Qazaqstan Respýblıkasynyń Syrtqy ister mınıstri Erlan Ydyrysov Astanaǵa Álemdik jáne dástúrli dinder lıderleriniń V sezine qatysý úshin kelgen BUU О́rkenıetter alıansynyń Joǵary ókili Nasır Abd ál-Ázız an-Nasermen kezdesti, dep habarlady QR SIM-iniń baspasóz qyzmeti.
Taraptar Qazaqstan men BUU-nyń dinaralyq jáne etnosaralyq únqatysýdy ilgeriletý boıynsha birlesken kúsh-jigeri máselesin talqylady. E.Ydyrysov atap ótkendeı, Qazaqstan ári qaraı da órkenıetter arasyndaǵy ózara túsinistikti nyǵaıtýǵa úles qosyp, mádenıetaralyq, etnosaralyq jáne dinaralyq qarama-qaıshylyqtardy eńserý boıynsha álemdik qoǵamdastyq tarapynan jınaqtalǵan ozyq tájirıbelerdi paıdalaný nıetinde.
«Biz ózimizdiń ishki baılyǵymyz – ultaralyq jáne konfessııaaralyq kelisimniń qazaqstandyq modelin paıdalana otyryp, Batys pen Shyǵys arasynda moderator rólin atqara alar edik. Sizdiń sezd jumysyna qatysýyńyz aıtarlyqtaı mańyzdy. О́ıtkeni, BUU qazirgi zamanǵy jahandyq qaýip-qaterlerge qarsy halyqaralyq kúsh-jigerdi úılestirýge daıyn ekenin atap kórsetip otyr», – dep málimdedi mınıstr.
Qazaqstannyń álemdik deńgeıde únqatysý ornatýǵa naqty úles qosyp otyrǵanynyń bir mysaly retinde E.Ydyrysov bizdiń elimizdiń bastamasymen 2013-2022 jyldar aralyǵy IýNESKO-nyń týy astynda Mádenıetterdi jaqyndastyrýdyń halyqaralyq onjyldyǵy dep jarııalanǵanyn atap ótti.
О́z kezeginde, Nasır Abd ál-Ázız an-Naser Qazaqstannyń Álemdik jáne dástúrli dinder sezin shaqyrý týraly bastamasyn joǵary baǵalady. Onyń pikirinshe, bul bastama Qazaqstannyń kelisim men toleranttylyqty, halyqtar arasyndaǵy qurmet pen dostyqty, mádenıetter men órkenıetterdi ilgeriletý máselelerine úlken úles qosyp otyrǵanynyń aıǵaǵy bolyp tabylady.
Syrtqy saıasat vedomstvosynyń basshysy ornyqty damý jáne basqa da ózekti máseleler boıynsha ózara is-qımyldy ári qaraı jalǵastyrýǵa daıyn ekenin bildirdi. Qazaqstannyń Almatyda BUU-nyń О́ńirlik habyn qurý bastamasyn qoldaıtyny málimdeldi. «Geosaıası jáne geografııalyq kózqaras turǵysynan Qazaqstan BUU-nyń Ortalyq Azııa men Aýǵanstandaǵy qyzmetin úılestirýde asa laıyqty oryn bolyp tabylady», – dep atap ótti mınıstr. BUU-nyń Almatydaǵy haby qazirgi jaǵdaılarda, ıaǵnı gýmanıtarlyq kómek pen damýdyń ortaq baǵyttylyǵy kezeńinde erekshe saıası mańyzǵa ıe bolady, dep atap kórsetti E.Ydyrysov.
Kezdesý kezinde, sondaı-aq, Qazaqstannyń 2017-2018 jyldary BUU Qaýipsizdik Keńesiniń turaqty emes músheligi mártebesin alýǵa tapsyrysy talqylandy. «Saılanǵan jaǵdaıda biz jahandyq jáne óńirlik deńgeıdegi kókeıkesti máselelerdi sheshýge aıtarlyqtaı úles qosamyz dep bilemiz», – dep sendirdi suhbattasyn E.Ydyrysov.