Jol máselesi – Jetisý óńirinde de ózekti taqyryptyń biri. Búginde alys aýyldarǵa aparatyn tas joldy jóndeý jumystary júrip jatyr. Máselen, oblystyq deńgeıdegi 200 shaqyrymǵa tarta asfalt qaıta jabdyqtalǵan. Jyl sońyna deıin jaqsy jáne qanaǵattanarlyq jaǵdaıdaǵy jergilikti avtomobıl joldarynyń úlesi 94% jetkiziledi dep josparlanyp otyr.
Bıyl Jetisýda 193 shaqyrym jol men 54 eldi mekenniń ishki joldary jóndeldi. Sol qatarda aýdan ortalyǵy men aýyldardyń arasyn qosatyn joldar, aýyldardyń kirme joldary, kópirler, aýylishilik joldar bar. Máselen, Qaratal aýdanynda otyz jyldan astam ýaqyt jóndeý kórmegen shalǵaıdaǵy Kópbirlik aýylyna aparatyn jol jóndelip, jýyrda paıdalanýǵa berilse, osy aýdandaǵy taǵy bir mańyzdy jol – «Úshtóbe – Ortatóbe – Kishitóbe» baǵytyndaǵy avtotrassanyń qurylysy bitýge taıaý.
Oblys ákimi Beıbit Isabaevtyń Qaratal aýdanynyń halqymen kezdesýinde kóterilgen atalǵan joldardyń máselesine oraı bıýdjetten qarjy qarastyrylyp, jóndeý jumystary osy jyldyń sáýir aıynda bastalǵan bolatyn. Búginde qurylys jumystary 95 paıyzǵa aıaqtalǵan.
«Úshtóbe – Ortatóbe – Kishitóbe jolynyń jóndeý jumystary belgilengen kestege sáıkes júrgizildi. Jalpy uzyndyǵy 11 shaqyrym jóndeldi. Munda eki qabatty, qalyńdyǵy 10 sm jabyn tóseldi. Qazir abattandyrý, jol belgilerin ornatý jumystary atqarylyp jatyr», dedi Qaratal aýdandyq turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspeksııasy bóliminiń basshysy Talǵat Ýálıev.
Sońǵy jyldary aýyldyq jerlerdegi ınfraqurylymǵa erekshe kóńil bóline bastaǵanyna, halyq kótergen máseleniń oń sheshilgenine qatysty turǵyndar da pikir bildirdi.
«Sonaý 1974 jyldan beri osy eldi mekende turamyn. Bıyl aýdan ortalyǵymen aýyldy jalǵaıtyn jolymyz jóndeldi. Oǵan qosa alty kóshesi bar aýylymyzdyń tórt kóshesi jańǵyrtylyp, asfalt jabyny tóseldi. Buǵan deıin jańa mektep salynyp óskeleń urpaqtyń ıgiligine berilgen bolatyn. Medısınalyq pýnktiń bitýine de az qaldy. Aýyldyq jerge kóńil bólinip jatqanyna halyq rıza», dedi Ortatóbe aýylynyń turǵyny, ardager Oraz Shettibaıuly.
Oblys ákimi baspasóz qyzmetiniń málimetinshe, bıyl Jetisý óńirinde joldardy salýǵa, jóndeýge 40,6 mlrd teńge bólingen. Oblystyq mańyzy bar joldardyń 38 shaqyrymyna qurylys pen qaıta jańǵyrtý, 155,4 km jerge ortasha jóndeý, 60,6 myń sharshy metr jerge aǵymdaǵy jóndeý, 54 eldi mekende 157 km kentishilik joldardy salý men rekonstrýksııalaý júrgizý josparlanǵan. Sol sııaqty Balqash kóline deıingi 132 km jol kelesi jyldyń týrıstik maýsymyna deıin tolyq paıdalanýǵa beriledi.
Budan bólek, oblys aýmaǵynda respýblıkalyq mańyzy bar avtojoldardy qaıta jańǵyrtýǵa baǵyttalǵan iri jobalar iske asyryldy. «Úsharal – Dostyq», «Taldyqorǵan – Úsharal» avtojoldaryn qaıta jańartý aıaqtalýǵa jaqyn. Oǵan qosa «Saryózek – Kóktal», «Aıdarly – Kóktal» avtojoldarynyń ýchaskelerinde jóndeý jalǵasyp jatyr.
Jetisý oblysy