Balet óneriniń belesi

Festıval kórnekti balet ár­tisteri men horeograftardyń basyn qosqan tájirıbe men shy­ǵar­mashylyq jetistikteriniń alma­sý alańy boldy. Saltanatty is-sha­ranyń ashylýynda Qazaq ulttyq ho­reografııa akademııasynyń rek­tory Bıbigúl Núsipjanova, kór­kem­dik jetekshisi, Reseıdiń halyq ártisi Altynaı Asylmuratova, ba­let ár­tisi jáne Beıjiń bı akade­mııa­sy­nyń balet departamenti­niń dırek­tory Vladımır Malahov, ba­let juldyzy Dıana Vıshneva, «Raýshan gúli men kóbelektiń romany» baletiniń qoıýshy horeo­grafy Vasılıı Medvedev, balet ártisi ári Borıs Eıfman bı akademııasynyń kórkemdik je­tek­shisi Konstantın Matveev, Beı­jiń bı akademııasynyń vıse-pre­zıdenti Sý Iаnyń qatysýymen ót­ken baspasóz máslıhatynda festıval uıymdastyrýshylary men qo­naqtary joǵary horeografııa­lyq óner týraly shabyttandyratyn áńgimelerin aıtyp, bı akademııa­laryn dúnıejúzilik deńgeıde da­my­týdyń mańyzdylyǵyn talqyla­dy. Qonaqtardyń árqaısysy álem­dik kontekste horeografııalyq ónerdiń ósýine yqpal etetin san alýan mádenıetter men bilim berý mekemeleri arasyndaǵy tájirıbe almasýdyń mańyzdylyǵyn da basa atap ótti. Al qoıylym rejısser­leri sahna syrtyndaǵy qyzyqty máli­met, shyǵarmashylyq ıdeıalarmen, qoıylymǵa degen kózqarastarymen jáne ár shyǵarmanyń erekshe erekshelikterimen bólisti.

Sondaı-aq bul keshte kórer­mender Qazaq ulttyq horeografııa akademııasynyń qaıtalanbas qoıylymy — «Raýshan gúli men kóbelektiń romany» baletin tamashalap, saf ónerdiń sulýlyǵynan lázzat aldy. Bı óneriniń ańyzy Marıýs Petıpanyń sońǵy týyndysyna negizdelip Rıkardo Drıgonyń mýzykasyna qoıylǵan horeograf Vasılıı Medvedevtiń redaksııasyndaǵy aıtýly jumys festıvaldyń jańalyǵy boldy. Tarıhyna 120 jyl toltyryp otyrǵan áıgili týyndy sonysymen de keshtiń aıtýly oqıǵasyna aınaldy.

Festıvaldyń kelesi kúni Qazaq ulttyq horeografııa akademııasynda álemdik balet juldyzdary – Marııa teatrynyń prıma-balerınasy Dıana Vıshneva men ataqty balet ártisi ári horeograf Vladımır Malahovtyń sheber­lik synyptary ótti. Áıgili ártister­diń shyǵarmashylyq tájirıbesine negizdelgen tushymdy dáris stýdentterge joǵary bı ónerine tereń­nen boılaýǵa tamasha múmkindik berdi. Al halyqaralyq seriktesterdiń qatysýymen ótken «Qazirgi bilim berý júıesindegi horeografııa­lyq mektepti damytý perspektıvalary» taqyrybyndaǵy dóńge­lek ústel búgingi bı óneriniń ózekti máselelerin talqylady.

Balet ónerin jańasha beleska kótergen bı sherýi «Astana Ballet» sahnasynda ótken Gala-kesh­pen qorytyndylandy. Sahnaǵa eki be­deldi horeografııalyq mektep – Borıs Eıfman bı akademııasy­nyń jáne Beıjiń bı akademııasy­nyń stýdentteri shyqty. Borıs Eıf­man bı akademııasy adam bolmy­sy­nyń máńgilik taqyryptary – senim, úmit hám mahabbat týraly baıandaıtyn «Epiphania» bir aktili balet-spektaklin usynsa, Beıjiń bı akademııasy kórermenderge «Dıvertısment» baǵdarlamasyn tartý etti. Onda Marıýs Petı­pa men Artýr Sent-Leonnyń klas­sıkalyq týyndylary zamanaýı qoıylymdarmen biriktirilip, horeografııalyq ónerdiń ásem­digi men jan-jaqtylyǵyn sheber jet­kize bildi.

Iá, «Temps lié» festıvali – bul tek bı merekesi ǵana emes, sonymen qatar tájirıbe almasý, halyqaralyq baılanystar ornatý ári jańa shyǵarmashylyq ıdeıalarmen shabyttandyrýǵa a­r­nalǵan alań retinde de aýqymdy júk arqalady. Qorytyndy keshte sahnaǵa kóterilgen Qazaq ulttyq horeografııa akademııasynyń ­rektory Bıbigúl Núsipjanova is-sharanyń barlyq qatysýshy­sy­na rızashylyǵyn jetkize kele: «Osyn­daı aýqymdy jáne mańyzdy oqıǵanyń bir bóligi bolý – naǵyz maqtanysh» dep sóz túıindedi.