Bıyl Qyzylordada áleýmettik nysandar men turǵyn úı qurylysynyń qarqyny artty. Táýelsizdik merekesi qarsańynda Qarmaqshy, Syrdarııa aýdandarynda úı kezegin kútken jandar baspanaǵa qol jetkizdi. Oblys ortalyǵyndaǵy 84 páterlik 6 úıden 504 adamǵa kilt tabystaldy. Bıyl oblys aýmaǵynda jarııalanǵan «Rýhanııat jyly» aıasynda mádenıet salasy mamandaryna taǵy 40 páter berildi. Jaqynda ǵana «Syr jastary» óńirlik baǵdarlamasynyń qatysýshylary páterli boldy. «Syr jastary» – jylyna 100 jas otbasyny baspanamen qamtý úshin qolǵa alynǵan óńirlik tyń joba.
Jastarǵa baspana tabystaý rásiminde oblys ákimi Nurlybek Nálibaev jańa qonys ıelerine tilegin bildirip, óńirdegi aýqymdy jobalardy atap ótti.
Keıingi tolqyn ókilderine qamqorlyq Memleket basshysynyń nazarynda turǵan másele ekeni belgili. Osydan eki jyl buryn Almaty qalasy turǵyndarymen kezdesýde Prezıdent qala jastary úshin baspananyń eń ózekti másele ekenine toqtalyp: «Eńbek jolyn endi ǵana bastaǵan jastar birden páter satyp ala almaıtyny túsinikti. Jastardyń baspana alýyna jan-jaqty jaǵdaı jasaý kerek. Bul – memlekettiń basty mindetiniń biri» degen edi. «Jastardyń turǵyn úıge muqtajdyǵy máselesin sheshý úshin 2022 jyldyń jeltoqsan aıynda ótken oblystyq jastar forýmynda alǵash ret «Syr jastary» baǵdarlamasyn nesıelendirý jolymen júzege asyrý týraly sheshim qabyldandy. Oǵan oblystyq bıýdjetten «Otbasy bank» turǵyn úı qurylys jınaq banki» arqyly kredıt berýge 1,2 mlrd teńge bólindi. Baǵdarlamany birlese júzege asyrý úshin «Otbasy bank» 500 mln teńge qarjy bóldi. Mamyr aıynda 60 jas otbasy baspanaly bolsa, búgin, mine, 40 páterdiń kiltin tabystaımyz. Bul qonystoı – bastalǵan jumystyń jalǵasy. Baǵdarlamaǵa kelesi jylǵa da oblystyq bıýdjetten qarjy qaraldy. Shańyraqtaryńyz balalarmen bazarly, qutty qonaqtarymen ajarly bolsyn!» dedi oblys basshysy.
Saltanatty is-sharada el aǵalary bata berip, jańa páterden baspana buıyrǵan kópbeıindi qalalyq aýrýhananyń jas mamany Saltanat Seıitkamal kópshilik atynan kórsetilgen qoldaýǵa alǵysyn jetkizdi. Páter kiltin alǵan otbasylar qatarynda ustazdar, medısına mamandary men bıýdjettik mekemeler qyzmetkerleri bar.
Bıyl oblys bıýdjeti 750 mlrd teńgege jetip, turǵyn úı qurylysyna jáne jeke salýshylardan daıyn páterler satyp alýǵa 39 mlrd 100 mln teńge bólingen. Byltyrdan beri qalada jeti, toǵyz, on eki qabatty turǵyn úıler boı kótere bastady.
Memleket basshysynyń qoldaýymen ulttyq jobalar aıasynda keıingi eki jylda 4 myńǵa jýyq páter tabystalyp, 17 myń turǵynnyń baspana máselesi sheshilgen. Jyl basynan beri 2 myńǵa jýyq otbasy qonystoıyn toılap, turǵyn úı qurylysy kólemi 126 paıyzǵa ósti.
Qyzylorda