Aqtaýda eń ózekti máseleniń biri – aýyzsý. Ásirese jazda, aptap ystyqta qıyn. Qala ákiminiń mindetin atqarýshy Nurtas Salıdyń aıtýynsha, ózekti máseleni jeńildetý úshin Aqtaý qalasynda 6 joba júzege asyrylyp jatyr. «MAEK» JShS jazǵy maýsymda táýligine shamamen 52 000 tekshe metr aýyzsýmen qamtamasyz etedi. Jaz aılarynda qosymsha qajetti aýyzsý kólemi shamamen 20-25 myń tekshe metrdi quraıdy.
«Aqtaý qalasynyń aýyzsý tapshylyǵyn joıý baǵytynda 6 joba iske asyrylyp jatyr. Olardyń qatarynda «Kaspıı» sý tushytý zaýytyn táýligine 20 000 tekshe metrden 40 000 tekshe metrge deıin keńeıtý» jobasy bar. Bul joba iske asyrylǵannan keıin, qalaǵa jaz mezgilinde táýligine qosymsha 6 000 tekshe metr aýyzsý beriledi dep kútilip otyr. Sonymen qatar jeke ınvestor kómegimen «Aleka» JShS tarapynan qýattylyǵy táýligine 4 000 tekshe metr sý tushytý qondyrǵysyn ornatý» jobasy júzege asyrylyp, maýsym aıynda iske qosyldy. Al «MAEK» JShS «OSJT-2» aýmaǵynda ónimdiligi táýligine 6 000 tekshe metr sý tushytý qondyrǵylaryn salý» jobasyn iske qosý jumystary osy jyldyń shilde aıyna josparlanǵan. Aýyzsý máselesin sheshý baǵytyndaǵy jobalardyń biri – «MAEK» JShS-da qýattylyǵy táýligine 4 000 tekshe metr dıstıllıasııalyq tushytý qondyrǵylary (DTQ) jabdyǵyn aýystyrý». Bul jobany 2025 jyldyń birinshi jartyjyldyǵynda iske asyrý josparlanǵan», deıdi qala ákiminiń mindetin atqarýshy Nurtas Salı.
Sondaı-aq jeke ınvestor «SK-A-Stroı» JShS esebinen «Aqtaý qalasynda sý tushytý zaýytynyń qurylysyn salý» jobasy bar. Atalǵan joba aıasynda sý tushytý zaýyty jyl sońynda táýligine 3 500 tekshe metr aýyzsý óndirip, bıyl shilde aıynda zaýyt qýatyn táýligine 7 000 tekshe metrge deıin arttyrý kózdelip otyr.
«MAEK» JShS aýmaǵynda keri osmos qoldaný arqyly táýligine 24 000 tekshe metr sý óndirý qondyrǵylaryn salý» jobasyna tıisti túzetýler engizilip jatyr.
Atalǵan jobalar tolyq júzege asqan jaǵdaıda qaladaǵy aýyzsý máselesindegi biraz túıin tarqatylady degen úmit bar. Turǵyn sany jyldan-jylǵa artyp, sý tushytý, jetkizý jabdyqtary eskirgen qala bul baǵytta áli talaı ıdeıalardyń týyndap, jobalar men josparlardyń batyl iske asýyn qajet etedi.
Mańǵystaý oblysy