Mańǵystaý oblysynda qurastyrylǵan «Shapshań» áskerı desanttyq kateri Kaspıı teńizine túsirildi. Saltanatty is-sharaǵa Mańǵystaý oblysynyń ákimi Nurdáýlet Qılybaı, Qorǵanys mınıstriniń orynbasary, general-leıtenant Sultan Qamaletdınov, Qarýly Kúshterdiń kontr-admıraly Ratmır Kamratov, áskerı qyzmetshiler men qala turǵyndary qatysty.
Jańa kater teńizdegi memleket shekarasyn, eldiń birtutastyǵyn qorǵaýǵa qyzmet etedi. Qorǵanys mınıstriniń orynbasary jaýyngerler kateri óńirdiń teńiz áleýetiniń qarqyndy damyp jatqanyn ańǵartatynyn málim etti.
– Prezıdent Joldaýynda aıtylǵandaı, jahandyq áskerı tehnıka óndirisi damyǵan memleketterdiń ulttyq qorǵanys júıesinde sheshýshi ról oınaıdy. Qazirgi zaman – jańa tehnologııa zamany. Bul kater – Otanymyzdyń ınjenerııa salasynyń joǵary deńgeıiniń aıqyn dáleli, – dedi S.Qamaletdınov.
О́ńir basshysy Nurdáýlet Qılybaı tarıhı oqıǵanyń ǵalymdardyń tókken teri men eńbeginiń nátıjesi ekenin aıtty.
– Memleket basshysy Qasym-Jomart Toqaev qazaq qurylys ındýstrııasyn damytý, tereńdetý qajet dep baǵyt-baǵdar bergen edi. Mine, nátıjesin, jemisin kórip otyrmyz. О́ńirimizde jasalǵan otandyq ónim el tynyshtyǵyn kúzetip, teńiz áskerleriniń nátıjeli qyzmet etýine kómektesedi. Osy jobany júzege asyrǵan azamattarǵa, mamandarǵa, qurylysshylarǵa kóp rahmet aıtamyn. Azamattar ózderiniń sheberlikterin dáleldedi, – dedi oblys ákimi.
Jańa katerdi qurastyrǵan «Keme jabdyqtary jáne servıs» JShS-nyń dırektory Dmıtrıı Donskoıdyń aıtýynsha, seriktestiktiń tek qorǵanys salasynda emes, azamattarǵa arnalǵan, týrızm, transport baǵytynda, tótenshe jaǵdaılar kezinde qoldanylatyn tehnıkalardy da jasaýǵa múmkindikteri bar.
Mańǵystaý oblysy