AQSh-tyń Vermont jáne Massachýsets shtattarynda Densaýlyq saqtaý departamenti turǵyndarǵa juqpaly vırýstyń taralýyna baılanysty keshki saǵat 6-dan keıin úıden shyqpaýǵa keńes berdi. Sırek kezdesetin, qaterli vırýs masa arqyly taralyp jatyr, dep habarlaıdy Egemen.kz Lenta.ru-ǵa silteme jasap.
Qaýipti ınfeksııa «Shyǵys jylqy ensefalomıelıti (VEL) dep atalady. Bul aýrýmen negizinen jylqylar aýyrady. Adamǵa masa arqyly juǵady. Adam aǵzasyna túsken kezde mıdyń isinýin týdyrady, 30 paıyz jaǵdaıda ólimge alyp kelýi múmkin.
Dárigerler 14 qaladan VEL tasymaldaıtyn masalardyń 47 tobyn tapqan. AQSh ta ortasha eseppen bul aýrýmen jylyna 11 adam aýyrady. 2023 jyly Nıý-Gempshır shtatynda vırýs juqtyrǵan er adamdy dárigerler qutqaryp qala almaǵan.
Atalǵan shtattarda qoǵamdyq is sharalar keıinge shegerildi.