵy 20 sm, jádiger surǵylt granıt tastan asa kórkem sheberlikpen qashalyp, jan-jaǵy 4h4 metr kólemde tórtburysh qorshaýǵa alynǵan.
Balbaldyń syrǵaly qulaǵy, qalyń qabaǵy, buzaý tumsyǵy, shoqsha saqaly, jalpaq beti tamasha músindelgen. Sonymen qatar ıyǵyn jaýyp turǵan uzynsha qaptamasy men taspaly kıimi, moınyna taqqan qus qanatty alqa-tumary sándi de, mándi.
Bul jádigerdi alǵash ret ǵylymı ortaǵa tanystyrǵan adam – orys oqymystysy, jıhanger, folklorshy, túrki-mońǵol halyqtarynyń etnografııasyn zertteýshi G.N.Potanın eken. Jaryqtyq bul tasty 1876-1880 jyldary Batys Mońǵolııaǵa jasaǵan sapary kezinde kórip, 1881 jyly Sankt-Peterbýrgte jaryq kórgen «Ocherkı severo-zapadnoı Mongolıı» atty eńbegine engizipti. Grıgorıı Nıkolaevıch: «Balbal shaǵyn terezesi bar dóńgelek poshymdy úıdiń ishinde tur. Soǵan qaraǵanda, bul adamdar zııarat etetin nysan tárizdi» dep jazypty. Qazir osy qorshaý úıdiń belgisi de qalmaǵan.
Baz bir ǵalymdar músinniń moınyndaǵy qus qanatty aıqysh tumaryna qarap, jádiger VI-VIII ǵasyrda hrıstos dinin pir tutqan qaýymnan qalǵan degen paıym aıtsa, bertinde taǵy bir oqymystylar bul ólke Shyńǵys qaǵan zamanynda naıman taıpasynyń mekeni bolǵany anyq. Ol kezde naıman taıpasy hrıstos jolyn ustanǵan, bul sodan qalǵan belgi bolýy múmkin depti. Sondaı-aq nysannyń Daıan atalýy, naımannyń ataqty Taıan hanyna arnap qoıylǵan-mys degen de pikir bar.
Bir qyzyǵy, dál osy Daıan batyr balbalyna óte uqsas ekinshi músin Qyrǵyz eliniń Ystyqkól óńirinde tur. Biraq onyń moınyndaǵy salpynshaq alqanyń tumary «F» (kırıll) árpi sııaqty.