Taldyqorǵanda «Jetisý» kásibı voleıbol klýbyna arnalǵan zamanaýı voleıbol ortalyǵynyń esigi ashyldy. Sportshylarǵa arnalǵan tórt qabatty turǵyn úı alystan kóz tartady. Sebebi mundaı nysannyń elimizde balamasy joq.
Atalǵan voleıbol ortalyǵynda erler men áıelder quramalarynyń negizgi komandalary, jastardyń qos komandalary úshin eki bólek jattyǵý zaly bar. Ashylý saltanatynda sóz alǵan oblys basshysy Beıbit Isabaev bul sport kesheni óńir úshin mańyzy zor ortalyq bolatynyn aıtty.
«Memleket basshysy bizge buqaralyq sportty damytýǵa barynsha qolaıly jaǵdaı jasaý mindetin júktedi. Osy oraıda, «Jetisý» klýby úshin zamanaýı voleıbol ortalyǵynyń ashylýy sportshylarymyzdyń kásibı ósýine, ózimizdiń jas kadrlardy tárbıeleýge qolaıly jaǵdaı týǵyzýda. Aldaǵy ýaqytta «Jetisý» voleıbol klýbynyń Akademııasyn quramyz. Oǵan orta mektepterden voleıbolǵa qabileti bar balalar iriktelip alynady. Bul akademııada olar jalpy bilim berý baǵdarlamasyn meńgerip qana qoımaı, voleıbolmen qarqyndy túrde aınalysatyn bolady. Osylaısha biz óz oıynshylarymyzdy, bolashaq chempıondarymyzdy kezeń-kezeńimen tárbıeleıtin bolamyz», dedi oblys ákimi B.Isabaev.
Oblys basshysy voleıbol ortalyǵy jergilikti bıýdjetten, al sportshylarǵa arnalǵan turǵyn úı ınvestordyń qarajatyna salynǵanyn atap ótti. Beıbit Isabaev saltanatty jıynǵa qatysqan kásipker-mesenat Keńes Raqyshevqa Jetisýdaǵy buqaralyq sportty damytýǵa qosqan úlesi úshin oblys turǵyndary atynan alǵysyn bildirdi.
Aımaq basshysy óz sózinde, sport uıymdary men jekelegen sportshylardyń kommersııalyq kiristerin arttyrý arqyly nátıjelerdi jaqsartýǵa jáne qoldaýdy tartýǵa múmkindik beretin kásibı sportty kezeń-kezeńimen kommersııalandyrý josparlaryn atap ótti.
Voleıbol ortalyǵynyń lenta qııý rásimi saltanatty túrde ótken soń, qonaqtar jańa nysannyń ishin aralady.
Ashylý saltanatyna elimizdiń abyroıyn halyqaralyq arenada asqaqtatqan belgili sportshylar qatysty. Olardyń qatarynda Olımpıada júldegeri Máýlen Mamyrov, «Qazaqstan Barysy» atanǵan Ulan Rysqul, «Qazaqstan Barysy» týrnıriniń kúmis júldegeri, qazaq kúresinen Álem chempıony Rýslan Ábdirazaqov, «Jetisý» kásibı voleıbol klýbynyń burynǵy oıynshylary jáne sport ardagerleri Karına Ishımseva, Olga Danchenko, Marına Andreeva, Tatıana Pıýrova, Karına Tatkolar bar.
«Jetisý» kásibı voleıbol klýbynyń dırektory Nııaz Jantileýov voleıbol ortalyǵy joǵary kásibı deńgeıdegi joǵary sapaly materıaldyq-tehnıkalyq bazasymen erekshelenetinin aıtty.
«Voleıbol – sportshylar úshin fızıkalyq turǵydan qıyn, keń aýqymdy qozǵalystardy qajet etetin sport túri. Sondyqtan bul sportpen aınalysý úshin sportshylarǵa joǵary sapaly eden qajet. Eń birinshi, edenen sportshy jaraqat almaýy kerek. Eden jumsaq, soqqyǵa tózimdi bolǵany jón. Mine, jańa ortalyqta osy eń mańyzdy talap birinshi kezekte oryndalady. Eden Fransııa qalasynan jetkizildi. Munda barlyǵy da halyqaralyq olımpıada talaptaryna saı», dedi N. Jantileýov.
Áıelder voleıbol komandasynyń oıynshysy Iаna Rahmatýllına da óz áserimen bólisti.
«Biz osy jańa zalda oqý-jattyǵý jıynyn ótkizdik. Zal, árıne, óte jaqsy, jaryq, yńǵaıly, keń. Edender yńǵaıly, terafleks taıǵaq, bul oıynshylar úshin mańyzdy. Buryn biz «Jastar» sport saraıynda jattyǵatynbyz. Ol jaqta jaqsy jaǵdaı bar. Biraq basqa sport túrlerinen jarys ótkende jattyǵa almaımyz. Jattyǵýlar sanyn azaıtý, árıne, jalpy komandanyń daıyndyq sapasyna áser etedi. Endi óz ortalyǵymyzda ózimiz emin-erkin, kez kelgen ýaqytta jattyǵýymyzdy jasaımyz. Bul klýbtyń kásibı jetistikterine oń áser etetinine senimdimin. Eń bastysy – jaqyn jerde sportshylarǵa arnalǵan úı de salynǵany óte yńǵaıly», dedi sportshy.
Jańa voleıbol ortalyǵynda eki jattyǵý bólmesi bar. Iаǵnı, áıelder men erler komandalary bólek jattyǵady. Voleıbol ortalyǵynyń úsh qabatty ǵımaratynyń jalpy aýdany 2,3 myń sharshy metrden asady. Voleıbol ortalyǵynyń 1-qabatynda jattyǵý zaly, 2-qabatynda jattyqtyrýshylar bólmesi, kıim aýystyratyn bólmeler, emdeý-massaj, dýsh kabınalary, al 3-qabatta jattyǵý zaly men ákimshilik kabınetter ornalasqan.
Sportshylarǵa arnalǵan turǵyn úı ǵımaraty 41 orynǵa arnalǵan. Jalpy aýdany 3 myń sharshy metrden asady. Jertóleleri bar tórt qabatty ǵımarattyń 2 kireberisi bar. Birinde 12 bir bólmeli, 3 eki bólme bar. Bul bólmelerge shaǵyn otbasylar qonystanýǵa bolady. Ekinshisinde 26 bólme bar. Úıde barlyq qajetti sanıtarlyq-turmystyq qural qamtylǵan. Onyń ishinde as úı men kir jýatyn, jýynatyn arnaıy bólmeler de qarastyrylǵan.
Jalpy, Memleket basshysynyń buqaralyq sportty damytý jónindegi tapsyrmalaryn júzege asyrý aıasynda bıyl oblysta 17 jańa sport nysanynyń qurylysy júrip jatyr, sonyń ishinde beseýi paıdalanýǵa berildi.