Birer jyl buryn óńirde apatty jaǵdaıdaǵy jáne úsh aýysymda oqıtyn birneshe bilim oshaǵy bar bolatyn. Memleket basshysynyń tapsyrmasyna sáıkes eki jyl buryn qolǵa alynǵan «Jaıly mektep» ulttyq jobasy aıasynda sońǵy ýaqytta óńirde birneshe bilim uıasy boı kóterdi. Nátıjesinde, máselesi ýshyqqan bilim ordalarynyń sany aıtarlyqtaı azaıdy.
«Jaıly mektep» ulttyq jobasy aıasynda eki jyl ishinde óńirde birneshe jańa mektep boı kóterýge tıis bolsa, onyń úsheýi búgingi kúnge deıin paıdalanýǵa berilgenin aıtpaı ketýge bolmas. Jańa oqý jyly bastalǵan kezde Baızaq aýdanynyń ortalyǵy Sarykemer aýlynda 600 oqýshyǵa arnalǵan sý jańa bilim ordasy bilim alýshylarǵa esigin aıqara ashsa, bir aı buryn oblys ortalyǵy Taraz qalasynda 1200 balaǵa shaqtalǵan №66 mektep oqýshylardy qabyldady.
Kúni keshe elimizdegi eń iri shaǵyn aýdan sanalatyn «Uly dala» shaǵyn aýdanyndaǵy №67 mektep balalar ıgiligi úshin paıdalanýǵa berildi. Jergilikti atqarýshy bılik ókilderi keltirgen derekke sensek, bilim oshaǵy 1200 oqýshyǵa arnalǵan eken.
«Ǵylym men ilimniń qaınar bulaǵy mektepte alǵan bilimnen bastaý alsa kerek. Sol úshin de memleket bilim salasyna aıryqsha nazar aýdaryp, qamqorlyq kórsetip otyr. Keleshegin oılaǵan kez kelgen memleket ınvestısııany birinshi kezekte bilim salasyna salatyny belgili. Bolashaq urpaqtyń sanaly, bilimdi bolyp ósýi úshin bárimiz jaýaptymyz.
Memleket basshysy Qasym-Jomart Toqaevtyń bastamasymen qolǵa alynǵan «Jaıly mektep» ulttyq jobasy aıasynda óńirimizde birneshe bilim oshaǵy boı kótergenin atap ótken jón. Búgin mine, zamanaýı úlgide jabdyqtalǵan taǵy bir bilim oshaǵy oqýshylarǵa esigin aıqara ashty. Buǵan deıin irgedegi Baızaq aýdanyna qarasty Sarykemer aýlynda, Taraz qalasyndaǵy «Báıterek» shaǵyn aýdanynda dál osyndaı bilim berý nysandary boı kótergen bolatyn. Bul jumystyń bári Memleket basshysynyń qoldaýynyń arqasynda iske asyp jatqanyn aıta ketken lázim. Jalpy alǵanda, óńirde bilim salasyna qoldan kelgenshe qoldaý kórsetile bermek», dedi óńir basshysy Erbol Qarashókeev jańa mekteptiń ashylý saltanatynda sóılegen sózinde.
Oblys ákimdiginiń baspasóz qyzmeti keltirgen derekke súıensek, bilim berý nysanynyń salynýyna, qurylys jumysynyń talapqa saı sapaly júrgizilýine «Samuryq-Qazyna» aksıonerlik qoǵamy men «Integra Construction kz» JShS muryndyq bolypty.
«Búgin «Uly dala» shaǵyn aýdanynda mereıli kún desek te bolady. Turǵyndardyń qýanyshynda shek joq. Dál osy «Jaıly mektepti» alǵashqy irgetasy qalanǵan kúnnen bastap baqylap otyrdyq. Jaýapty azamattardyń qurylys sapasyna aıryqsha nazar aýdarǵany kóńil qýantady. Tórt nemerem sý jańa bilim ordasynyń tabaldyryǵyn attap otyr. Oqýshylarǵa barlyq jaǵdaı qarastyrylǵanyn aıtpasqa bolmas. Jergilikti turǵyndardyń ótinishine qulaq asqan bılik basyndaǵy azamattarǵa aıtar alǵysymyz sheksiz. Jańa mektepte bilim alǵan balalar úlken azamat bolyp ósip shyqsyn», deıdi «Uly dala» shaǵyn aýdanynyń turǵyny, zeınetker Almash Aýǵanbaeva.
Jaýapty mamandardyń aıtýynsha, jańa bilim ordasy sheteldik ozyq tehnologııamen jabdyqtalǵan. Munda oqýshylardyń qaýipsiz ortada bilim alýyna barlyq múmkindik qarastyrylǵan. Mektepte bilikti pedagog mamandar sabaq beredi.
Derekke sensek, jańa ǵımaratta ınteraktıvti taqtasy bar 59 oqý kabıneti, 3 ashana, 2 sport zal, májilis zaly, kitaphana, 2 lıngafon, 2 kompıýter kabıneti bar. Sonymen qatar 3 sheberhana, 3 zerthana, 10 kovorkıng-ortalyq qarastyrylypty.
Jalpy alǵanda, Jambyl oblysynda «Jaıly mektep» ulttyq jobasy aıasynda 12 mektep salý josparlanǵan. Jańa bilim oshaqtaryn salý arqyly aldaǵy jyldary úsh aýysymdy oqytýdy, oqýshy ornynyń tapshylyǵyn jáne apatty mektepterdi joıý kózdelip otyr. Osy jyly óńir boıynsha qurylysy bastalǵan 36 bilim berý nysanynyń 10-y paıdalanýǵa berilgen. Jyl aıaǵyna deıin taǵy 5 mekteptiń qurylys jumysy aıaqtalady. Al aldaǵy jyly 26 bilim oshaǵynyń qurylys jumysy bastalady.
Jambyl oblysy