Memleket basshysy Qasym-Jomart Toqaevtyń Qazaqstan halqyna arnalǵan kezekti Joldaýy «Ádiletti Qazaqstan: zań men tártip, ekonomıkalyq ósim, qoǵamdyq optımızm» dep ataldy. Eldiń erteńi úshin eń qajetti úsh máseleniń tórkini men sheshilý joldary tarqatyldy. Iаǵnı elimizdegi quqyqtyq jáne ekonomıkalyq reformalarǵa, áleýmettik ádilettilik pen qoǵamdaǵy optımızmniń kúsheıýine erekshe kóńil bólindi.
Ádilettilik, zań men tártip, ekonomıkalyq turaqtylyq jáne halyqtyń optımızmi – memleketimizdiń turaqty damýynyń negizi. Bul jolǵy Joldaýda eldiń kadrlyq áleýetin arttyrýǵa erekshe mán berilgen. Memleket basshysy ekonomıkany bilikti mamandarmen qamtamasyz etý qajettigin atap ótip, sý, energetıka, qurylys jáne basqa da salalardaǵy kadr tapshylyǵyn joıýdy mańyzdy mindet retinde júktedi.
Prezıdent Úkimetke joǵary bilim berý salasyn halyqaralyq bilim berý keńistigimen yqpaldastyrý jumysyn jalǵastyrýdy tapsyrdy. Qazir elimizde sheteldik 23 joǵary oqý orny qyzmetin bastaǵanyn, olarǵa qoldaý kórsetý kerektigin jáne memlekettik tapsyrysty arttyrý qajettigin aıtty. Sonymen birge granttardyń sapaly bilim berýge yqpal etýge tıis ekenin, al qarjyny durys ári maqsatty túrde jumsaý kerektigin eskertti. Bilim berý salasynda báseke bolǵan jerde myqty mamandardy daıarlaýǵa, oqý úderisiniń sapaly bolýyna, eń mańyzdysy, ata-analar tarapynan da tańdaý jasaýyna múmkindik bolary anyq.
Sondaı-aq ınnovasııalyq saıasatty ǵylymı-tehnologııalyq basymdyqtarmen úılestirý qajettiligi de kóterildi. Bul qadam ár salanyń ınnovasııalaryn damytýǵa serpin berip, qoldanbaly ǵylymnyń áleýetin arttyrýǵa jol ashary haq. Prezıdent tehnıkalyq jáne kásiptik bilim berý mekemeleriniń de bilikti kadrlar daıarlaýdaǵy rólin atap ótti. Úkimetke kolledj túlekterin memlekettik qyzmetke qabyldaý múmkindigin qarastyrýdy tapsyrdy.
Memleket basshysynyń kásiptik bilim salasyna reformalar jasaý týraly aıtqan oılary elimizdiń ekonomıkalyq damýy men áleýmettik turaqtylyǵyn nyǵaıtýda úlken mánge ıe. Prezıdent 2025 jyldy Jumysshy mamandyqtary jyly dep jarııalaı otyryp, osy saladaǵy reformalar arqyly qoǵamda eńbekqorlyq pen kásibılikti dáripteý qajettigin erekshe atap ótti. Sebebi óz isiniń mamandary dáriptelgen qoǵamda isine sheksiz berilgen naǵyz patrıot adamdar sany artary túsinikti.
Eńbek adamynyń mártebesin kóterý – bul tek ekonomıkany damytýǵa ǵana emes, sonymen qatar qoǵamda adal eńbekke degen qurmetti qalyptastyrýǵa baǵyttalǵan mańyzdy qadam. Memleket basshysynyń «Adal azamat – Adal eńbek – Adal tabys» qaǵıdaty bizdiń bolashaǵymyzdy anyqtaıtyn negizgi ustanym bolýǵa tıis. О́z isin jetik meńgergen, jaýapkershilikti tereń sezingen mamandar ǵana eldiń damýynda mańyzdy ról atqara alady.
Prezıdenttiń muǵalimderge, dárigerlerge, mádenıet qaıratkerlerine qurmetti ataqtar berý týraly bastamasy da qoǵamda eńbekke degen oń kózqarasty qalyptastyrýǵa yqpal etedi. Bul bastamanyń aıasyn keńeıtý – bizdiń qoǵamymyzda eńbekqorlyq pen kásibılikti joǵary baǵalaýdyń mańyzdy qadamy.
Kez kelgen eńbek qadirli bolýǵa tıis. Árbir adam óz isine adal, kásibı jáne jaýapty bolýy arqyly ǵana eldiń turaqty damýyna úles qosa alady. Bul – bizdiń qoǵamymyzdyń basty ustanymy bolýy qajet.
Elimizde energııa tapshylyǵynyń kúsheıip kele jatqanyn, senimdi jáne ekologııalyq taza qýat kózderiniń qajettiligin erekshe atap ótti. Osy oraıda, atom energetıkasyn damytý máselesi kún tártibine qoıyldy. Prezıdenttiń aıtýynsha, ekonomıkanyń qarqyndy damýy energııaǵa degen suranysty arttyrady, al mundaı suranysty tek atom energetıkasy qanaǵattandyra alady. Qazirgi ýaqytta álemniń 30-dan astam elinde 200-ge jýyq atom elektr stansasy jumys istep tur, bul olardyń tıimdiligin kórsetedi.
Elimizdiń ulttyq múddeleri men uzaqmerzimdi damý josparlaryn eskere otyryp, biz de osy baǵytta alǵa qaraı jyljýymyz qajet. Prezıdent atom elektr stansasyn salý týraly sheshimdi baıyppen qabyldaý qajettigin, mundaı strategııalyq mańyzdy qadamdardy qoǵamda keńinen talqylaýdyń ózektiligi týraly birneshe ret atap ótti.
El ómirindegi árbir mańyzdy sheshim, sonyń ishinde atom elektr stansasyn salý máselesi, jurtshylyqtyń qatysýymen qabyldanýǵa tıis. Osyǵan oraı Prezıdent atom elektr stansasyn salý týraly jalpyulttyq referendým ótkizýge sheshim qabyldaǵanyn málimdedi. Bul referendým 2024 jyldyń 6 qazanynda ótetin boldy. Referendým qoǵamdaǵy keń aýqymdy dıalogtiń aıqyn kórinisi bolmaq jáne «Halyq únine qulaq asatyn memleket» qaǵıdatyn júzege asyrýdyń taǵy bir qadamyna aınalady. Mundaı qadamdar arqyly elimizde jańa qoǵamdyq-saıası mádenıet qalyptasady jáne mańyzdy memlekettik sheshimder qabyldaýdyń jańa úlgisi jasalady. Prezıdenttiń bul bastamasy qoǵamdy ortaq maqsattarǵa jeteleıtin mańyzdy dıalogtiń negizi.
Juldyz SÚLEIMENOVA,
Májilis depýtaty